މިރަމަޟާން މަހުގެ ކުރިއަށްއޮތް ދުވަސްތަކުގައި އަލް-އަގްސާ މިސްކިތައް ދެވޭނީ ހަމައެކަނި މުސްލިމުންނަށް ކަމަށް ނިންމައިފިއެވެ.
މިކަން އިއުލާނުކޮށްފައިވަނީ ބުރާސްފަތި ދުވަހުއެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވަނީ، ރަމަޟާން މަސް ނިމެންދެން އަގްސާ މިސްކިތަށް ވަނުން ޔަހޫދީންނަށް މަނާވާނެކަމަށެވެ.
މީގެ ކުރީގެ އަހަރުތަކުގައިވެސް އިސްރާއީލުން މިގޮތަށް އަމަލުކޮށްފައިވެވެ.
ރަމަޟާން މަހުގެ ކުރީކޮޅު، އިސްރާއީލުގެ ފުލުހުން އަގްސާ މިސްކިތައް ވަދެ، އަޅުކަމުގައި ތިބި ގިނަ އަދަދެއްގެ މުސްލިމުންނަށް އެކި ވަރުގެ އަނިޔާ ވަނީ ދީފައެވެ. މިކަމާގުޅިގެން، ޣައްޒާގެ އިތުރުން، ލުބުނާނާއި ސީރިއާއިންވެސް ވަނީ ނުރުހުން ފާޅުކޮށް، އިސްރާއީލަށް ރޮކެޓް ހަމަލާތަކެއް ދީފައެވެ. އޭގެ ބަދަލުގައި އިސްރާއީލުންވެސް ވަނީ އެގައުމުތަކަށް ހަމަލާ ދީފައެވެ.
