އަނަސްގެ މަރު: ދެން އޮތީ ޙުކުމް
މިއީ ދެ ގޭންގަކަށް ނިސްބަތްވާ ބަޔަކު ގުޅިގެން ހިންގި ޖަރީމާއެއްކަމަށް ދައުލަތުގެ ވަކީލު ވިދާޅުވި
ރ މީދޫ ފެންފިޔާޒުގޭ މުޙައްމަދު އަނަސް
ރ މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އަނަސް މަރާލާފައިވަނީ، 2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެރެއެވެ. އަނަސް މަރާލާފައިވަނީ އޭނާ ފަހާ ދުވަމުން ގޮސް، ލިޓަސް ސަރވިސް ސެންޓަރު ތެރެއަށް އޭނާ ވަނުމުން، ފަހަތުން ގޮސް ހަމަލާދީގެންނެވެ. ތޫނު ހަތިޔާރު ބޭނުންކޮށްގެން އަނަސްގެ ހަށިގަނޑުގެ އެކި ތަންތަނަކަށް ހަމަލާދީފައިވާއިރު، ހޮސްޕިޓަލަށް ގެންދިޔައިރުވެސް އޭނާ އޮތީ މަރުވެފައެވެ.
މި މައްސަލައިގައި ބުރާސްފަތި ދުވަހު އޮތް އަޑުއެހުމަކީ ޚުލާސާ ބަޔާން ހުށައެޅުމަށް ތާވަލުކުރި އަޑުއެހުމެކެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
އެންމެ ފުރަތަމަ ދައުލަތުން ވަނީ ޚުލާސާ ބަޔާން އިއްވާފައެވެ. ޚުލާސާ ބަޔާނުގައި ދައުލަތުން ވަނީ މި މައްސަލައިގައި އުފުލާފައިވާ ދައުވާތަކާއި، ދައުވާ އުފުލި ސަބަބުގެ އިތުރުން، ކިތާބީ ހެކިތަކާއި ގުޅޭގޮތުން ފާހަގަ ކުރަން ހުރި ކަންކަމަށް އަލިއަޅުވާލާފައެވެ.
މިއީ މާލޭގައި ޙަރަކާތްތެރިވާ ދެ ގޭންގަކަށް ނިސްބަތްވާ ބަޔަކު ގުޅިގެން ހިންގި ޖަރީމާއެއްކަމަށް ދައުލަތުގެ ވަކީލު ވިދާޅުވިއެވެ.
އަނަސްއަށް ޙަމަލާދިނީ މ އަސަރީހިޔާ ގެއިން ނުކުމެގެން ލިޓަސް ސަރވިސް ސެންޓަރަށް ގޮސް ކަމަށާއި، އެ ދެމެދުގައި ހިނގާފައިވަނީ 10 މިނެޓުކަމަށްވެސް ދައުލަތުގެ ވަކީލު ވިދާޅުވިއެވެ.
އެއަށްފަހު ސިމާހު މޫސާ އަދި މުޙައްމަދު ޝާޒުގެ ވަކީލު ވަނީ ޚުލާސާ ބަޔާން އިއްވަވާފައެވެ. އެ ދެމީހުންގެ މައްޗަށް އުުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއެވެ.
ވަކީލު ވިދާޅުވީ، އެ ދެމީހުންގެ މައްޗަށް ހުށަައެޅިފައިވާ ހަމައެކަނި ހެއްކަކީ ސީސީޓީވީ ފުޓޭޖް ކަމަށާއި، ދެން ހުރީ އެއާ ގުޅިގެން ހުށައެޅިފައިވާ ހެކިތަކެއް ކަމަށެވެ.
އުސްމާން ޝަރީފާއި އަހުމަދު ޒަޔާންގެ ދިފާއީ ވަކީލުވެސް ވަނީ މިއީ އެކަށީގެންވާ ޝައްކެއް ނެތް މިންވަރަށް ސާބިތު ކުރެވޭ ދައުވާއެއް ނޫންކަމަށް ކަނޑައަޅުއްވައިދެއްވުމަށް އެދިލައްވާފައެވެ.
ދައުވާލިބޭ ފަރާތްތައް އައިޑެންޓިފައި ކޮށްފައިވާ ރިޕޯޓުތަކަށް ބަލާއިރު، ދައުވާ ލިބޭ ފަރާތްތަކުގެ އާންމު ސިފައާއި ޚާއްސަ ސިފަތަކެއް އެނގެން ނެތްކަމަށް ދިފާއީ ވަކީލު ވިދާޅުވިއެވެ.
އަފްރާހު އަބްދުލްރައްޒާޤުއާއި، ޙަސަން މަހުފޫޒު އަދި ޖުނައިހު އަބްދުﷲ ގެ ދިފާއީ ވަކީލުވެސް ވަނީ މި މައްސަލައިގެ ޚުލާސާ ބަޔާން އިއްވަވާފައެވެ.
ދައުލަތުން ހުށައަޅާފައިވަނީ ޝައްކު އުފެދޭ ޤަރީނާތަކެއްކަމަށް އެމީހުންގެ ވަކީލު ވިދާޅުވިއެވެ.
މި މައްސަލައިގައި ހޯދާފައިވަ ގިނަ ވީޑިއޯ ފުޓޭޖުތަކުގެ ގަޑި ދިމާނުވާ ކަމަށާއި، ހއ ތަކަންދޫ އިބްރަހީމީހިޔާ ނަދީމް އަބްދުއްރަޙީމްގެ މަރުގެ މައްސަލައިގައިވެސް ކުށް ސާބިތުނުވާކަމަށް ނިންމިއިރު، ވީޑިއޯ ފުޓޭޖުތަކުގެ ގަޑި ދިމާނުވާކަން ފާހަގަ ކޮށްފައިވާކަމަށް ވަކީލު ވިދާޅުވިއެވެ.
މި މައްސަލައިގައި ޝަރީއަތުން މައްސަލަ ދިރާސާކުރާއިރު އިތުރު ކަމެއް ނެތްނަމަ ދެން އޮންނާނީ މައްސަލައިގެ ޙުކުމް ކުރުމެވެ.
ގާޒީ އަލީ ނަދީމް ވިދާޅުވީ، ކުރިއަށް އޮތް 30 ދުވަސް ތެރޭގައި އެކަމުގެ އަޑުއެހުން ބާއްވަވާނެ ކަމަށެވެ.
