ރާއްޖޭގެ އެއްވަނަ އަންހެން ޑަބަލްސް ޓީޓީ ޕެއަރ ފާތިމަތު ދީމާ އަލީއާއި, އައިޝަތު ރަފާ ނާޒިމް އަނެއްކާވެސް ރާއްޖެ ފަޚުރުވެރިކޮށްދީފިއެވެ.

ކުޅިވަރުން ރާއްޖެއަށް ފަޚުރުވެރި ރަން ވަނަތައް ހޯދައިދެމުން އަންނަ ޒުވާން ދެ ކުޅުންތެރިން މިފަޚަރު ރާއްޖެ ފަޚުރުވެރިކޮށްދިނީ ޓީޓީގެ ދުނިޔޭގެ މުބާރާތް, ވޯލްޑް ޗެމްޕިއަންޝިޕްގެ ފައިނަލަށް ކޮލިފައިވެގެންނެވެ. ރާއްޖޭގެ ޕެއަރގެ އިތުރުން އޭޝިޔާއިން އަންހެން ޑަބަލްސް ކެޓަގަރީން މުބާރާތަށް ކޮލިފައިވީވެސް އިންޑިޔާއެވެ. އިންޑިޔާގެ ދެ ޕެއަރ ކޮލިފައިވިއެވެ. މިމުބާރާތް އޮންނާނީ ސައުތް އެފްރިކާގެ ޑާބަންގައި އަންނަ މަހުގެ 20-28 އަށެވެ. މިއީ އިންޓަރނޭޝަނަލް ޓޭބަލް ޓެނިސް ފެޑަރޭޝަންގެ އެންމެ ބޮޑު މުބާރާތެވެ.

ދީމާއާއި ރަފާވެސް އަންނަނީ ރާއްޖެއިން ބޭރުގައި ތަމްރީނު ހޯދަމުންނެވެ. ދެ އެތްލީޓުންނަށްވެސް ވަނީ ޔޫތް މިނިސްޓްރީގެ އަރުތަ ޕްރޮގްރާމުން ފުރުޞަތު ދީފައެވެ. ޒުވާން މިދެ ކުޅުންތެރިންނަކީ ދިގު އަހަރުތަކެއް ވަންދެން ރާއްޖެއަން ރަން ވަނަތައް ހޯދައިދިނުމުގައި ދެމިތިބޭނެ ދެ ކުޅުންތެރިންކަން ކުޅިވަރު އާއިލާއިން ފާހަގަކުރެއެވެ. އެއީ މިހާރުވެސް ޓީޓީގައި ރާއްޖޭގެ ރޭންކިންގެ އެއްވަނަ އަދި ދެވަނައެވެ. ސިންގަލްސް ފައިނަލްތަކުގައި ވާދަކުރާ ދެ ކުޅުންތެރިންނެވެ.