ވޯޓަރ ތީމް ޕާކް: އެއްބަސްވުން އުވާލުމަށް ނިންމި ނިންމުމަށް އަމަލުކުރުން ފަސްކުރަން ނެރުނު އަމުރު ބާތިލު!
13 އެޕްރީލު 2023 | ބުރާސްފަތި 10:47ވަގުތީ އަމުރެއް ނެރެދިނުމަށް ސިވިލް ކޯޓުގައި އެދުނުނަމަވެސް، އެ ކޯޓުން އެ އަމުރު ނެރެދީފައެއްނުވޭ
ހައިކޯޓުން ނެރެފައިވާ ވަގުތީ އަމުރެއް ބާތިލުކޮށްދިނުމަށް އެދި އެޗްޑީސީން ސުޕްރީމް ކޯޓަށް ހުށަހެޅުން
ހުޅުމާލޭ ވޯޓަރ ތީމް ޕާކް ހެދުމަށް، ވޯޓަރ ފްރޮންޓް ހޮޓެލް އެންޑް ލޭޝަރ ކުންފުންޏާއެކު ހަދާފައިވާ އެއްބަސްވުން އުވާލައި، ބިން ހަވާލު ކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން އަންގައި އެ ކުންފުންޏަށް ފޮނުވި ސިޓީއަށް އަމަލުކުރުން ފަސްކުރަން ދިވެހިރާއްޖޭގެ ހައިކޯޓުން ނެރުނު އަމުރު ބާތިލުކަމަށް، ސުޕްރީމް ކޯޓުން ހުކުމްކޮށްފިއެވެ.
މިއީ ހައިކޯޓުން ނެރެފައިވާ ވަގުތީ އަމުރެއް ބާތިލުކޮށްދިނުމަށް އެދި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ސުޕްރީމް ކޯޓަށް ހުށަހެޅުމުން ބަލާފައިވާ މައްސަލައެކެވެ.
މި އިސްތިއުނާފު ރައްދުވަނީ ވޯޓަރ ފްރޮންޓް ހޮޓެލް އެންޑް ލެޝަރ ޕްރައިވެޓް ލިމިޓެޑަށެވެ. އެ ކުންފުންޏަކީ ހުޅުމާލޭގައި ވޯޓަރ ތީމް ޕާކަކާއި ޓޫރިސްޓް ހޮޓަލެއް ތަރައްގީކުރުމަށް، 13 ޖުލައި 2017ގައި އެޗްޑީސީއާއެކު އެއްބަސްވުމެއް ހަދާފައިވާ ކުންފުންޏެކެވެ.
ނަމަވެސް އެއްބަސްވުމުގެ ޖައުހަރީ މާއްދާތަކާ ވޯޓަރ ފްރޮންޓުން ޚިލާފުވެފައިވާކަމުގައި ބުނެ އެޗްޑީސީން އެއްބަސްވުން ބާތިލުކުރީއެވެ.
އެއްބަސްވުން ބާތިލުކޮށް އެޗްޑީސީން ސިޓީ ފޮނުވިއިރު، ދެ ފަރާތުގެ ދެމެދުގައި އޮތް އެއްބަސްވުމާ ގުޅޭ މައްސަލައެއް ސިވިލް ކޯޓުގައި ކުރިއަށްދެއެވެ.
އަދި އެ މައްސަލައިގެ ތެރެއިން އެއްބަސްވުން ބާތިލުކޮށް އެޗްޑީސީން ފޮނުވި ސިޓީއަށް އަމަލުކުރުން ފަސްކުރުމުގެ އަމުރެއް ނެރެދިނުމަށް އެދި، ވޯޓަރ ފްރޮންޓްގެ ފަރާތުން ހުށަހެޅިއެވެ.
ވޯޓަރ ފްރޮންޓްގެ ފަރާތުން ވަގުތީ އަމުރެއް ނެރެދިނުމަށް ސިވިލް ކޯޓުގައި އެދުނުނަމަވެސް، އެ ކޯޓުން އެ އަމުރު ނެރެދީފައި ނުވެއެވެ. ނަމަވެސް އެ ނިންމުން ހައިކޯޓުގައި އިސްތިއުނާފު ކުރުމުން، ހައިކޯޓުން އެ އަމުރު ނެރެދީފައިވާތީ އެޗްޑީސީން އެ އަމުރު ސުޕްރީމް ކޯޓުގައި އިސްތިއުނާފުކުރީއެވެ.
ސުޕްރީމް ކޯޓުން ކުރި ހުކުމުގައި ވަނީ، އިސްތިއުނާފީ މަރުހަލާގައި، ކޯޓުގެ ކުރިމަތީގައިވާ އިސްތިއުނާފާމެދު ގޮތެއް ކަނޑައެޅުމުގެ ކުރިން ނެރެދެވޭ ވަގުތީ އަމުރުން ފޯރުކޮށްދެވޭ ހައްލަކީ، އިސްތިއުނާފާމެދު ގޮތެއް ކަނޑައެޅުމުންވެސް ފޯރުކޮށްދެވޭ ހައްލުކަމުގައި ވާނަމަ، މައްސަލާގައި ހިމެނޭ މައުލޫއީ ހައްގަށް ނުވަތަ ގާނޫނީ މަރުކަޒަށް ދާއިމީ ހިމާޔަތް ކުރިއާލައި ނުދެވޭނެތޯ ސުވާލުކުރައްވާފައެވެ.
އޭގެ އިތުރުން، ވަގުތީ އަމުރެއް އިސްތިއުނާފު ކުރުމަށްފަހު، އެ އިސްތިއުނާފުގައި އެދިފައިވާ ފަރުވާއާއި، އެ އިސްތިއުނާފާމެދު ގޮތެއް ނިންމުމުގެ ކުރިން އިސްތިއުނާފު ކޯޓުގައި ނެރެދިނުމަށް އެދޭ ވަގުތީ އަމުރުގައި އެދޭ ފަރުވާއަކީ އެއް ފަރުވާއަކަށް ވެއްޖެނަމަ، އެ ހާލަތުގައި އިސްތިއުނާފީ ކޯޓުގެ ކުރިމަތީގައި އޮންނަ މައްސަލައިގައި ދުރާލައި ގޮތެއް ކަނޑައެޅުނީ ކަމުގައި ބެލުމުގެ ޖާގަ އޮންނާނެކަންވެސް ހުކުމުގައި ފާހަގަކޮށްފައިވެއެވެ.
އެގޮތުން ބަލާއިރު، ސިވިލް ކޯޓުން ނެރެފައިވާ ވަގުތީ އަމުރު އިސްތިއުނާފު ކުރަމުން، ހައިކޯޓުގައި ވޯޓަރ ފްރޮންޓްގެ ފަރާތުން އެދިފައިވަނީ، ވަގުތީ އަމުރާމެދު ސިވިލް ކޯޓުން ނިންމި ގޮތް ބާތިލުކޮށްދިނުމަށެވެ.
އަދި މައުލޫއީ ދައުވާއާމެދު ސިވިލް ކޯޓުން ގޮތެއް ކަނޑައެޅުމާ ހަމައަށްއެޗްޑީސީން ފޮނުވާފައިވާ ސިޓީއަށް އަމަލު ނުކުރުމަށް އެ ކުންފުންޏަށާއި ކަމާ ގުޅުންހުރި އެންމެހައި ފަރާތްތަކުގެ މައްޗަށް އަމުރުކޮށް ދިނުމަށެވެ.
އަދި ހައިކޯޓުގައި ވަގުތީ އަމުރަކަށް އެދެމުން ވޯޓަރ ފްރޮންޓްގެ ފަރާތުން އެދިފައިވަނީ، ހައިކޯޓަށް ހުށަހެޅިފައިވާއިސްތިއުނާފީ މައްސަލާގައި އެ ކޯޓުން ގޮތެއް ނިންމުމުގެ ކުރިން އެޗްޑީސީން ފޮނުވާފައިވާ ސިޓީއަށް އަމަލުނުކުރުމަށް އެ ކުންފުނީގެ މައްޗަށް އަމުރުކޮށްދިނުމަށެވެ.
ވުމާއެކު، މި ހާލަތުގައި, ހުށަހެޅިފައިވާ އިސްތިއުނާފުގައި އެދިފައިވާ ފަރުވާއާއި، އެ އިސްތިއުނާފާ ވަކިން ނެރެދިނުމަށް އެދިފައިވާ ވަގުތީ އަމުރުގައިވެސް އެދިފައިވަނީ އެއް ފަރުވާ އެއްކަން އެނގޭކަން ފަނޑިޔާރު މަހާޒް އަލީ ޒާހިރުގެ ރައުޔުގައި ބަޔާން ކުރައްވާފައިވެއެވެ. އެގޮތުން ވަގުތީ އަމުރާމެދު ހައިކޯޓުން ކޮންމެ ގޮތަކަށް ނިންމިނަމަވެސް، އެ ހާލަތުގައި ހައިކޯޓުގެ ކުރިމަތީގައި އޮތް އިސްތިއުނާފާމެދު ވަކި ގޮތެއް ކަނޑައެޅީކަމުގައި ބެލުމުގެ ފުރުސަތު އޮންނާނެކަމަށް ފަނޑިޔާރު މަހާޒު ވިދާޅުވިއެވެ.
ވުމާއެކު، ވަގުތީ އަމުރާމެދު ހައިކޯޓުން ނިންމި ގޮތް ބާތިލުކުރުމަށް ފެންނަކަމަށް ފަނޑިޔާރު މަހާޒް ވިދާޅުވިއެވެ.
ފަނޑިޔާރު މަހާޒުގެ ރައުޔަށް ދެން ތިއްބެވި ދެ ފަނޑިޔާރުންވެސް ވަނީ ތާއީދު ކުރައްވާފައެވެ.
