ޔުއެފާ ޗެމްޕިއަންސް ލީގުގެ ފުރަތަމަ ލެގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުގެ ނަތީޖާ ޤަބޫލު ކުރަން ދަތި ކަމަށް ބަޔާން މިއުނިކްގެ ކޯޗު ތޯމަސް ޓުޗެލް ބުނެފި އެވެ.

ޓުޗެލް މިހެން ބުނީ ފުރަތަމަ ލެގުގައި ސިޓީ އަތުން ތިން ލަނޑުގެ ތަފާތުން ބަޔާން ބަލިވި މެޗަށްފަހު ވާހަކަ ދައްކަމުންނެވެ. އޭނާ ބުނީ މެޗުގެ ނަތީޖާ އަކީ 3-0 ގެ ގޮތުގައި އިހުސާސް ވެސް ނުވާ ކަމަށާއި، ނަމަވެސް ނަތީޖާ އަކީ އެއީ ކަމަށެވެ. އަދި އެ ނަތީޖާ އަނބުރާލުމަށް ކުރަން ޖެހޭނީ ވަރަށް ބޮޑު މަސައްކަތެއް ކަމަށެވެ. އެހެން ނަމަވެސް ބަޔާނުން ހިތްވަރު ދޫކޮށްނުލާނެ ކަމަށާއި، ބަޔާނުން ހަގީގަތާ ކުރިމަތިލައިގެން އެންމެ ރަނގަޅަށް މަސައްކަތް ކުރާނެ ކަމަށެވެ. މީގެ ކުރިން ޗެލްސީ އަށް ވެސް ޗެމްޕިއަންސް ލީގު ކާމިޔާބުކޮށްދީފައިވާ ޖަރުމަނަށް ނިސްބަތްވާ ކޯޗު ބުނީ ފުޓުބޯޅަ އަކީ ވަރަށް އެހެން ކަހަލަ އެއްޗެއް ކަމަށެވެ. އަދި ޖަރުމަނުގައި ކުޅޭ މެޗަކީ ބަޔާނުން އޯވާ ވެގެން ތިބޭނެ މެޗެއް ނޫން ކަމަށެވެ.

މީގެ އިތުރުން ޓުޗެލް ބުނީ މެޗުގެ ނަތީޖާއާމެދު އޭނާގެ ކުޅުންތެރިން މާބޮޑަށް ވިސްނިޔަ ނުދޭނެ ކަމަށާއި، ސަބަބަކީ އެއީ ބަޔާނަށް ހައްގު ނަތީޖާއެއް ނޫން ކަމަށް ވުމުންނެވެ. އެ ނަތީޖާ އިން މެޗުގެ ވާހަކަތައް ކިޔައި ނުދޭކަން ފާހަގަކުރަމުން ޓުޗެލް ބުނީ، ބަޔާނުން ރަނގަޅަށް ކުރި ކަންކަމަށް ވިސްނާލުމަކީ ބަޔާނަށް ވެސް އަދި އޭނާ އަށް އޮތް ޗެލެންޖު ކަމަށެވެ. އެގޮތުން ބަޔާނުން ކުޅުނީ އެމީހުންގެ ފެންވަރުގައި އަދި އިތުބާރުގައި ކަމަށެވެ. ޚާއްސަކޮށް ބަޔާންގެ ކުޅުންތެރިން އެމީހުންގެ ކޮލެޓީ ވެސް ދައްކައިދިން ކަމަށާއި، ދެ ވަނަ ހާފުގެ ފުރަތަމަ 25 މިނެޓުގައި ބަޔާނުން ކުޅުނީ ފުރަތަމަ ހާފަށް ވުރެ ވެސް މޮޅަށް ކަމަށެވެ. އެކަމުގެ ތެރެއިން ބަޔާނަށް މެޗުގައި ތަނަވަސް ފުރުސަތުތަކެއް ވެސް ލިބުނު ކަމަށާއި، ނަމަވެސް އެކަށީގެންވާ ވަގުތުގައި ނިންމާނުލެވުނީ ކަމަށް ވެސް ޓުޗެލް ވަނީ ބުނެފަ އެވެ.

އިތުރަށް ވާހަކަ ދައްކަމުން ޓުޗެލް ބުނީ މެޗުގެ ނަތީޖާއަށް ފޯކަސް ކުރަން ބޭނުންނުވަނީ، އެހެން ރަނގަޅު އެތަައް ކަމެއް ފެނުމުން ކަމަށެވެ. އޭނާ ބުނީ ބަޔާނުން ކުރިއަށް އޮތް މެޗަށް ނުކުންނާނީ ކަންކަން ރަނގަޅުކޮށް، ނަތީޖާ ނެރުމުގެ އުންމީދުގައި ކަމަށެވެ. ބަޔާންގެ ކުޅުންތެރިންނާ ގުޅޭ ގޮތުން ޓުޗެލް ބުނީ، ގިނަ މެޗުތަކެއް ކުޅެމުން އަންނައިރު ކޮންމެ ކުޅުންތެރިޔަކަށް ވެސް ގޯހެއް ހެދިދާނެ ކަމަށާއި، ފުޓުބޯޅަ އަކީ އެއީ ކަމަށެވެ. ނަމަވެސް ދަނޑު މަތީގައި ތިބޭ ބަޔާންގެ 11 ކުޅުންތެރިންގެ އިތުރުން ބެންޗުގައި އިންނަ ކުޅުންތެރިޔާ އަށް ވެސް އިތުބާރު އޮންނަކަން ފާހަގަކޮށް ޓުޗެލް ބުނީ، ފުރަތަމަ ދުވަހު ބަޔާނަށް އައިއިރު އޮތް ޗެލެންޖަށް ވުރެ މިހާރު އޮތް ޗެލެންޖު ބޮޑު ކަމަށެވެ.

މީގެ ކުރިން 2020 ވަނަ އަހަރު ވެސް ޗެމްޕިއަންސް ލީގު ކާމިޔާބުކޮށްފައިވާ ބަޔާނަށް މި ސީޒަންގެ ސެމީ ފައިނަލުން ޖާގަ ލިބެން އޮތީ ބަޔާންގެ ދަނޑުގައި މި މަހުގެ 20 ވަނަ ދުވަހު ކުޅޭ މެޗުގައި ތިން ލަނޑުގެ ތަފާތުން ސިޓީ ބަލިކޮށްގެންނެވެ.