ޗެލްސީ އަށް ކުޅެމުން އަންނަ އިނގިރޭސި ޑިފެންޑަރު ބެން ޗިލްވެލް އެކުލަބާއެކު ހަދާފައިވާ އެއްބަސްވުން އައުކުރުމަށް ނިންމައިފި އެވެ.

ޗިލްވެލް އެންމެ ފުރަތަމަ ޗެލްސީއަށް ބަދަލުވީ 2020 ވަނަ އަހަރު އެވެ. ލެއިސްޓަރ ސިޓީ ދޫކޮށް އޭނާ ޗެލްސީ އަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވުމުގެ ކުރިން ޗެލްސީން މިހާރު ވަނީ އިތުރު ދެ އަހަރަށް އޭނާގެ އެއްބަސްވުން އައުކުރުމަށް ނިންމައިފަ އެވެ. އެހެންކަމުން ޗިލްވެލް ދެން ޗެލްސީއާއެކު ސޮއިކުރާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ޗެލްސީގެ އެއްބަސްވުން އައު ކުރުމަށް ނިންމައި، ޗިލްވެލް މި ހަފްތާގެ ތެރޭގައި އައު އެއްބަސްވުމުގައި ސޮއިކުރާނެ ކަމަށް މީޑިއާ ރިޕޯޓުތައް ބުނެ އެވެ. މީގެ އިތުރުން އޭނާ ހޯދުމުގެ މަސައްކަތް އިނގިރޭސި ޕްރިމިއާ ލީގުގެ ގަދަބާރު މެންޗެސްޓަރ ސިޓީން ކުރި ކަމަށް ވެސް ރިޕޯޓުތައް ބުނެ އެވެ.

ޗެލްސީއާއެކު އައު އެއްބަސްވުމުގައި ސޮއިކުރުމަށް ނިންމުމަށް ފަހު ޗިލްވެލް ބުނީ، އެ ކުލަބުގައި އޭނާ ހުންނަނީ ނުހަނު އުފަލުން ކަމަށެވެ. އަދި ޗެލްސީގައި ހޭދަ ކުރެވުނީ ވެސް ކާމިޔާބު ދުވަސްތަކެއް ކަމަށާއި، ކުލަބުން ދިގު މުއްދަތަކަށް އޭނާ ބަހައްޓަން ނިންމުމަކީ ވެސް އުފަލެއް ކަމަށެވެ. މީގެ އިތުރުން އޭނާ ބުނީ ކާމިޔާބު ހޯދުމަށް ވަރަށް ބުރަކޮށް މަސައްކަތް ކުރަމުން އަންނަ ކަމަށާއި، ޗެލްސީގެ ސަޕޯޓަރުންގެ މޫނު މައްޗަށް ހިނިތުންވުން ގެނައުމަށް އޭނާ އަށް ކުރެވުނު ކޮންމެ މަސައްކަތެއް ކުރާނެ ކަމަށެވެ.

ޗިލްޗެލް ވަނީ މިހާތަނަށް ޗެލްސީ އަށް 80 މެޗު ކުޅެދީ ނުވަ ލަނޑު ޖަހައިފަ އެވެ. އެ ޓީމާއެކު އޭނާ ވަނީ ޔުއެފާ ޗެމްޕިއަންސް ލީގަކާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް މުބާރާތެއް ކާމިޔާބުކޮށްފަ އެވެ. މީގެ އިތުރުން އެ ޓީމާއެކު އޭނާ ވަނީ އެފްއޭ ކަޕެއްގެ ފައިނަލްގައި ވެސް ކުޅެފަ އެވެ. އުމުރުން 26 އަހަރުގެ ކުޅުންތެރިޔާ އަށް ވަނީ 2018 ވަނަ އަހަރު އިންގްލެންޑުގެ ޤައުމީ ޓީމުން ވެސް ޖާގަ ލިބިފަ އެވެ. އޭގެ ފަހުން މިހާތަނަށް އޭނާ ވަނީ ޤައުމީ ޓީމަށް ކުޅެދިން 18 މެޗުގައި އެއް ލަނޑު ޖަހައިފަ އެވެ.