ފްލެމެންގޯގެ ކޯޗަކަށް ސަމްޕައޮލީ ހަމަޖައްސައިފި
ފްލެމެންގޯއިން އެ ޓީމުގެ ކޯޗަކަށް ސަމްޕައޮލީ ހަމަޖެއްސީ އެއް އަހަރު ދުވަހުގެ މުއްދަތަށް
މީގެ ކުރިން ސެވިއްޔާގެ ކޯޗަކަށް ހުރި ސަމްޕައޯލީ
ބްރެޒިލްގެ ފްލެމެންގޯގެ ކޯޗަކަށް އާޖެންޓީނާގެ ޖޯޖް ސަމްޕައޮލީ ހަމަޖައްސައިފިއެވެ.
އުމުރުން 63 އަހަރުގެ ސަމްޕައޮލީ އެންމެ ފަހުން ހުރީ ސްޕެނިޝް ލީގުގެ ސެވިއްޔާގެ ކޯޗުކަމުގައެވެ. ނަމަވެސް އޭނާއާއެކު އެ ކުލަބުގެ ނަތީޖާތައް ދަށްވުމުގެ ސަބަބުން ސެވިއްޔާއިން ވަނީ ސަމްޕައޮލީ ވަކިކޮށްފައެވެ. އޭގެ ފަހުން ސަމްޕައޮލީ ހުރީ އެއްވެސް ވަޒީފާއެއްގައެއް ނޫނެވެ. ފްލެމެންގޯއިން އެ ޓީމުގެ ކޯޗަކަށް ސަމްޕައޮލީ ހަމަޖެއްސީ އެއް އަހަރު ދުވަހުގެ މުއްދަތަށެވެ. އެ ކުލަބާއެކު އޭނާ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ނިޔަލަށެވެ.
ސަމްޕައޮލީ އޭނާގެ ކޯޗިންގ ކެރިއަރު ފެށީ 1991 ވަނަ އަަހަރުއެވެ. ވަގުތީ ކޯޗެއްގެ ގޮތުގައި އޭނާ މަސައްކަތް ފެށިނަމަވެސް މިހާތަނަށް ވަނީ އެކުލަބުތަކަށް ކޯޗުކަން ކޮށްދީފައެވެ. އޭގެ ތެރޭގައި އާޖެންޓީނާގެ ކުލަބުތަކާއި، ގައުމީ ޓީމުތައްވެސް ހިމެނެއެވެ. ސަމްޕައޮލީ ވަނީ ދެކުނު އެމެރިކާގެ ޗިލީގެ ކޯޗުކަން 2012އިން 2016އަށް ކޮށްފައެވެ. އެއަށްފަހު އޭނާ ހަވާލުވީ ސެވިއްޔާއާއެވެ. އެ ކުލަބުގައި ހުރުމަށްފަހު، 2017 ވަނަ އަހަރު އޭނާ ވަނީ އާޖެންޓީނާ ގައުމީ ޓީމުގެ ކޯޗުކަމާ ހަވާލުވެފައެވެ. އޭނާއާއެކު 2018 ވަނަ އަހަރުގެ ފީފާ ވޯލްޑް ކަޕަށް އާޖެންޓީނާ ކުރިމަތިލިނަމަވެސް އެދެވޭ ނަތީޖާއެއް ނުނެރެވުމުން، މުބާރާތަށްފަހު ވަނީ އޭނާ ވަކިކޮށްފައެވެ. އޭގެފަހުން ސަމްޕައޮލީ ވަނީ ހަތަރު ކުލަބެއްގައި މަސައްކަތްކޮށްފައެވެ.
