ވާރޭ ވެހޭ ނަމަ ޢީދު ނަމާދު ކުރުން، އާއްމުކޮށް ހުކުރު ނަމާދު ކުރާ ހުރިހާ މިސްކިތެއްގައި އޮންނާނެކަމަށް އިސްލާމިކް މިނިސްޓްރީން ބުނެފިއެވެ.

އިސްލާމީ މަރުކަޒުގެ އިމާމް ނަސްރުﷲ އަލީ ވިދާޅުވީ މޫސުމަށް ބެލުމަށް ފަހު މޫސުން ތަންދޭ ނަމަ ރާއްޖޭގެ ހުރިހާ ސަރަހައްދެއްގައި ވެސް ބޮޑު ޖަމާއަތުގައި ޢީދު ނަމާދުކުރުން އޮންނާނެ ކަމަށެވެ. މާލެ ސަރަހައްދުގައި ބޮޑު ޖަމާއަތުގައި ހަ ސަރަހައްދެއްގައި ޢީދު ނަމާދު ކުރިއަށް ދާނެ ކަމަށް އޭނާ ވިދާޅުވިއެވެ. އެގޮތުން މާލޭގައި 13 މިސްކިތެއްގައި ޢީދު ނަމާދު ކުރާނެ ކަމަށް އޭނާ ވިދާޅުވިއެވެ. ބޮޑު ޖަމާއަތުގައި ޢީދު ނަމާދު ކުރެވޭ ވަރަށް ވުރެ މޫސުން ގޯސްތޯ ނޫންތޯ ބަލާނީ ހެނދުނު 06:00 އާއި ހަމަައަށް ބެލުމަށް ފަހުގައި ކަމަށް އޭނާ ވަނީ ވިދާޅުވެފައެވެ. މާލެ ސަރަހައްދުގައި ޢީދު ނަމާދުކުރުމަށް ހަމަޖެހިފައި ވަނީ މާލޭގައި މާފަންނު ސްޓޭޑިއަމް ސަރަޙައްދާއި، ވިލިމާލެ ބޯޅަދަނޑު އަދި ހުޅުމާލެ ފޭސް-2 ގެ ކްރިކެޓް ސްޓޭޑިއަމް އާއި ހުޅުމާލެ ފޭސް 1 ސިންތެޓިކް ޓްރެކް ސަރަހައްދުގައެވެ.

ޑެޕިއުޓީ ޑިރެކްޓަރ ޖެނެރަލް އަބްދުލް އަޒީޒް އިސްމާއިލް ވަނީ ޢީދު ނަމާދަށް ދާ ފަރާތްތަކުން ސަމާލުކަން ދޭން ޖެހޭ ބައެއް ކަންކަން ފާހަގަކުރައްވާފައެވެ. އެގޮތުން ކުރީ އަހަރުތަކުގައި ބައެއް މިސްކިތްތަކުގައި އިމާމަށް ވުރެ ކުރީގައި ސަފު ހެދުމުގެ މައްސަލަ ދިމާވި ކަމަށާއި އެފަދަ ކަންކަން ނުކުރުމަށް އިލްތިމާސްކުރައްވާ ކަމަށް ވިދާޅުވިއެވެ. އަދި ވީހާވެސް ގިނަ ފަރާތްތަކުން ޢީދު ނަމާދަށް ދާއިރު ހިނގާފައި ދިއުމަށް އިލްތިމާސްކުރެއްވިއެވެ. އަދި މިސްކިތަށް ދާ ފަރާތްތަަކަށް އިރުޝާދު ދިނުމަށާއި އެހީވުމަށް އެ ސަރައްދުގައި ސްކައުޓް ކުދިންނާއި ކެޑޭޓް ކުދިން ހަރަކާތްތެރިވާނެ ކަމަށް ވެސް އޭނާ ވިދާޅުވިއެވެ. ޢީދު ނަމާދަށް ދާއިރު އަމިއްލަ މުސައްލަ އާއި ފައިވާން ލުމަށް ކޮތަޅެއް ގެންދިއުމަށް މިނިސްޓްރީން ވަނީ އެދިފައެވެ.

ޢީދު ނަމާދަށް ދާއިރު ރޯގާ ފަދަ ކަމެއް ހުރި ނަމަ މާސްކް އެޅުމަށް ވެސް އޭނާ ވަނީ އިލްތިމާސްކުރައްވާފައެވެ.