ސިފައިންގެ ޚިދުމަތަކީ އަގުހުރި ޚިދުމަތެކެވެ. ރައްޔިތުންގެ ސަލާމަތާއި ރައްކާތެރިކަން ޔަޤީން ކުރުމުގެ އެންމެ މުހިއްމު އެއް ރޯލެއް އަދާކުރާ އެއް ބަޔަކީ ސިފައިންނެވެ.

ވަޒީފާގެ ބުރަ މަސްއޫލިއްޔަތު އަދާ ކުރުމުގައި ސިފައިންގެ އޮފިސަރުން ރެއާ ދުވާލު ކުރާ ބުރަ މަސައްކަތްތަކަށް ދިވެހިން ޝުކުރުވެރި ވެއެވެ.

އޭގެ ތެރެއިންވެސް އެންމެ ފާހަގަކޮށްލެވެނީ ވަޒީފާގެ ބުރަ މަސްއޫލިއްޔަތު އަދާކުރަމުން ރައްޔިތުންގެ ލޯތްބާއި އިހްތިރާމް ހޯދަން ސިފައިން ބަހައްޓަވާ އަހައްމިއްޔަތު ކަމެވެ. 

ސިފައިންގެ އެކި ދާއިރާތަކުން ޤައުމަށް ކޮށްދެމުންދާ ޚިދުމަތުގެ ތެރެއިން އެއް ޚިދުމަތަކީ ކޯސްޓްގާޑުގެ ޚިދުމަތެވެ. އެގޮތުން ދިވެހިރާއްޖެއަކީ 99.7 އިންސައްތަ ކަނޑުގެ ސަރަހައްދު އޮތް ގައުމަކަށް ވުމާއެކު، ކަނޑުގެ ބޮޑު ސަރަހައްދު ބަލަހައްޓައި ރައްކާތެރިކުރުމަށްޓަކައި ކޯސްޓްގާޑުގެ ސިފައިން ވަރަށް ގިނަ މަސައްކަތްތަކެއް ކުރަންޖެހިފައިވެއެވެ.

އަދި ދިވެހިރާއްޖޭގައި މަސްވެރިކަމުގެ ސިނާއަތާއި ފަތުރުވެރިކަމުގެ ސިނާއަތް ފުޅާވަމުންދާއިރު، އިތުރުވަމުންދާ ވޯޓަރ ސްޕޯޓްސްގެ ހަރަކާތްތަކާއެކު، މޫދަށް މީހުން ގެއްލުމާއި، ކަނޑު އުޅަނދުފަހަރަށް ދިމާވާ އެކިއެކި އިންސިޑެންޓްތައް ފަދަ ހާދިސާތައްވެސް އިތުރުވަމުންދާއިރު، ސިފައިންގެ ކޮނޑުގައި އެޅިފައި އޮތް ޒިންމާވެސް ބޮޑެވެ.

އެމްއެންޑީއެފްގެ ފަޔަރ އެންޑް ރެސްކިއު ޚިދުމަތަށް ބަލާއިރު، އެ ޚިދުމަތަށް މިހާރު ވަނީ 32 އަހަރު ފުރިފައެވެ. އެމްއެންޑީއެފްގެ ފަޔަރ އެންޑް ރެސްކިއު ސެކްޝަން ވުޖޫދުވެގެންއައީ ވަރަށް މަދު މީސްކޮޅަކާ އެކުގައިނަމަވެސް، އެމްންޑީއެފްގެ ޚިދުމަތްދެމުންދާ 4 ސަރަހައްދުގައި ހިމެނޭ ރަށްތަކުގައި 13 ވަރަކަށް ފަޔަރ ސްޓޭޝަން މިހާރު ގާއިމުކުރެވިފައިވެއެވެ.

މި ނޫނަސް އެކި ދާއިރާތަކުން ސިފައިން ދެމުންގެންދާ ޚިދުމަތްތަކަކީ އަގުހުރި، ރައްޔިތުންގެ ޙައްޤުގައި ފޯރުކޮށްދޭ ޚިދުމަތްތަކެކެވެ.  

ދިވެހި ސިފައިންގެ އަހަރީ ދުވަސް ފާހަގަ ކުރަމުންދާއިރު، މިއަހަރަށް ކަނޑައަޅާފައިވާ ސިފައިންގެ ޝިއާރަކީ "ސިފައިންގެ ބަދަހިކަން- ޤައުމުގެ ހަމަޖެހުން" އެވެ. މި ޝިއާރުން ރަމްޒުކޮށްދެނީ ކޮންމެ ކަމެއްގައިވެސް ސިފައިންގެ ސަފުތަކުގެ ބަދަހި ގުޅުން އިސްކޮށް، އެކަމުގައި ސާބިތުވެ ތިބުމުގެ މުހިއްމު ކަމެވެ.

ސިފައިން ޚިދުމަތުގައި ތިބޭ އިރު މަސައްކަތް ކުރަން ޖެހޭނީ އެކަތިގަނޑެއްގެ ގޮތުގައި އަމިއްލަ އެދުންތައް ދޫކޮށްލައިގެންނެވެ.

އަސްކަރީ ޚިދުމަތަކީ ޤައުމީ ޚިދުމަތެއްކަމަށްވާއިރު، އެ ޚިދުމަތާއި ގުޅުމަކީ މުގައްދަސް ވާޖިބެއް އަދާކުރުމަށް ވެވޭ ވައުދެކެވެ.

 އަދި ސިފައިންގެ މީހާ އެންމެ އިސްކަމެއް ދޭން ޖެހެނީ އޭނާ އާއި ހަވާލުކުރާ ޒިންމާ އަދާކުރާށެވެ.