ޕާކިސްތާން ކީޕަރު ނިއުރޭޑިއަންޓަށް
13 އެޕްރީލު 2023 | ބުރާސްފަތި 16:02އޭނާ ވަނީ ރ. އުނގޫފާރަށް 2017 ވަނަ އަހަރު ކުޅެފައި
ޕާކިސްތާން ކީޕަރު (ވ) ރ. މީދޫ ޓީމުގެ އޮފިޝަލަކާއެކު: މި އަހަރު ކުޅޭނީ ނިއުއަށް
ދެ ވަނަ ޑިވިޝަނާއި މި އަހަރުގެ ފަހުކޮޅު އޮންނަ އެފްއޭކަޕަށް ތައްޔާރުވާ ނިއުރޭޑިއަންޓް ސްޕޯޓްސް ކުލަބަށް ކުޅުވަން, ޕާކިސްތާނުގެ ގައުމީ ކީޕަރަކު ގެންނަން ނިންމައިފިއެވެ.
މި ގޮތުން ނިއުއަށް ގެންނަ އަބްދުލްބާސިތަކީ ޕާކިސްތާން ޓީމުގެ ބަދަލު ކީޕަރެވެ. މިދިޔަ މަހު ރާއްޖެއާއެކު ކުޅެން އައި ޕާކިސްތާން ޓީމުގައިވެސް އޭނާ ހިމެނުނެވެ.
ބާސިތަކީ 2017 ވަނަ އަހަރު ރ. އަތޮޅު އުނގޫފާރަށްވެސް ކުޅެފައިވާ ކީޕަރެކެވެ. ނިއު ވަރުގަދަކުރުމަށް މި އަހަރު ގެންނަން ނިންމައި އިއުލާނުކުރި ފުރަތަމަ ބިދޭސީ ކުޅުންތެރިއަކީވެސް އޭނާއެވެ.
ނިއުއިން ވަނީ މިއަހަރަށް ތައްޔާރުވުމަށް މަޝްހޫރު ގިނަ ކުޅުންތެރިންތަކެއްގެ ސޮއި ހޯދާފައެވެ. އޭގެ ތެރޭގައި ވެލެންސިއާއަށް ކުޅުނު އަބްދުﷲ މިދުހަތު ފަހުމީ (ބިޗަޑް)އާއި، އޭދަފުއްޓާއި ޓީސީއަށް ކުޅުނު އިޝާން އިބްރާހީމް (ސައްޓު)އާއި، ފުރަތަމަ ޑިވިޝަނުގެ ވިޔަންސާއާއި ވެލެންސިއާ އަދި އެނޫން ޓީމުތަކުންވެސް ފެނުނު މިޑްފީލްޑަރު އަލީ އިފާޒްއާއި، ވިކްޓަރީއާއި ވެލެންސިއާއަށް ކުޅުނު އިސްމާއީލް ވިފާގްއާއި، ފުރަތަމަ ޑިވިޝަނުގެ ގިނަ ޓީމުތަކެއްގައާއި ގައުމީ ޓީމުގައި ކުޅުނު ކީޕަރު ތޮލާލް ހަސަން (ޓޮޕްލަކް)އާއި، ގދ. ވާދޫ ޓީމުން ފުޓްސަލް ޓީމުގައި ވިދާލި އަޔާޒް އަހުމަދާއި ސަސްއިން ފެނުނު ޔަސްފާގް ހަބީބްވެސް ހިމެނެއެވެ.
ނިއުގެ ކޯޗަކަށް ހަމަޖައްސާފައިވަނީ އީގަލްސްގެ ކުރީގެ ކޯޗު، އަހުމަދު ނިމާދެވެ.
