ތުރާކުނުގެ 2 ކްލާސްރޫމް މެއި މަހު އަދި އުލިގަމުގެ 8 ކްލާސްރޫމް ޖޫން މަހުގެ ނިމޭނެ: މިނިސްޓަރު
14 އެޕްރީލު 2023 | ހުކުރު 07:02އުލިގަމުގެ ސައިންސް ލެބް، އޭވީ ރޫމް އަދި ވަށާފާރު މަސައްކަތް ކުރިއަށްދޭ
އެޑިޔުކޭޝަން މިނިސްޓަރު ޑރ. އައިޝަތު އަލީ
ހއ.ތުރާކުނުގެ 02 ކްލާސްރޫމުގެ މަސައްކަތް މެއި މަހުގެ ތެރޭގައި އަދި އުލިގަމުގެ 08 ކްލާސްރޫމްގެ މަސައްކަތް ޖޫން މަހުގެ ތެރޭގައި ނިންމާލެވޭނެ ކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
މިމަހުގެ 10 ވީ ހޯމަ ދުވަހު ރައްޔިތުންގެ މަޖިލީހުގައި މިނިސްޓަރު ޑރ. އައިޝަތު އަލީ ވިދާޅުވީ ތުރާކުނުގައި ދެ ކްލާސް ރޫމުގެ މަސައްކަތް ކުރިއަށްދާ ކަމަށެވެ. މަސައްކަތްތަކަށް އިޝާރާތް ކުރައްވައި މިނިސްޓަރު ވިދާޅުވީ މިހާރު ކުރިއަށްދަނީ ގްރައުންޑް ފްލޯ ޕްލާސްޓަރިން މަސައްކަތާއި، ދެވަނަ ފަންގިފިލާ ކޮލަމް ޝަޓަރިން ކޮންކްރީޓް ކުރުމުގެ މަސައްކަތް ކަމަށެވެ. އަދި ވިދާޅުވީ މިއަހަރުގެ މެއި މަހުގެ ނިޔަލަށް މަސައްކަތް ނިންމާލެވޭނެ ކަމަށް ލަފާކުރެވޭ ކަމަށެވެ.
މީގެ އިތުރުން މިނިސްޓަރު ވިދާޅުވީ އުލިގަމުގެ 08 ކްލާސްރޫމެއްގެ މަސައްކަތްތައް ވެސް ކުރިއަށްދާ ކަމަށެވެ. ސައިންސް ލެބް، އޭވީ ރޫމް އަދި ވަށާފާރު މަސައްކަތް ކުރިއަށްދާކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ އުލިގަމުގައި ކުރިއަށް މިގެންދާ މަޝްރޫއުގެ މަސައްކަތް ޖޫން މަހުގެ ތެރޭގައި ނިންމާ ބޭނުންކުރެވޭނެ ކަމަށެވެ.
ތައުލީމީ ދާއިރާ ކުރިއެރުވުމަށް ކުރަމުންދާ މަސައްކަތުގެ ތެރެއިން އަތޮޅުތެރޭގެ ގިނަ ސްކޫލުތަކުގައި އެކިއެކި މަޝްރޫއުތައް ސަރުކާރުން ދަނީ ހިންގަމުންނެވެ. ތައުލީމީ ދާއިރާއިން މިވީ 4 އަހަރު ތެރޭގައި ސަރުކާރުންވަނީ 1316 މިލިއަނަށްވުރެ ގިނަ ރުފިޔާ ޚަރަދުކޮށްފައެވެ. އަދި ވަށާޖެހޭ ތައުލީމީ ނިޒާމެއްގެ ދަށުން ސުކޫލުތައް އެއް ދަންފަޅިއަށް ބަދަލު ކުރުމުގެ މަސައްކަތް މިނިސްޓްރީން ކުރަމުންދާއިރު، ރާއްޖޭގެ ހުރިހާ ސުކޫލެއް އެއްދަންފަޅިއަށް ބަދަލު ކުރުމަކީ ރައީސް ސާލިހުގެ ރިޔާސީ ވައުދުފުޅެކެވެ.
