ގަރލް ގައިޑް އެސޯސިއޭޝަނުން ކުރިއަށްގެންދާ "އީދު ޕްރޮޖެކްޓް" ގެ ސަބަބުން ގައިޑުންނަށް އަމިއްލަ ނަފްސު ކުރިއެރުވުމަށް ފުރުސަތު ލިބިގެންދާނެ ކަމަށް އެ އެސޯސިއޭޝަންގެ އިންޓަރނޭޝަނަލް ކޮމިޝަނަރ އާއިޝަތު ތޮއިފާ ވިދާޅުވެއްޖެއެވެ.
ގަރލް ގައިޑް އެސޯސިއޭޝަނުން 2000 ވަނަ އަހަރުން ފެށިގެން ކޮންމެ އަހަރަކު ކުރިއަށްގެންދާ މި ހަރަކާތް މިއަހަރު ވެސް ގުރައިދޫގައި ބޭއްވުމަށް ވަނީ ނިންމާފައެވެ. މި ޕްރޮޖެކްޓަކީ އެ އެސޯސިއޭޝަންގެ ޒުވާން ލީޑަރުން އިސްނަގައިގެން، ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒަށް ގޮސް އެތަނުގައި ތިބޭ މީހުންނަށް ހަދިޔާ ދިނުމަށް ކުރިއަށްގެންދާ ޕްރޮޖެކްޓެކެވެ.
މި ޕްރޮޖެކްޓްގެ މައިގަނޑު މަގުސަދަކީ ގުރައިދޫ މަރުކަޒަށް ޒިޔާރަތްކޮށް އެތަނުގައި ދިރިއުޅޭ މީހުން އީދު އުފަލުގައި ބައިވެރިކުރުން ކަމަށް ގަރލް ގައިޑް އެސޯސިއޭޝަނުން ފާހަގަކުރެއެވެ.
މި ޕްރެޖެކްޓުގެ ސަބަބުން ގައިޑުގެ ލީޑަރުންނަށް ވެސް ގިނަ ހުނަރުތަކެއް ދަސްވާނެކަން ފާހަގަކޮށް ތޮއިފާ ވިދާޅުވީ މިފަދަ ފުރުސަތުތަކަކީ އާއްމުކޮށް ކުދިންނަށް ނުލިބޭ ފުރުސަތެއް ކަމަށެވެ. އެގޮތުން، ކަންކަން އަމިއްލައަށް މެނޭޖްކޮށް އެކަކު އަނެކަކާ ގުޅިގެން މަސައްކަތް ކުރުން ފަދަ ހުނަރުތައް އެކުދިންނަށް ދަސްވެގެންދާނެ ކަމަށް ވެސް އޭނާ ވިދާޅުވިއެވެ.
އީދު ޕްރޮޖެކްޓަކީ ޔަންގ ލީޑަރުން އިސްނަގައިގެން ކުރިއަށްގެންދާ ޕްރޮޖެކްޓެއްކަން ފާހަގަކޮށް ގަރލްގައިޑް އެސޯސިއޭޝަންގް ޔަންގް ލީޑަރ އައިޝަތު މާނީ އިބްރާހިމް ބުނީ އެ ޕްރޮޖެކްޓުގެ ސަބަބުން ބައިވެރިންނަށް އިސްނެގުމާއި ކެރިގެން ކަންކަމުގައި ކުރިމަތިލުން ފަދަ ކަންކަން ދަސްވާނެ ކަމަށެވެ.
އީދު ޕްރޮޖެކްޓް ކުރިއަށްގެންދާތާ އަހަރުތަކެއް ވެފައިވާއިރު މި ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށް ގަރލް ގައިޑް އެސޯސިއޭޝަނުން ބުނެއެވެ. އެގޮތުން ސްޕޮންސަރުންގެ ފަރާތުން ވެސް ވަރަށް ބޮޑު ތަރުހީބެއް ލިބޭ ކަމަށާއި ސޯޝަލް މީޑިއާއިން ވެސް އެހީތެރިކަން ލިބޭ ކަން އެ އެސޯސިއޭޝަނުން ވަނީ ފާހަގަކޮށްފައެވެ.
