އަދިވެސް ހަމަ އެހާ އިސްރާފު ބޮޑު

ރޯދަމަހާއެކު ދިވެހިންގެ ދިރިއުޅުމަށް ވަރަށް ބޮޑެތި ބަދަލުތަކެއް އާދެއެވެ. އެންމެ ބޮޑު ބަދަލެއް އަންނަނީ ކެއިންބުއުމުގެ އަދާއަށެވެ. ބައެއް މީހުން ވަރަށް ރަނގަޅަށް ކެއުމުގެ އިންތިޒާމްތައް ހަމަޖެއްސި ނަމަވެސް އަނެއްބައި މީހުންނަކީ އެއްވެސް ވަރަކަށް ބަލައިނުލާ ކާބޯތަކެތި ތައްޔާރު ކުރާ މީހުންނެވެ. ރޯދަ ވީއްލާ ވަގުތަށް ތައްޔާރު ކުރާ ގިނަ ކާބޯތަކެތި ހުސްނުވެ އުކާލަންޖެހޭ ދުވަސްތައް ގިނައެވެ.

މިއީ ވަރަށް ދެރަކަމެކެވެ. މާތްވެގެންވާ މަހެއްގައި ކުރެވޭ ނުބައި އަމަލެކެވެ. އިންސާނުންނަށް މިއަދު ކުރިމަތިވެފައިވާ އިޖްތިމާއީ ބަލިތަކުގެ ތެރޭގައި ފާސިގުކަމާއި އިސްރާފުކުރުން ހިމެނޭއިރު މި މާތް މައްސަރުގައި އާއްމުކޮށް ކުރެވޭ ބައެއް އިސްރާފުތައް ދެނެގަތުމަކީ މުހިއްމު ކަމެކެވެ. އެހެންކަމުން ގޭގައި ތައްޔާރު ކުރާ ކާބޯތަކެތި ހުސްވާ މިންވަރަށް ތައްޔާރު ކުރުމަކީ މުހިންމު ކަމެކެވެ. އަދި ގެއިން ބޭރަށް ރޯދަ ވީއްލުކަމަށް ދިޔަ ނަމަވެސް ހުސްވާ މިންވަރަށް އޯޑަރު ނެގުމަށް ސަމާލުވާންޖެހެއެވެ.

މާލެސިޓީގެ ރެސްޓޯރެންޓްތަކުގެ ރޯދަ ވީއްލުންތަކަށް ބަލާއިރު، އެންމެ މީހަކަށް 4 ވައްތަރު ނުވަތަ 2 ވައްތަރެއްގެ ފަނި ތަށި ގެނެއެވެ. މިހެން ގެނައުމުން ގިނަ ފަހަރު ވަނީ އިސްރާފަށެވެ. ރޯދަ ވީއްލާ ވަގުތަށްވުމާއެކު، ގިނައިން ކެއުމަށް ހިތް އެދުނު ނަމަވެސް މާއަވަހަށް ބަނޑު ފުރެއެވެ. އެހެންކަމުން ގެންނަ ގިނަ ކާއެއްޗެހިތައް ހުސްނުކުރެވި ޖެހެނީ ދާށެވެ. މިއީ ކުރެވޭ ވަރަށް ބޮޑު އިސްރާފެކެވެ.

މާލެ ސަރަހައްދުގައި އުފެދޭ ކުނި ވެމްކޯއިން އުކާލުމުގެ މަސައްކަތް ކުރަމުންދާއިރު، ކުނިވާޒާތުގެ ގިނަ އަދަދެއްގެ ކުނި ކޮންމެ ދުވަހަކު ވެސް އުކާލަންޖެހެއެވެ. މި ރޯދަ މަހު މިއަދަދު ވަރަށް ބޮޑަށް ވަނީ އިތުރުވެފައެވެ. އެހެން މަސްތަކާ އަޅާބަލާއިރު، މި ރޯދަ މަހު ގާތްގަނޑަކަށް 15 އިންސައްތައާއި 25 އިންސައްތައަށް ކުނި އުކާލަންޖެހޭ މިންވަރު ވަނީ އިތުރުވެގެން ގޮސްފައެވެ.

މިމައްސަލައާ ގުޅޭގޮތުން ރާއްޖެއެމްވީއަށް ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވެފައިވަނީ ރޯދަ މަހު އިސްރާފުކުރާ މިންވަރު ވަރަށް ބޮޑަށް އިތުރުވެފައިވާކަން ފާހަގަކުރެވޭ ކަމަށެވެ. ގިނަ ގޭބިސީތަކުން ވެސް ގިނަ އަދަދެއްގެ ކާބޯތަކެތި އުކާލާކަން އޭނާ ފާހަގަކުރެއްވިއެވެ.

އިސްރާފަކީ ކޮންމެ ކަމެއްގައި ވެސް ހައްދުފަހަނަޅައި ދިއުމެވެ. ކީރިތި ގުރުއާނާ ރަސޫލާގެ ސުންނަތުން އެނގޭ ގޮތުގައި އެއީ ބޮޑުވެގެންވާ ނުބައި ކަމެކެވެ. އިސްރާފުކުރާ މީހުން ދެކެ ﷲ ސުބްހާނަހޫ ވަތަޢާލާ ލޯބިވެވޮޑިގެނެއް ނުވެއެވެ. އެއީ ޝައިތާނާގެ އަމަލެކެވެ. އަދި އެއީ އޭގެ ސަބަބުން ސިއްހީ އަދި މާލީ ގެއްލުން މުޖްތަމައަށް ފޯރާނެ ކަމެކެވެ. އަދި ކެއިންބުއިމުގައި އިސްރާފުކުރުމަކީ އިންސާނާއަށް ވަރަށް ބޮޑެތި ގެއްލުންތަކެއް ލިބިދާނެ ކަމެކެވެ. އެކަމުގެ ސަބަބުން އޭނާއަށް އެތައް ބަލިތަކެއް ޖެހިދާނެ ކަމެއް ކަމެކެވެ. އެހެންކަމުން އިސްރާފުކުރުމުން ދުރުވާންޖެހެއެވެ.

ނަމަވެސް ވެމްކޯއިން ހާމަކޮށްފައިވާ މައުލޫމާތަށް ބަލާއިރު، މިމުޖުތަމައުގައި އިސްރާފު އޮތް މިންވަރު ހާމަވެގެންދެއެވެ. މިހާ ތަހުޒީބީ ޒަމާނެއްގައި މިހާ ބޮޑަށް ދިވެހިންގެ ތެރޭގައި އިސްރާފު ކުރުމުގެ އާދަ ހިފުމަކީ ވަރަށް ދެރަކަމެކެވެ. އެހެންކަމުން ކޮންމެ މީހަކު ވެސް މިކަމަށް ވިސްނައި މިކަން އިސްލާހު ކުރަންޖެހެއެވެ. ބަނޑުހައިވީ ނަމަވެސް ކާބޯތަކެތި ތައްޔާރު ކުރުމުގައި ލިމިޓެއް ގެންގުޅެން ޖެހެއެވެ. މިހާ އިސްރާފު ބޮޑުވުމަކީ އެއްވެސް ގޮތަކަށް ކަމުދާ ކަމެއް ނޫނެވެ.