ޗެލްސީގެ ޑިފެންޑަރު ހާލިދޫ ކުލިބާލޭ 2 ހަފުތާ އަށް ކުޅުމާ ދުރުގައި ހުންނަން ޖެހިއްޖެ އެވެ.
އޭނާގެ ފަޔަށް އަނިޔާވީ މި ހަފުތާގައި ރެއާލް މެޑްރިޑާ ދެކޮޅަށް ކުޅުނު ޗެމްޕިއަންސް ލީގުގެ ކުއާޓާ ފައިނަލް މެޗުގަ އެވެ. މި އަނިޔާގެ ސަބަބުން ޕްރެމިއާ ލީގުގައި ހޮނިހިރު ދުވަހު (މިއަދު) ބްރައިޓަންއާ ދެކޮޅަށް ކުޅޭ މެޗާއި ޗެމްޕިއަންސް ލީގުގައި ރެއާލް މެޑްރިޑާ ދެކޮޅަށް ކުޅެން ޖެހޭ ފަހު މެޗުގައި ވެސް ކުލިބާލޭ އަށް ނުކުޅެވޭނެ އެވެ.
އޭނާ ނެތުމުން ފަހަތަށް ކުޅުވާނެ ކުޅުންތެރިއަކު ފައިނަލް ކުރަން ކޯޗު ފްރޭންކް ލަމްޕާޑަށް ފަސޭހަ އެއްނުވާނެ އެވެ. ސަބަބަކީ ބޮނިޓޯ ބަޑިއާޝީ އަށް ޕްރެމިއާ ލީގުގައި ކުޅެވުނަސް ޗެމްޕިއަންސް ލީގު ކުޅުވަން އޭނާ ރަޖިސްޓާ ކޮށްފައިނުވާތީ އެވެ. މިހެންވެ ޓްރަވޯ ގްލޮބާ ނުވަތަ މާކް ކުކުރޭޔާ ލައްވައި ކުޅުވަން ލަމްޕާޑް ދަނީ ވިސްނަމުންނެވެ.
ކުރީގެ ކޯޗު ގްރެހަމް ޕޮޓާގެ ޓީމުން ބާކީވެފައިހުރި ފޯވަޑް ޕެޓްރިކް އައުބަމިޔަންގަށް ފުރުސަތުދޭން ލަމްޕާޑް ވަނީ ނިންމާފަ އެވެ. ކޯޗު ބުނީ އާސެނަލް އާއި ބާސެލޯނާގެ ކުރީގެ ފޯވަޑަކީ ގޯލާ ރައްޓެހި ގިނަ ގޯލުތަކެއް ކުރިން ޖަހާފައިވާ ފޯވަޑެއް ކަމަށާއި މިހެންވެ އެ ރެކޯޑަށްޓަކައި ވެސް އޭނާގެ ބޭނުން ހިފާނެ ކަމަށެވެ.
ގޯލު ޖެހުމުގެ މައްސަލަ ވެސް ޗެލްސީ އަށް ދިމާވެފައިވާއިރު، އެ ޓީމު މިވަގުތު އޮތީ ޕްރެމިއާ ލީގުގެ މެދުތެރޭގަ އެވެ. މިއީ އަންނަ ސީޒަނުގައި ޔޫރަޕުގެ އެއްވެސް މުބާރާތަކުން ޖާގަ ލިބޭނެ މަގާމެއްނޫނެވެ. ޔޫރަޕުން ޖާގަ ލިބޭނީ ގަދަ އަށް ޓީމަށެވެ.
