ރަޝިއާގެ ރައީސް ޗައިނާގެ ޑިފެންސް މިނިސްޓަރާ ބައްދަލުކުރައްވައިފި

ރަޝިއާގެ ރައީސް ވްލެޑިމިއަރ ޕުޓިން ޗައިނާގެ ޑިފެންސް މިނިސްޓަރު ލީ ޝަންގްފޫއާ ބައްދަލުކުރައްވައިފިއެވެ.

މި ބައްދަލުވުން ކުރިއަށްދިޔައީ އާދިއްތަ ދުވަހު ރަޝިއާގެ ވެރިރަށް މޮސްކޯގައެވެ. މިއީ ދެ ޤައުމުގެ އަސްކަރީ ގުޅުން އިތުރަށް ބަދަހި ކުރުމަށް ޗައިނާގެ ޑިފެންސް މިނިސްޓަރު ރަޝިއާއަށް ކުރައްވާ ދަތުރުފުޅެކެވެ. އެ ދެ ޤައުމުގެ ގުޅުން ސިފަ ކޮށްފައިވަނީ "ނޯ ލިމިޓް" ނުވަތަ ލިމިޓެއް ނެތް ޕާޓްނަރޝިޕެއްގެ ގޮތުގައެވެ.

ރަޝިއާގެ ރައީސް އާއި ޗައިނާގެ ޑިފެންސް މިނިސްޓަރުގެ މި ބައްދަލު ކުރެއްވުމުގައި ރަޝިއާގެ ޑިފެންސް މިނިސްޓަރު ސަރގެއި ޝޮއިގޫ ވެސް ބައިވެރިވަވަޑައިގެންނެވިއެވެ.

މި ބައްދަލު ކުރެއްވުމުގައި ޕުޓިން ވަނީ ދެ ޤައުމުގެ ގުޅުން އިތުރަށް ބަދަހި ކުރުމަށް ކުރަމުން އަންނަ މަސައްކަތް ރަނގަޅަށް ކުރިއަށްދާ ކަމަށް ވިދާޅުވެފައެވެ. އެގޮތުން، އަސްކަރިއްޔާގެ އިތުރުން އިގްތިސާދީ ގޮތުންނާއި އިޖުތިމާއީ ގޮތުންނާއި ތައުލީމީ ދާއިރާއިން ވެސް ގުޅުން ބަދަހި ކުރުމަށް ނިންމާފައިވާ ކަމަށް ޕުޓިން ވިދާޅުވިއެވެ.

ޕުޓިން، ޗައިނާގެ ޑިފެންސް މިނިސްޓަރާ ބައްދަލުކުރައްވާފައިވާއިރު މިދިޔަ މަހު އެމަނިކުފާނު ވަނީ ޗައިނާގެ ރައީސް ޝީ ޖިންޕިންގއާ ވެސް ބައްދަލު ކުރައްވާފައެވެ.