މޯލްޑިވިއަންގެ ފްލީޓަށް އިތުރު 5 ބޯޓު އިތުރުކުރުމުގެ މަސައްކަތް އައިލެންޑް އޭވިއޭޝަނުން ފަށައިފިއެވެ.

މޯލްޑިވިއަންއިން ވަނީ އެ އެއާލައިންގެ ފްލީޓް އައު ކުރުމުގެ މަސައްކަތް ފަށާފައެވެ. މި މަސައްކަތުގެ ދަށުން މިހާރު 3 ބޯޓު ގެނެސް އޮޕަރޭޝަނަށް ނެރެފައެވެ. އައިލެންޑް އޭވިއޭޝަނުން ވަނީ އޭޓީއާރު 42-600 މަރުކާގެ 5 ބޯޓު ހޯދުމަށް އިއުލާނުކޮށްފައެވެ.

ރާއްޖެއެމްވީއަށް މައުލޫމާތުދެއްވަމުން އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ ވިދާޅުވީ މިއީ އެ އެއާލައިންގެ ޑޭޝް-8 ފްލީޓް އައުކޮށްލުމުގެ މަސައްކަތުގެ ތެރެއިން ހޯދުމަށް އިއުލާނުކޮށްފައިވާ ބޯޓުތަކެއް ކަމަށެވެ.

ޖެނިފާ ވިދާޅުވީ ފްލީޓް އައުކޮށްލެވުމަކީ މިހާރު ދިމާވަމުންދާ ވަރަށް ގިނަ މައްސަލަތަކަކަށް ހައްލު އަންނާނެ ކަމެއް ކަމަށެވެ. މިގޮތުން މެއިންޓެނެންސް ޚަރަދުވެސް ވަރަށް ބޮޑުތަނުން ކުޑަވެގެންދާނެ ކަމަށް ޖެނިފާ ވިދާޅުވިއެވެ. ޖެނިފާ އިތުރަށް ވިދާޅުވީ އެކުންފުނިން އަމާޒު ހިފާފައިވަނީ 2026 ނިމެންވާއިރަށް ފްލީޓް އެއްކޮށް އައުކޮށްލުމަށް ކަމަށެވެ.

މިހާތަނަށް އައިއިރު 3 ބޯޓު ފްލީޓަށް އިތުރުކޮށްފައިވީނަމަވެސް ކުރީގެ ބޯޓުތައް އަދި ވިއްކާނުލާ ކަމަށް އޭނާ ވިދާޅުވިއެވެ. އެހެންނަމަވެސް މިއީ ފޭސް އައުޓް މަރުހަލާ ކަަމަށް ޖެނިފާ ވިދާޅުވިއެވެ.

މޯލްޑިވިއަންގެ ފްލީޓް އައުކުރުމަށް 8 ބޯޓު ބޭނުންވާކަމަށް ޖެނިފާ މީގެ ކުރިން ވިދާޅުވިއެވެ. މި ބޯޓުތަކަކީ އެތެރޭގެ އުދުހުންތަކުގައި ބޭނުންކުރާނެ ބޯޓުތަކެކެވެ.