އިމާރާތްކުރާއިރު ކުނި މެނޭޖުކުރެވޭނެ ގޮތް އަދިވެސް ނުހުރޭ، އެއީ ކަންބޮޑުވުމެއް: ވެމްކޯ
18 އެޕްރީލު 2023 | އަންގާރަ 05:43ގެ ދޮރުމަތިން ކުނި ނެގުމަކީ ޕްރިމިއަމް ޚިދުމަތެއްގެ ގޮތުގައި ހަމަޖައްސަން މަޝްވަރާ ކުރޭ
ވެމްކޯގެ މެނޭޖިން ޑިރެކްޓަރު ޔޫސުފް ސިރާޖު
މިހާރު އަލަށް އިމާރާތްކުރާ ތަންތަނުގައި ވެސް ކުނި މެނޭޖްކުރެވޭނެ ގޮތް ހަމަޖައްސާފައި ނުހުންނަ ކަމަށާއި އެއީ ވަރަށް ބޮޑު ކަންބޮޑުވުމެއް ކަަމަށް ވޭސްޓް މެނޭޖްމެންޓް ކޯޕަރޭޝަން (ވެމްކޯ)އިން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ވެމްކޯގެ މެނޭޖިން ޑިރެކްޓަރު ޔޫސުފް ސިރާޖް ވިދާޅުވީ މާލޭގައި ކުނި ނެގުމުގެ ޚިދުމަތް ދޭ ގޮތަށް ބަލާއިރު އެއީ ދުނިޔޭގެ އެހެން ތަންތަނާއި އަޅާބަލާއިރު ވަރަށް ތަފާތުކޮށް ދޭ ޚިދުމަތެއް ކަމަށެވެ. އެގޮތުން ދުނިޔޭގެ އެހެންތަންތަނުގައި އިމާރާތްކުރާ އިރު ކުނި ނަގަން ފަސޭހަ އިންތިޒާމްތައް ހަމަޖެހިފައި ހުރި ނަމަވެސް ރާއްޖޭގައި ތަންތަން އިމާރާތްކޮށްފައި ހުރި ތަންތަން އިމާރާތްކޮށްފައި ހުރީ އެފަދަ ކަމަކަށް ވިސްނުން ބަހައްޓައިގެން ކަމަށް އޭނާ ވިދާޅުވިއެވެ. އަދި އަލަށް އިމާރާތްކުރާ ތަންތަނުގައި ކުނި މެނޭޖް ކުރެވޭނެ ގޮތެއް ހުރުން ލާޒިމް ކުރި ނަމަވެސް އެކަން އެގޮތަށް ނުކުރާ ކަމަށް ސިރާޒް ވިދާޅުވިއެވެ.
ސިރާޖް ވިދާޅުވީ އެކަން އެގޮތަށް ކުރަނީ ކުނި މެނޭޖްކުރުމާއި ކުންޏަށް ޒިންމާވުމަކީ ކުރަން ޖެހޭ ކަމެއްކަން ގިނަ މީހުންނަށް ބަލައި ނުގަނެވޭތީ ކަމަށެވެ. އެހެންނަމަވެސް ކުނީގެ މައްސަލަ އަށް ދުރު ރާސްތާގައި ވެސް ހައްލު ލިބޭނީ އެ ވިސްނުން ބަދަލުވެގެން ކަަމަށް އޭނާ ވަނީ ވިދާޅުވެފައެވެ. މީގެ އިތުރުން މާލޭގައި މަގުމަތީގައި ކުނި ބަހައްޓާ މައްސަަލަ އަށް ހައްލު ހޯދުމުގެ ގޮތުން ކޮމިއުނަލް ބިންތަކެއް ކަނޑައަޅާ އެތަންތަނަށް ކުނި އެޅުމުގެ އިންތިޒާމް ހަމަޖައްސާދިނުމަށް ވިސްނުން ގެންގުޅުއްވާ ކަމަށް އޭނާ ވަނީ ވިދާޅުވެފައެވެ. ސިރާޖް ވިދާޅުވީ ކުނި މެނޭޖްކުރުމުގެ މަސައްކަތް އިތުރަށް ހަރުދަނާ ކުރުމަށް އިދާރާތަކާއި ގުޅިގެން ކުރަން ހުރި މަސައްކަތްތައް ގިނަ ކަމަށެވެ. އޭގެ ތެރޭގައި ރެގިއުލޭޓަރީ ގޮތުން ކުރަން ހުރި މަސައްކަތްތައް ވެސް ގިނަ ކަމަށް އޭނާ ވިދާޅުވިއެވެ.
މި ހިނގާ އެޕްރިލް މަހުން ފެށިގެން ކުނި ނަގާނީ، ގޭބީސީތަކުގެ ތިރިންކަމަށް ވެމްކޯ އިން ވަނީ ނިންމާފައެވެ. ކުރިއަށް އޮތްތަނުގައި ގޭގެ ދޮރުމަތިން ކުނި ނެގުމަކީ ޕްރިމިއަމް ޚިދުމަތެއްގެ ގޮތުގައި ހަމަޖައްސައި އެކަމަށް ވަކި ރޭޓުތަކެއް ތައާރަފުކުރުމަށް ނިންމާފައިވާކަމަށާއި އެކަމަށްޓަކައި ނަގާނެ އަގުތަކާމެދު ދަނީ މަޝްވަރާކުރަމުން ކަމަށް ވެމްކޯ އިން ބުނެއެވެ.
އަދި ވެމްކޯގެ ބައެއް ޚިދުމަތްތަކުގެ އަގަށް ބަދަލުގެނެސްފައިވާއިރު އަގުތަކަށް ގެނައި ބަދަލުތަކުގެތެރޭގައި ދައުލަތުގެ އިދާރާތަކާއި ސަރުކާރު ހިއްސާވާ ކުންފުނިތަކުން ޓަނަކަށް 2560 ރުފިޔާ ނެގުމާއި، ޕްރައިވެޓް ކޮމަރޝަލް ކަލެކްޓަރސްގެ ފަރާތުން ޓަނަކަށް 2660 ރުފިޔާ ނެގުން ހިމެނެއެވެ. ހަމައެހެންމެ އަމިއްލަ ފަރާތްތަކުން ޓްރާންސްފަރ ސްޓޭޝަނަށް ގެންނަ ކުންޏަށް، ޓަނަކަށް 1060 ރުފިޔާ ނަގާގޮތަށް ވަނީ ހަމަޖައްސާފައެވެ. އަދި ކުނި ވަކިނުކޮށް ގެންނަ ފަރާތްތަކުން 1000 ރުފިޔާ ނަގާގޮތަށް ނިންމާފައިވެއެވެ.
