ރަންތާޖު ޤުރްއާން މުބާރާތުގެ ޚާއްޞަ މެހެމާނު މިޞްރުގެ ޤާރީ އައްޝައިޚް އަޙްމަދު ތަމީމާއި އިސްލާމިކް މިނިސްޓަރު ބައްދަލުކުރައްވައިފި
14 އެޕްރީލު 2023 | ހުކުރު 03:38ރާއްޖެ ޓީވީއިން މި މުބާރާތް ގެނެސްދޭނީ ރަމަޟާންމަހުގެ ކޮންމެ ހުކުރު ދުވަހެއްގެ ރޭ 9:30ގައި
ޤާރީ އައްޝައިޚް އަޙްމަދު ތަމީމް މަޙްމޫދު އަޙްމަދު އާއި މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ
ރަންތާޖު ޤުރްއާން މުބާރާތުގެ ޚާއްޞަ މެހެމާނު، މިޞްރުގެ ޤާރީ އައްޝައިޚް އަޙްމަދު ތަމީމް މަޙްމޫދު އަޙްމަދު އާއި މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ބައްދަލުކުރައްވައިފިއެވެ.
މިނިސްޓަރު ވަނީ ޤާރީ އައްޝައިޚް އަޙްމަދު ތަމީމް މަޙްމޫދު އަޙްމަދަށް ހަނދާނީ ހަދިޔާއެއް އަރުވާފައެވެ. އަދި އެ ދެބޭފުޅުން ވަނީ ރަންތާޖު ޤުރުއާން މުބާރާތާއި ގުޅޭގޮތުން އެ ބައްދަލުކުރެއްވުމުގައި މަޝްވަރާކުރައްވާފައެވެ. ރަންތާޖު" ޤުރުއާން މުބާރާތް އިތުރަށް ފުރިހަމަކުރުމުގެ ގޮތުން އެ މުބާރާތަށް ރާއްޖެއިން ބޭރުގެ މަޝްހޫރު ޤާރީންނަށް ދައުވަތު ދީފައިވާ ކަމަށާއި އެ މަސައްކަތް ކުރިއަށްދާކަން މީގެ ކުރިން ވެސް ރަންތާޖުގެ ޓީމުން ވަނީ ހާމަކޮށްފައެވެ.
މި މުބާރާތަކީ އަގުހުރި އިނާމުތަކަކާއެކު ކުރިއަށްގެންދާ ޕްރޮގްރާމެކެވެ. އެގޮތުން މުބާރާތުގެ އެއްވަނައަށް ދާ ފަރާތަކަށް 3 ލައްކަ ރުފިޔާ، ދެވަނައަށް ދާ ފަރާތަކަށް 1 ލައްކަ ރުފިޔާ، އަދި ތިންވަނައަށް ދާ ފަރާތަކަށް 75000 ރުފިޔާ ލިބޭނެއެވެ. މި މުބާރާތުގެ ފަނޑިޔާރުންނަކީ އަލްޤާރީ އިބްރާހިމް ޝިފާއުއާއި އަލްޤާރީ މުހައްމަދު ތައުފީގާއި އަލްޤާރީ އަބްދުލް ވާހިދު އަބްދުﷲ، އަދި އައްޝައިޚް ނަސްރުﷲ އަލީއެވެ.
16 އަހަރާއި 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މި މުބާރާތަކީ މިހާތަނަށް ރާއްޖޭގައި ބާއްވާ މިފަދަ އެންމެ ބޮޑު މުބާރާތެވެ. މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.
ރާއްޖެ ޓީވީއިން މި މުބާރާތް ގެނެސްދޭނީ ރަމަޟާންމަހުގެ ކޮންމެ ހުކުރު ދުވަހެއްގެ ރޭ 9:30ގައެވެ.
