ފީއަލީ އެކުވެރި ޒުވާނުންގެ ގުޅުން (ފެޒްގ) އިން ކުރިއަށް ގެންދާ ފިރިހެން ވޮލީބޯޅަ މުބާރާތުގައި ވިންގްސް އާއި ވިނަރެސް ކުޅުނު ފުރަތަމަ މެޗުން ދެ ޓީމު ވެސް މޮޅެއް ހޯދައިފި އެވެ.

ހުކުރު ދުވަހުގެ ހަވީރު ފެށި މުބާރާތުގައި އެންމެ ފުރަތަމަ ހަވީރު ކުޅުނީ ވިންގްސް އާއި ވީ ކިންގްސް އެވެ. ވާދަވެރި ކުޅުމަކަށްފަހު ފުރަތަމަ ސެޓު 25-23 އިން ކާމިޔާބު ކުރީ ވީ ކިންގްސް އެވެ. ނަމަވެސް ވިންގްސް އިން ވަނީ ފަހަތުން އަރައި ތިން ސެޓު ކާމިޔާބުކޮށްގެން މެޗުން މޮޅުވެފަ އެވެ. ވިންގްސް އިން ސެޓުތައް ކާމިޔާބު ކުރީ 22-25، 16-25 އަދި 16-25 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ކިންގްސްގެ އަލީ ޝާތިރު އެވެ.

ހުކުރު ދުވަހުގެ ރޭ ކުޅުނު މެޗުގައި ބައްދަލުކުރީ ވިނަރެސް އާއި ލެޖެންޑްސް އެވެ. ފަސޭހަކަމާއެކު ސީދާ ތިން ސެޓުން މެޗު ކާމިޔާބުކުރީ 30-28، 25-19 އަދި 25-19 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ވިނަރެސްގެ އާޒިމް މުޙައްމަދު އެވެ.

މުބާރާތުގައި ހޮނިހިރު ދުވަހުގެ ހަވީރު ބައްދަލު ކުރާނީ ވީ ކިންގްސް އާއި ވިނަރެސް އެވެ. ހޮނިހިރު ދުވަހުގެ ރޭ ބައްދަލު ކުރާނީ ވިންގްސް އާއި ލެޖެންޑްސް އެވެ. ހަތަރު ޓީމުގެ މެދުގައި ކުޅޭ މި މުބާރާތް ކުރިއަށް ދަނީ ކޮންމެ ޓީމެއް ކޮންމެ ޓީމަކާ ގުޅުމަށްފަހު، ޕޮއިންޓު ޓޭބަލްގެ އެއް ވަނަ އަދި ދެ ވަނަ ޓީމު ފައިނަލަށްދާ ގޮތަށެވެ.