ފުރަތަމަ މެޗު ކާމިޔާބުކޮށް ފަޔާޒަށް ތާރީޚީ މޮޅެއް

ރާއްޖޭގައި ކުރިއަށްދާ މޯލްޑިވްސް އޯޕަން 10 ބޯލް ބިލިއާޑް މުބާރާތުގައި ކުޅުނު ފުރަތަމަ މެޗު ކާމިޔާބުކޮށް ރާއްޖޭގެ ޙުސެއިން ފަޔާޒް ތާރީޚީ މޮޅެއް ހޯދައިފި އެވެ.

މިއީ ރާއްޖޭގައި ބާއްވާ ބިލިއާޑުގެ ބައިނަލްއަޤުވާމީ ފުރަތަމަ މުބާރާތެވެ. ދުނިޔޭގެ ރޭންކިންގެ އެންމެ ކުރީގައި އުޅޭ އެތުލީޓުންނާއެކު ރާއްޖޭގައި މުބާރާތް ކުރިއަށް ދާނީ ހޮނިހިރު ދުވަހުން ފެށިގެން ބުދަ ދުވަހުގެ ނިޔަލަށެވެ. މުބާރާތުގައި ރާއްޖެއިން ވާދަ ކުރަނީ 16 ކުޅުންތެރިންނެވެ. މުބާރާތުގައި ހޮނިހިރު ދުވަހު ކުރިއަށް ދަނީ ގްރޫޕް ސްޓޭޖު މެޗުތަކުގެ ކުޅުމެވެ.

ފަޔާޒްގެ ފުރަތަމަ މެޗުގައި އޭނާ ވަނީ ގްރީސްގެ ޗެމްޕިއަން ނިކޮލަސް މަލާއީގެ މައްޗަށް ކުރި ހޯދައިފަ އެވެ. އެ މެޗު ފަޔާާޒް ކާމިޔާބު ކުރީ 7-6 ގެ ފްރޭމަކުންނެވެ. މެޗު ފަށައިގެން ކުރީ ކޮޅު ފަޔާޒް ލީޑު ނެގި ނަމަވެސް، ނިކޮލަސް ވަނީ އެއްްވަރުކޮށް، ލީޑު ވެސް ނަގައިފަ އެވެ. ނަމަވެސް ދެ ވަނަ ފަހަރަށް ލީޑު ހޯދައި، ފަޔާޒް ވަނީ މެޗު ކާމިޔާބުކޮށްފަ އެވެ. ގްރޫޕް ސްޓޭޖުގައި ފަޔާޒް ކުޅުނު ދެ ވަނަ މެޗުން ވަނީ ބަލިވެފަ އެވެ. އެއީ އިންޑޮނޭޝިއާގެ ބިލީ ރޮބިއަންސިޔާ އަތުންނެވެ. މެޗު ރޮބިއަންސިޔާ ކާމިޔާބު ކުރީ 3-7 އިންނެވެ. ގްރޫޕް ސްޓޭޖުގައި ފަޔާޒަށް ބާކީ އެއް މެޗު އަދި އޮންނާނެ އެވެެ. ހޮނިހިރު ދުވަހުގެ ރޭ (މިރޭ) ކުޅޭ މެޗުން މޮޅުވެ ފަޔާޒަށް އަނެއް ބުރަށް ދިޔުމުގެ ފުރުސަތު އޮންނާނެ އެވެ.

މުބާރާތުގަައި ހޮނިހިރު ދުވަހު ކުރިއަށް ދާނީ ގްރޫޕް ސްޓޭޖުގެ ކުޅުމެވެ.