"ރަންތާޖު" ޤުރުއާން މުބާރާތުގެ ބައިވެރިންނަށް ނައިބުރައީސް ތަރާވީހެއް ދެއްވައިފި
16 އެޕްރީލު 2023 | އާދީއްތަ 08:12ހޮނިހިރު ދުވަހުގެ ރޭ އޮތް އެ ތަރާވީހުގައި ރަންތާޖު މުބާރާތުގެ 9 ބައިވެރިން ވަނީ ބައިވެރިވެފަ
"ރަންތާޖު" ޤުރުއާން މުބާރާތުގެ ބައިވެރިންނަށް ނައިބުރައީސް ތަރާވީހެއް ދެއްވައިފި
"ރަންތާޖު" ޤުރުއާން މުބާރާތުގެ ބައިވެރިންނަށް ނައިބުރައީސް ފައިސަލް ނަސީމްގެ ފަރާތުން ޚާއްސަ ތަރާވީހެއް ދެއްވައިފިއެވެ.
އެ ތަރާވީސް ބާއްވާފައި ވަނީ ހިލާލީގޭގައެވެ. ހޮނިހިރު ދުވަހުގެ ރޭ އޮތް އެ ތަރާވީހުގައި ރަންތާޖު މުބާރާތުގެ 9 ބައިވެރިން ވަނީ ބައިވެރިވެފައެވެ. ނައިބުރައީސް އެ ބައިވެރިންނާއި ބައްދަލުކުރައްވާ ދެއްކެވި ވާހަކަފުޅުގައި ޤުރުއާން މުބާރާތުގައި ކުރިއަށް ދިއުމަށާއި، މުބާރަތުގައި ކާމިޔާބު ހޯދުމަށް މަސައްކަތް ކުރުމަށް ޢިލްތިމާސްކުރެއްވިއެވެ.
ނައިބުރައީސް ވަނީ އިޖުތިމާއީ ބައެއް ކަންކަމާއި ބެހޭ ގޮތުން ވެސް ބައިވެރިންނާއި ވާހަކަދައްކަވާފައެވެ. އެގޮތުން ޓްރެފިކްގެ މައްސަލަތައް ފަދަ އާއްމު މަސްލަހަތާއި ގުޅޭގޮތުން ރަނގަޅު ގޮތް އިޚުތިޔާރުކުރުމަށް ބައިވެރިންނަށް ނަސޭހަތްތެރިވެވަޑައިގެންނެވިއެވެ.
އެ ތަރާވީހުގައި ރަންތާޖު މުބާރާތުގެ ބައިވެރިންގެ އިތުރުން މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ އާއި ރާއްޖެޓީވީގެ އިސް ބައެއް ބޭފުޅުން ބައިވެރިވެވަޑައިގެންނެވިއެވެ.
ހަ އެޕިސޯޑަށް ބަހާލައިގެން ކުރިއަށްގެންދާ ރަންތާޖު މުބާރާތުގެ އެއްވަނައަށް ދާ ފަރާތަކަށް ތިން ލައްކަ ރުފިޔާ، ދެވަނައަށް ދާ ފަރާތަކަށް އެއް ލައްކަ ރުފިޔާ، އަދި ތިންވަނައަށް ދާ ފަރާތަކަށް 75000 ރުފިޔާ ލިބޭނެއެވެ. މިއީ ރާއްޖޭގައި މިހާތަނަށް ބާއްވާ އެންމެ އަގުބޮޑު ޤުރުއާން މުބާރާއެވެ.
މުބާރާތުގެ ބައިވެރިންނަށް އިނާމު ހުށަހެޅުމުގެ ފުރުސަތު ވަނީ ހުޅުވާލާފައެވެ. އަދި މުބާރާތާއި ވަކިވެގެންދާ ފަރާތްތަކަށް ވެސް ގިނަ އިނާމުތަކެއް ލިބޭނެއެވެ.
16 އަހަރާ 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މި މުބާރާތަކީ މިހާތަނަށް ރާއްޖޭގައި ބާއްވާ މިފަދަ އެންމެ ބޮޑު މުބާރާތެވެ. މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.
