މެސީ، ބާސެލޯނާއަށް ގެނެވޭނެ: ލަލީގާގެ ރައީސް

ޕީއެސްޖީއަށް ކުޅެމުން އަންނަ އާޖެންޓީނާގެ ކެޕްޓަން ލިޔޮނަލް މެސީ އަލުން ބާސެލޯނާއަށް ގެނެވޭނެކަމަށް، ފުރަތަމަ ފަހަރަށް ލަލީގާއިން ބުނެފިއެވެ.

މުޅި ކެރިއަރު ބާސެލޯނާގައި ހޭދަކުރި މެސީ މީގެ ދެ އަހަރު ކުރިން އެ ކުލަބު ދޫކޮށް ދާންޖެހުނީ މާލީ މައްސަލަތަކާ ގުޅިގެން ލަލީގާއިން އޭނާގެ އާ ކޮންޓްރެކްޓް ރަޖިސްޓަރީ ކޮށްދިނުމަށް ދެކޮޅުހެދުމުންނެވެ.

މީގެ އިތުރުންވެސް ތަފާތު ސަބަބުތަކާހުރެ ލަލީގާއާއި ބާސެލޯނާގެ ގުޅުން ވަނީ ގޯސްވެފައެވެ. ނަމަވެސް މެސީ އަލުން ބާސެލޯނާއަށް ގެނެވޭނެކަމުގެ ފެހި ސިގްނަލް ފުރަތަމަ ފަހަރަށް ލަލީގާގެ ރައީސް ހާވިއާ ޓަބޭސް މިހާރު ވަނީ ދީފައެވެ. އަދި ސްޕޭނުގެ ބައެއް ނޫސްތަކުން ބުނާގޮތުގައި ލަލީގާއިން ވަނީ މެސީ ހިމަނައިގެން ލީގު ޕްރޮމޯޓްކުރުމުގެ މަސައްކަތްވެސް ފަށައިފައެވެ.

ބާސެލޯނާއިން މިހާރު ތައްޔާރުވަމުންދަނީ މިއަދުގެ ވަގުތެއްގައި މެސީ އަލުން ގެނައުމުގެ ކުރާ މަސައްކަތުގައި މާލީގޮތުން ހުށަހަޅަންޖެހޭ ޕްލޭން ލަލީގާއަށް ހުށަހެޅުމަށެވެ. އެއީ ކުލަބުގެ ބައެއް ހަރު މުދާ ވިއްކައިގެންނާއި ކުޅުންތެރިން ވިއްކައިގެންނާއި ޕްރޮމޯޝަނަލް އިވެންޓްތަކުން ފައިސާ ހޯދާނެ ގޮތުގެ އައު ޕްލޭނެކެވެ. މި ޕްލޭނަށް ލަލީގާއިން އެއްބަސްވާނެކަމަށް ސްޕޭނުގެ ނޫސްތަކުން ބުނެއެވެ.

މެސީ އަލުން ގެނައުމަކީ ބާސެލޯނާގެ މިވަގުތުގެ އެންމެ މުހިންމު އަމާޒެވެ. ކުލަބުގެ ސަޕޯޓަރުންވެސް އެދެމުންދަނީ އެގޮތަށެވެ. އަދި ކުޅުންތެރިޔާވެސް ހުރީ އެނބުރި ބާސެލޯނާއަށް ބަދަލުވުމަށް ތައްޔާރަށެވެ.