"ސަރުކާރާއި ދެކޮޅަށް މަސައްކަތް ކުރާ އެމްޑީޕީ މެމްބަރުންނާއި މެދު ފިޔަވަޅު އަޅާދިނުމަށް ޕާޓީ އަށް އަދި ހުށަނާޅާ، އެ މަސައްކަތް ދަނީ ކުރިއަށް"
މެންބަރުންނާމެދު ފިޔަވަޅު އެޅުމަށް ޕާޓީގެ ފިޔަވަޅު އަޅާ ކޮމިޓީއަށް ފޮނުވުމަށް ޕީޖީ ގްރޫޕުން ވަނީ ފާސްކޮށްފައި
މަޖިލީހުގެ މެމްބަރުން
ސަރުކާރާއި ދެކޮޅަށް މަސައްކަތް ކުރާ އެމްޑީޕީ މެމްބަރުންނާއި މެދު ފިޔަވަޅު އަޅާދިނުމަށް ޕާޓީ އަށް އަދި ހުށަނާޅާ ކަމަށާއި އެ މަސައްކަތް ދަނީ ކުރިއަށް ކަމަށް އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވީ ފިކުރެއްގެ ދިރުމުގެ ނަމުގައި ވަކި ޕާލިމަންޓްރީ ގްރޫޕެއް އުފައްދައިގެން މަސައްކަތް ކުރާ މެންބަރުންގެ ތެރެއިން، ރައްޔިތުންގެ މަޖިލީހުގެ ކޮމިޓީތަކުގައި އެމްޑީޕީގެ ސްލޮޓްތަކުގައި ތިބި ފަރާތްތައް ވަކިކޮށް، ގެންނަން ޖެހޭ ބަދަލުތައް ގެނައުމަށް ހުށަހަޅުއްވާފައިވާ މައްސަލަ އާއި ގުޅިގެން އަޅާ ފިޔަވަޅުތަކާއި މެދު ރާއްޖެ އެމްވީ އަށް މައުލޫމާތު ދެއްވަމުންނެވެ. ސަރުކާރާ ދެކޮޅަށް މަސައްކަތް ކުރާތީ އެމްޑީޕީއަށް ނިސްބަވްތާ 4 މުޤައްރިރަކު ބަދަލުކުރަން އެ ޕާޓީގެ ޕީޖީ ގްރޫޕުން ވަނީ އެޕްރިލް މަހުގެ 19 ވަނަ ދުވަހު ނިންމާފައެވެ. މީގެ އިތުރުން އެ ބައްދަލުވުމުގައި އެ މެންބަރުންނާމެދު ފިޔަވަޅު އެޅުމަށް ޕާޓީގެ ފިޔަވަޅު އަޅާ ކޮމިޓީއަށް ފޮނުވުމަށްވެސް ޕީޖީ ގްރޫޕުން ވަނީ ނިންމަވާފައެވެ.
އެ މައްސަލަ މިހާރު ޕާޓީ އަށް ހުށަހަޅާފައިވޭތޯ ސުވާލުކުރުމުން އަސްލަމް ވިދާޅުވީ އަދި އެ މައްސަލަ ހުށަ ނާޅާ ކަމަށެވެ. ސަރުކާރާއި ދެކޮޅަށް މަސައްކަތް ކުރާ އެމްޑީޕީގެ މެމްބަރުންގެ ތެރެއިން މަޖިލީހުގެ ކޮމިޓީތަކުގެ މުގައްރިރުކަމުން ވަކިކުރުމަށް ނިންމާފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފް، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ، ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް އަދި ހުޅުދޫ ދާއިރާގެ މެންބަރު އިލްޔާސް ލަބީބެވެ. ވަކިކުރަން ނިންމާފައިވާ މެމްބަރުން ހިމެނޭ ކޮމިޓީތަކުގެ ތަފްސީލަށް ބަލާއިރު ހެންވޭރު ހުޅަނގު ދާއިރާގެ މެންބަރު ޙަސަން ލަތީފަކީ އާންމު ކޮމިޓީގެ މުޤައްރިރެވެ. ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއް ލަތީފްއަކީ އިމްތިޔާޒު އަދި ސުލޫކީ ކޮމިޓީގެ މުޤައްރިރެވެ. އޭގެ އިތުރުން، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއަކީ ޖުޑީޝަރީ ކޮމިޓީގެ މުޤައްރިރެވެ. އަދި ހުޅުދޫ ދާއިރާގެ މެންބަރު އިލްޔާސް ލަބީބްއަކީ ސްޓޭޓް އޯންޑް އެންޓަރޕްރައިޒަސް ކޮމިޓީގެ މުޤައްރިރެވެ.
ނަމަވެސް އެ ނޫން އެހެން މެމްބަރުން ވެސް މަޖިލީހުގެ ތަޅުމުގައި އާއި މަޖިލީހުގެ ކޮމިޓީގައި ސަރުކާރާއި ދެކޮޅަށް މަސައްކަތްކުރައްވައެވެ. އެހެންކަމުން އެފަދަ މެމްބަރުންނާއި މެދު ފިޔަވަޅު އެޅުމާއި މެދު ގޮތެއް ނިންމާފައިވޭތޯ ސުވާލުކުރުމުން އަސްލަމް ވިދާޅުވީ އެ މަޝްވަރާތައް އަދި ދަނީ ކުރިއަށް ކަމަށެވެ. އަދި އެ މެމްބަރުންނަށް އަޅާނެ ފިޔަވަޅަކާއި އެ ފަދަ މެމްބަރުންނާއި މެދު އަމަލުކުރާނެ ގޮތެއް ނިންމާނީ މަޝްވަރާކުރުމަށް ފަހުގައި ކަމަށް ވެސް އަސްލަމް ވިދާޅުވިއެވެ.
ޕާލިމަންޓަރީ ގްރޫޕުގެ ހިންގާ ގަވާއިދުގައި ވާގޮތުން ޕީޖީ ގްރޫޕުން ފާސްކޮށްފައިވާ ތްރީލައިން ވިޕަކާއި ޚިލާފުވެއްޖެނަމަ 4 މަރުޙަލާއަކަށް ބަހާލައިގެން ފިޔަވަޅު އެޅިދާނެއެވެ. އެގޮތުން ފުރަތަމަ ފަހަރު ތްރީލައިން ވިޕާއި ޚިލާފު ވެއްޖެނަމަ އަނގަބަހުން ނަސޭޙަތް ދިނުމާއި، ދެވަނަ ފަހަރު ޚިލާފު ވެއްޖެނަމަ ލިޔުމުން ނަސޭޙަތް ދިނުމަށް އެ ގަވާއިދުގައި ވަނީ ބުނެފައެވެ. އަދި ދެ ވަނަ ފަހަރު ތްރީލައިން ވިޕަކާއި ޚިލާފު ވެއްޖެނަމަ ޕާޓީގެ ޕާލިމަންޓަރީ ގްރޫޕުގެ ނުވަތަ ޕާޓީގެ އެހެންވެސް މަޤާމެއްގައި ހުރިނަމަ އެ މަޤާމަކުން ވަކިކުރެވިދާނެ ކަމަށް ވަނީ ބުނެފައެވެ. އަދި ޕާޓީގެ ސްލޮޓްއެއްގައި މަޖިލީހުގެ ކޮމިޓީއެއްގައި ހުރެ މުޤައްރިރު ނުވަތަ މުޤަރިރުގެ ނައިބު ކަމުގައި އެމީހަކު އެކޮމިޓީއަކުން ވަކިކުރަން ޕާލިމަންޓަރީ ގްރޫޕަށް ހުށަހަޅަންވާނެކަމަށް ވެސް ބުނެފައިވެއެވެ.
ފިކުރެއްގެ ދިރުމުގެ ނަމުގައި މަސައްކަތްކުރާ މެމްބަރުންނާއި މެދު ފިޔަވަޅު އެޅުމަށް ޕީޖީ ގްރޫޕަށް މައްސަލަ އެއް ހުށަހެޅުއްވީ ތިނަދޫ އުތުރު ދާާއިރާގެ މެންބަރު އަބްދުލް މުޣުނީއެވެ. އެމްޑީޕީގެ ޕީޖީން ފާސްކޮށްފައި ވަނީ ފިޔަވަޅު އެޅުމުގެ ކުރިން ވަކިވަކި މެންބަރުންނަށް ޕީޖީ ލީޑަރޝިޕްގެ ފަރާތުން ބައްދަލުކޮށް އެ މެންބަރުން ނިންމާ ގޮތުގެ ރިޕޯޓެއް ހަފްތާއެއްގެ ތެރޭގައި ޕީޖީ އަށް ހުށަހެޅުމަށެވެ.
އެމްޑީޕީ ޕީޖީ ގްރޫޕްގެ ވަކި މެންބަރުންތަކެއް ޕީޖީ ގްރޫޕުގެ ބައްދަލުވުންތަކަށް ހާޒިރު ނުވުމާއި، ސަރުކާރާއި ދެކޮޅަށް މަޖިލީހަށް ގަރާރުތަކާއި މައްސަލަތައް ހުށަހަޅާ، އެ ބޭފުޅުން ތިއްބަވާ ކޮމިޓީތަކުގައި ސަރުކާރާއި ދެކޮޅަށް މަސައްކަތް ކުރަމުންދާކަމަށް އެ ހުށަހެޅުމުގައި ވެއެވެ. އަދި އެފަދަ އަމަލުތައް ކުރަމުންދާ ބައެއް މެންބަރުންނަކީ އެމްޑީޕީގެ ސްލޮޓުގައި ކޮމިޓީތަކުގެ މުގައްރިރުކަން ކުރައްވާ ބޭފުޅުންކަން މުޣުނީގެ ހުށަހެޅުމުގައި ފާހަގަކުރައްވާފައިވެއެވެ.
