"ރަންތާޖު" ޤުރުއާން މުބާރާތުގެ ބައިވެރިންނަށް އިސްލާމިކް މިނިސްޓްރީގެ ފަރާތުން ރޯދަވީއްލުމެއް ދީފިއެވެ.

ހޮނިހިރު ދުވަހު ދިން އެ ރޯދަ ވީއްލުން ބާއްވާފައި ވަނީ މާގިރި ހޮޓެލްގައެވެ. އެ ރޯދަވީއްލުމަށް ދިޔަ ރަންތާޖު ޤުރުއާން މުބާރާތުގެ ބައިވެރިންނަށް މަރުޚަބާ ވިދާޅުވެފައި ވަނީ އިސްލާމިކް މިނިސްޓްރީގެ އިސް ފަރާތްތަކުންނެވެ.

މުބާރާތުގެ ކުރިއަށް އޮތް ބުރަށް ދަތުރުކުރާ ބައިވެރިންގެ ތެރޭގައި ހިމެނެނީ ޔައީޝް މުހައްމަދު ނިޔާޒް، މާލެ, މުހައްމަދު ސާއީ މުބާރިކް، ނ. ހޮޅުދޫ, އަބްދުﷲ ތާލިބު، މަރަދޫ, އަހުމަދު ސުޖާއު، ހއ. ހޯރަފުށި, މުހައްމަދު މުސްތަފާ، ބ. އޭދަފުށި, ދަހްލާން މުހައްމަދު ރިޒާ، ށ. ފުނަދޫ, މަރިޔަމް އަރީން އީސާ، ކ. ކާށިދޫ, މަރިޔަމް ޒަހުވާ އާދިލް، މާލެ, ފާތިމަތު ތުގާ ހަލީމް، މާލެއެވެ.

ރަމަޟާން މަހުގެ ކޮންމެ ހުކުރު ދުވަހެއްގެ ރޭ 9:30ގައި ރާއްޖެ ޓީވީން ގެނެސްދޭ މި މުބާރާތަކީ އަގުހުރި އިނާމްތަކަކާއެކު ކުރިއަށްގެންދާ ޕްރޮގްރާމެކެވެ. އެގޮތުން މުބާރާތުގެ އެއްވަނައަށް ދާ ފަރާތަކަށް 3 ލައްކަ ރުފިޔާ، ދެވަނައަށް ދާ ފަރާތަކަށް 1 ލައްކަ ރުފިޔާ، އަދި ތިންވަނައަށް ދާ ފަރާތަކަށް 75000 ރުފިޔާ ލިބޭނެއެވެ. ރާއްޖެ ޓީވީއާއި ޔޫތު މިނިސްޓްރީ އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މި ޕްރޮގްރާމް ކުރިއަށް ދަނީ 6 އެޕިސޯޑަށް ބަހާލައިގެންނެވެ.