ޓަޔަރު ހަމުގައި، އޮއިބާރު ކޯރު ހުރަސްކުރާ ހިތްވަރުގަދަ ޓީޗަރުންނަށް ސެލިއުޓް ހައްގު!

ތިބާ ބޭނުން ކަމެއް ކުރުމަށްޓަކައި ކަނޑުފަތާފައި ނަމަވެސް އެކަމެއް ކުރާނަމޭ އާންމުކޮށް ބުނެއުޅެނީ ގަދަ ބަހެއްގެ ގޮތުގައެވެ. ހާލަތު މަޖުބޫރުކުރުވާ ކަމެއްގެ ސަބަބުން، ކަނޑުފެތުންފަދަ ގޮންޖެހުމަކާ ކޮންމެ ދުވަހަކުވެސް ކުރިމަތިލާ ބަޔަކު އުޅޭކަން ދެނަހުރީ ތިޔައިގެތެރެއިން ކިތައް މީހުންބާއެވެ؟ ދައްކަން މިއުޅެނީ އަފްޣާނިސްތާނުގައި މަސައްކަތްކުރާ، ހިތްވަރުގަދަ ޓީޗަރުންތަކެއްގެ ވާހަކައެވެ. ބިއްލީ ހައިސްކޫލްގެ ޓީޗަރުން ކޮންމެ ދުވަހަކުވެސް ސްކޫލަށް ދަނީ ކޯރު ހުރަސްކޮށްފައެވެ. ފަތާފައި ނޫނެއްކަމަކު، ބޯޓެއް ނުވަތަ ފެރީއެއްގައެއްވެސް ނޫނެވެ. އެ ޓީޗަރުންގެ އޮޑިއަކީ ޓަޔަރު ހަމެވެ.

46 މީޓަރު ފުޅާ، އޮއެވަރު ބާރު ކޯރުގެ އެއް ފަރާތުން އަނެއް ފަރާތަށް ހުރަސްކޮށް، ސްކޫލަށް އައިސް ގޮސް ހެދުމަށްޓަކައި ޓަޔަރު ހަން ބޭނުންކުރުން ފިޔަވައި އެހެން ގޮތެއް އޮތްނަމަ، އަމިއްލަ ފުރާނަ އަތްމައްޗަށްލައިގެން އެ ޓީޗަރުންވެސް އެފަދަ ދަތުރެއް ނުކުރީސްކަން ޔަގީނެވެ.

ކޯރުގެ އެއްފަރާތުން އަނެއް ފަރާތަށް ހުރަސްކުރާނެ ފާލަމެއް ނުވަތަ ބުރިޖެއް ނެތެވެ. ނުވިތާކަށް، ބާ ބޯޓުގަނޑެއްހާ ހިސާބުވެސްނެތެވެ. ޓަޔަރު ހަމުގައި ކޯރު ހުރަސްކުރުމުގެ ބިރުވެރި ދަތުރު ކުރާތާ މިހާރު އެތައް އަހަރެއް ފާއިތުވެއްޖެއެވެ. ގަދަވިއްސާރައާއެކު ބޮޑުވާ ކޯރުގެ ފެންގަނޑާއި އޮޔަށް އަންނަ ބަދަލުތަކަށްވެސް ބެލުމެއްނެތި ދަތުރުކުރަނީއެވެ. ސްކޫލުގައި ތިބި 15 މުވައްޒަފުންގެ ތެރެއިން 12 މީހުންގެ ހާލަކީ އެއީއެވެ.

މި ޓީޗަރުންގެ އެދުރުކަމުގެ ދަށުގައި ބިއްލީ ހައިސްކޫލްގައި 1040 ދަރިވަރަކު ދަނީ ތައުލީމު ހާސިލުކުރަމުންނެވެ. އޭގެ ތެރޭގައި، ޕްރައިމަރީ ގްރޭޑްތަކުގައި ކިޔަވާ އަންހެން ދަރިވަރުންވެސް ހިމެނެއެވެ.

ބިއްލީ ހައިސްކޫލް ހުޅުވީ 2004 ވަނަ އަހަރުއެވެ. ނަމަވެސް، ބޭނުންކުރާ ވަރަށް ސްކޫލުގެ އުމްރާނީ ހާލަތު ގޯސްކަމަށް، އަފްޣާނިސްތާނުގެ އޭރުގެ ތައުލީމާބެހޭ ވުޒާރާއިން އަންގަން ނެގީ އެންމެ 3 އަހަރު ދުވަހެވެ. އެ ސްކޫލްގައި މިއަދު ހުރީ އެންމެ 3 ކުލާސްރޫމެވެ. ގިނަ ކުލާސްތައް އޮންނަނީ ހާމަ ބިމުގައެވެ.

ނޫރު ރަހްމާނަކީ ޕަޝްޓޯ ބަސް އުނގަންނައިދިނުމުގެ މަސައްކަތުގައި ބިއްލީ ހައިސްކޫލްގައި 15 އަހަރު ހޭދަކޮށްފައިވާ ޓީޗަރެކެވެ. ނޫރު ވަނީ ސްކޫލު އޮތް ހާލަތު ބަޔާންކޮށްދީފައެވެ.

ނޫރުފަދަ އެހެން ޓީޗަރުންނަށް، ދިރިއުޅުމަށް އާމްދަނީ ހޯދޭނެ އެހެން ގޮތެއް ނެތެވެ. ސްކޫލްގައި ކުރާ މަސައްކަތުން މަހެއްގެ މައްޗަށް ގެއަށް ގެންދަން ލިބެނީ 69 ޑޮލަރާ 92 ޑޮލަރާ ދެމެދު އަދަދަކަށް ވާހާ އަފްޣާން ފައިސާއެވެ. ނޫރު ފާހަގަކުރިގޮތުގައި، ސްކޫލަށް ދިއުމަށް ކުރަންޖެހޭ ދަތުރަށް ޚަރަދެއް ނުހިނގިއެއްކަމަކު، ސްކޫލުން ލިބޭ އާމްދަނީން އާއިލާގެ ކަންކަން ދެކޮޅުޖައްސާލެވެނީ ހަމަ ކިރިޔާއެވެ.

އެތައް އަހަރަކަށް ދިގުލައިދިޔަ ހަނގުރާމައިގެ ސަބަބުން، މިއަދު އަފްޣާނިސްތާނަކީ މުޅި ދުނިޔޭގެ ނިސްބަތުންވެސް އެންމެ ފަގީރު ގައުމުތަކުގެތެރޭގައި ގުނާލެވޭ ގައުމެކެވެ. އެންމެ ކުޑަކޮށް ތަރައްގީވެފައިވާ ގައުމުތަކުގެ ލިސްޓުގައި އޮތް ގައުމެކެވެ. އޯގަސްޓް 2021ގައި، ހަތިޔާރު އެޅި ހަނގުރާމަވެރި ތާލިބާން ޖަމާއަތުން އަފްޣާނިސްތާނުގެ ކޮންޓްރޯލް ނެގުމާއެކު، ދަތި ދިރިއުޅުން އިތުރަށް ދަތިވިއެވެ.

އަފްޣާނިސްތާނަށް ކުރިން ލިބެމުން ދިޔަ އެހީގެ ދޮރުތައް ބަންދުވެ، ގައުމުގެ މާލީ ހާލަތު އިންތިހާއަށް ގޯސްވެ، ހީނަރުކަމުގެ ފުން އަނދަވަޅަކަށް ގައުމު ވެއްޓުނު ގޮތަށް އަދި އޮތީ އެކަމުން އަރައިނުގަނެވިއެވެ. އަފްޣާނިސްތާނަށް މިއަދު ކުރިމަތިވެފައިވާ ނުތަނަވަސްކަމުން ސަލާމަތްވެވޭނެ ދުވަހެއް، މަގެއް، އަދި ގޮތެއްވެސް ފެންނާކަށް ނެތެވެ. އަފްޣާނިސްތާނުގެ ކޮންޓްރޯލް ނެގި ތާލިބާނުންގެ ވެރިކަމެއްގައި އިންސާނީ ހައްގުތައް ނިގުޅައިގަންނަ ވާހަކަތައް ހުޅަނގުން ހަރު އަޑުން ފަތުރާއިރު، ބިއްލީ ހައިސްކޫލްގެ ހާލަތު އެދަރަޖައަށް ގޯސްވީ، ހަމައެކަނި ތާލިބާނުންގެ ވެރިކަމުގައި ހޭދަވީ ދޮޅު އަހަރެއްހާ ދުވަހުގެ ތެރޭގައި ކަމަށްވެސް ގަބޫލުކުރެވޭކަށްނެތެވެ.