މި އަހަރުގެ މިހާތަނަށް ޖަލުގައި ބޭނުން ކުރި 431 ނަމްބަރު ބްލޮކްކޮށް، 10 އައީޕީ އާއި 12 ވެބްސައިޓް ބްލޮކްކޮށްފައިވޭ
18 އެޕްރީލު 2023 | އަންގާރަ 08:21365 އައިއެމްއީއައިއި ބްލެކްލިސްޓްކޮށްފައިވޭ
މާފުށި ޖަލު
މާފުށީ ޖަލުގައި ތިބޭ ގައިދީންނާއި ބަންދު މީހުން ސިއްރުން މޮބައިލް ފޯނުގެ ޒަރީއާއިން ކުރާ ކުށްތައް ހުއްޓުވުމަށް ދިވެހި ފުލުހުންގެ ޚިދުމަތާއި ކަރެކްޝަންސް ގުޅިގެން ގިނަ މަސައްކަތުގެ ތެރެއިން މި އަހަރުގެ މިހާތަނަށް ޖަލުގައި ބޭނުން ކުރި 431 ނަމްބަރު ބްލޮކްކޮށްފައިވާ ކަމަށް ހޯމް މިނިސްޓަރު ވިދާޅުވެއްޖެއެވެ.
މިނިސްޓަރު އެފަދައިން ވިދާޅުވީ އަންގާރަ ދުވަހުގެ ޖަލްސާގައި މާފަންނު މެދު ދާއިރާގެ މެންބަރު އިބްރާހީމް ރަޝީދު، މިނިސްޓަރ އޮފް ހޯމް އެފެއަޒް އައްޝައިޚް ޢިމްރާން ޢަބްދުاللهއާ ކުރައްވާފައިވާ ސުވާލަށް ލިޔުމުން ދެއްވި ޖަވާބުގައެވެ. އެ ޖަވާބު އިއްވަވާދެއްވީ މަޖިލީހުގެ އަމީންއާމެވެ. މެންބަރު އިބްރާހިމް ރަޝީދުގެ އެ ސުވާލުގައި މިދިޔަ އަހަރު ޖަލު ސަރަޙައްދުގައި ވަކިން ޚާއްޞަ އެންޓަނާއެއް ހަރުކުރިތޯ ސުވާލުކުރައްވާފައިވެއެވެ. އަދި އެފަދަ އެންޓަނާގެ ވަސީލަތުން ޖަލުގެ ގޮޅިތަކަށް ސިއްރުން ފޯނު ވައްދައިގެން އެކިއެކި ބޭންކްތަކާއި އެކިއެކި ޕްރޮމޯޝަންތަކުގެ ނަމުގައި ޢާންމު ރައްޔިތުންނަށް އޮޅުވާލައިގެން "ފައިސާ ފޭރޭ ކޯލް ސެންޓަރު" ހިންގަން ބޭނުންކުރާ ކަމަށާއި ބޭނުންކުރާ ފޯނު ނަންބަރުތަކުގެ މަޢުލޫމާތު ނެގޭގޮތަށް ހުރި ނަމަވެސް އެ މަޢުލޫމާތު ތަޙުޤީޤީ އިދާރާތަކާ ހިއްސާނުކުރާކަމުގެ މަޢުލޫމާތު ލިބޭ ކަމަށް އެ ސުވާލުގައި ވަނީ ވިދާޅުވެފައެވެ. އެ މަޢުލޫމާތު ކަމާބެހޭ އިދާރާތަކުން ހިއްސާ ކުރަން އެދިފައިވާނަމަ އެ މަޢުލޫމާތު ހިއްސާ ނުކުރަނީ ކީއްވެތޯ ސުވާލުކުރައްވާފައިވެއެވެ. އަދި ޖަލުތެރޭގައި ހިންގި ކަމަށް ބުނާ މިފަދަ ކޯލް ސެންޓަރު ހިންގުން ހުއްޓުވަން މިހާތަނަށް ކުރެވުނު މަސައްކަތަކީ ކޮބައިތޯ ވެސް ސުވާލުކުރައްވާފައިވެއެވެ.
ޖަވާބުގައި މިނިސްޓަރު ވިދާޅުވީ މި އަހަރުގެ މިހާތަނަށް 365 އައިއެމްއީއައިއީ ބްލެކްލިސްޓްކޮށް 10 އައީޕީ އާއި 12 ވެބްސައިޓް ބްލޮކްކޮށްފައިވާ ކަަމަށެވެ. އަދި އެފަދަ ގައިދީން ގެންގުޅޭ މުވާސަލާތީ ތަކެތި އަތުލުމާއި، އެ ގައިދީން ތިބޭ ގޮޅިތަކަށް ރެއިޑްކުރުމުގެ މަސައްކަތް ކުރިއަށްދާ ކަމަށެވެ.
މިނިސްޓަރު އިމްރާން ވިދާޅުވީ ކަރެކްޝަންސްގެ ބެލުމުގެ ދަށުގައި ތިބޭ ގައިދީންނާއި ބަންދު މީހުން ސިއްރުން މޮބައިލް ފޯން ބޭނުންކޮށްގެން ހިންގާ އެކިއެކި ކުށްތައް ހުއްޓުވުމަށް ކަރެކްޝަންސްއާއި ފުލުހުން އަދި ޓެލިކޮމިއުނިކޭޝަން އޮތޯރިޓީ ގުޅިގެން ކުރި މަސައްކަތުން މާފުށީ ޖަލު ސަރަހައްދުގައި މި އަހަރު އެންޓެނާއެއް ހަރުކޮށްފައިވާ ކަމަށެވެ. އަދި މާފުށި ޖަލު ހިމެނޭ ސަރަހައްދުގައި ބޭނުންކުރާ ފޯނުތަކުގެ މައުލޫމާތު އެއްކުރެވޭ ކަމަށެވެ. އެހެންނަމަވެސް އެ މައުލޫމާތުތައް ޖަމާކުރެވެނީ ނެޓްވޯކް އޮޕަރޭޓަރުންގެ ސަރވަރތަކަށް ކަމަށާއި، އެ މައުލޫމާތު ހޯދަން ޖެހެނީ އެ ފަރާތްތައް މެދުވެރިކޮށް ކަަމަށެވެ. އަދި ޖަލުގައި ގައިދީން ބޭނުން ކުރާ ނަމްބަރުތަކާއި އެހެނިހެން ނަމްބަރުތައް ވަކިކުރުމަށްޓަކައި މޯލްޑިވްސް ކަރެކްޝަނަލް ސަރވިސްގައި މަސައްކަތްކުރާ އޮފިސަރުންނާއި މުވައްޒަފުން ބޭނުންކުރާ ފޯނުތަކާއި އަދި ފޯނު ނަމްބަރާއި ގުޅޭ ހުރިހާ މައުލޫމާތެއް ފުލުހުންނާއި ހިއްސާކުރަމުންދާ ކަމަށް މިނިސްޓަރު ވިދާޅުވިއެވެ. އެފަދަ މައުލޫމާތަކަށް ބަދަލެއް އައިސްފިނަމަ އެ ބަދަލެއްގެ މައުލޫމާތު ވެސް ފުލުހުންނާއި ހިއްސާކުރަމުންދާ ކަަމަށް މިނިސްޓަރު ވިދާޅުވިއެވެ.
