500 ރުފިޔާއާއި ފޯނެއް ވަގަށް ނެގުމުން، 640 ގަޑިއިރު މުޖުތަމައަށް ޚިދުމަތް ކުރުމާއެކު، 24 ދުވަހުގެ މުއްދަތަށް ޖަލަށް
ދައުލަތުން އުފުލާފައިވަނީ ވައްކަން ކުރުމުގެ ކުށުގެ ދައުވާ
ކްރިމިނަލް ކޯޓް
500 ރުފިޔާއާއި ފޯނެއް ވަގަށް ނެގި މީހަކު 640 ގަޑިއިރު މުޖުތަމައަށް ޚިދުމަތް ކުރުމާއެކު، 24 ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ދައުލަތުން އުފުލާފައިވަނީ ވައްކަން ކުރުމުގެ ކުށުގެ ދައުވާއެވެ. އެއީ ދައުވާލިބޭ މީހާ 2022 އޮކްޓޯބަރު 19 ވަނަ ދުވަހު މާލޭ ކަލަފާނު ހިނގުމުގައި ހުންނަ ނޭޝަނަލް ސެންޓަރ ފޯރ އިންފޮމޭޝަން ޓެކްނޮލޮޖީ (އެންސީއައިޓީ) އަށް ވަދެ، އެތަނުގައި ހުރި މޭޒެއްގެ ވަތްގަނޑުގައި އޮތް 500 ރުފިޔާއާއި، ސެމްސަންގ ބްރޭންޑުގެ މޯބައިލް ފޯނެއް ވަގަށް ނަގާފައިވާތީއެވެ.
ދައުލަތުން ދައުވާ އިއްވުމުން އެ މީހާ ވަނީ ދައުވާއަށް އިއުތިރާފުވެފައެވެ. ވުމާއެކު މި މައްސަލައިގައި ކުރިއަށް ގެންދިޔައީ އަވަސްނިޔާގެ އަޑުއެހުމެކެވެ.
އަވަސްނިޔާގެ އަޑުއެހުމުގައިވެސް އޭނާ އިއުތިރާފު ދަމަހައްޓާފައިވާތީ އެއީ ސައްޙަ އިއުތިރާފެއްކަމަަށް ކަނޑައަޅުއްވައި، ގާޒީ ވަނީ އޭނާގެ މައްޗަށް ކުށް ސާބިތުވާކަމަށް ކަނޑައަޅުއްވާފައެވެ.
އަދަބު ކަނޑައަޅުއްވަމުން ގާޒީ ވަނީ އެ މީހާ 4 މަހާއި 24 ދުވަހަށް ޖަލަށް ލުމަށް ޙުކުމް ކުރައްވައި، އޭނާގެ އިއުތިރާފާއި ދައުލަތުން ފާހަގަކޮށްފައިވާ ކަންކަމުގެ އިތުރުން، ޤާނޫނުލްއުޤޫބާތަށް ރިއާޔަތްކޮށް އެ މީހާ ތަންފީޒު ކުރަން ޖެހޭ އަދަބަކީ 640 ގަޑިއިރު މުޖުތަމައަށް ޚިދުމަތް ކުރުމާއެކު، 24 ދުވަހުގެ މުއްދަތުގެ ޖަލު ޙުކުމެއްކަމަށް ކަނޑައަޅުއްވާފައެވެ.
ކްރިމިނަލް ކޯޓުގައި މި މައްސަލަ ނިންމެވީ ގާޒީ ހުސައިން ފާއިޒް ރަޝާދެވެ.
