އަރަބް އިސްލާމިކް އެމެރިކަން ސަމިޓްގައި ރައީސް ތަގުރީރު ނުކުރައްވާ!
21 މެއި 2017 | އާދީއްތަ 22:43މީގެކުރިން ސަމިޓްގައި ރައީސް އަބްދުﷲ ޔާމީން ތަޤުރާރުކުރައްވާނެކަން ރައީސް އޮފީހުން ހާމަކޮށްފައިވޭ
އަރަބް އިސްލާމިކް އެމެރިކަން ސަމިޓްގައި ރައީސް ޔާމީން ބައިވެރިވަޑައިގަންނަވަނީ
ސައުދީ އަރައްބިއްޔާގެ ރިޔާދުގައި ބޭއްވި އަރަބް އިސްލާމިކް އެމެރިކަން ސަމިޓް ގައި ރައީސް އަބްދުﷲ ޔާމީނު ކުރިން ވާހަކަފުޅު ދައްކަވާނެ ކަމަށް އިއުލާނުކުރި ނަމަވެސް ރައީސް ވާހަކަފުޅު ނުދައްކަވަނީސް ސަމިޓް ނިމިއްޖެކަން ސައުދީ އަރަބިއްޔާގެ ރަސްގެފާނު އިއުލާން ކުރައްވައިފިއެވެ.
ރައީސުލްޖުމްހޫރިއްޔާ އަބްދުﷲ ޔާމީން ސައުދީ އަރަބިއްޔާއަށް ކުރައްވާ މި ދަތުރުފުޅަކީ ސައުދީގެ ރަސްގެފާނު ސަލްމާނު ބިން އަބްދުލްއަޒީޒް އާލް ސައޫދުގެ ދައުވަތަކަށް ކުރައްވާ ދަތުރުފުޅެއް ކަމަށް ރައީސް އޮފީހުން ބުނެ އެވެ. ރައީސް ސައުދީއަށް ފުރާވަޑާއިގެންނެވި ކަން އިއުލާނުކޮށް ހޮނިހިރު ދުވަހު ރައީސް އޮފީހުގެ ވެބްސައިޓުގައި ހާމަކޮށްފައިވާ ގޮތުގައި އަރަބް އިސްލާމިކް އެމެރިކަން ސަމިޓްގައި ރައީސް ތަގުރީރު ކުރައްވާނެ ކަމަށާއި ތަގުރީރު ކުރެއްވުމަށް ހަމަޖެހިފައިވަނީ އާދިއްތަ ދުވަހުގެ ހަވީރުގެ ވަގުތެއްގައިކަމަށް ބުނެފައިވެއެވެ.
ރައީސް އޮފީހުގެ އިތުރުން ސަރުކާރުގެ ރަސްމީ މީޑިއާ، ޕީއެސްއެމް އިން ވެސް ރައީސް އަބްދުﷲ ޔާމީންގެ ތަގުރީރު ވަގުތުން ގެނެސްދޭނެ ކަމަށް ބުނެ އާދިއްތަ ދުވަހުގެ އިރާކޮޅުވަނީ ޓްވީޓްވެސް ކޮށްފައެވެ.
ސައުދީ އަރަބިއްޔާއިން ބުނެފައިވަނީ މި ސަމިޓްގައި 55 ގައުމެއްގެ އެންމެ މަތީ ވެރިން ބައިވެރިވެ ވަޑައިގެންނެވި ކަމަށެވެ.
ޖަލްސާގެ މަންޒަރުތައް ވަގުތުން ދުރައް ދައްކަމުން ދިޔައިރު ޖަލްސާގައި ރައީސް ޔާމީން އާއި އަރިހުގައި ވަޑައިގެންނެވި ވަފްދުގެ ބޭފުޅުން ޖަލްސާކުރާ މާލަމުން ފެނިގެން ގޮސްފައިވެއެވެ.
ޖަލްސާގެ ރިޔާސަތު ބެލެހެއްޓެވި ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް ސަމިޓް ނިމުނުކަން އިއުލާން ކުރެއްވި އިރު ދުނިޔޭގެ ބައެއް ގައުމުތަކުގެ އިސްވެރިން ވަނީ ސަމިޓްގައި ވާހަކަފުޅު ދައްކަވާފައެވެ. އޭގެ ތެރޭގައި އެންމެ ފާހަގަ ކުރެވިގެން ދިޔައީ އެމެރިކާގެ ރައީސް ޑޮނަލްޑް ޓްރަމްޕްގެ ވާހަކަ ފުޅެވެ. އޭގެ އިތުރުން އުރުދުންގެ ރަސްގެފާނާއި، މިސްރުގެ ރައީސްވެސް ސަމިޓްގައި ވާހަކަފުޅު ދެއްކެވިއެވެ.
ސަމިޓް ހުޅުއްވައިދެއްވުމުގެ ގޮތުން ސައުދީ އަރަބިއްޔާގެ ރަސްގެފާނު ދެއްކެވި ވާހަކަފުޅުގައި ޓެރަރިޒަމްއާ، ހައްދުފަހަނަ އަޅާ ދިއުމާ ދެކޮޅަށް ކުރެވޭ މަސައްކަތުގައި ސަރަހައްދުގެ ގައުމުތަކަށް އެމެރިކާއިން ދޭ އެހީތެރިކަން ފާހަގަ ކުރެއްވާ ތައުރީފް ކުރެއްވިއެވެ.
ޖަލްސާގައި ވާހަކަފުޅު ދެއްކެވި ބޭފުޅުންވަނީ އިސްލާމް ދީނަކީ، ހައްދު ފަހަނަ އަޅާ ދިއުމާ ގުޅުމެއް އޮތް ދީނެއް ނޫންކަން ފާހަގަ ކުރައްވާ ވާހަކަފުޅު ދައްކަވާފައެވެ.
