އަންނަ ސީޒަނުގައި ލިއޮނަލް މެސީ ބާސެލޯނާ އަށް ކުޅޭނެ ކަމަށް އުންމީދު ކުރާ ކަމަށް ޓީމަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ ބުނެފި އެވެ.

ލެވަންޑޯސްކީ މިހެން ބުނީ އަލުން މެސީ ހޯދުމަށް ބާސެލޯނާ އިން މަސައްކަތް ކުރަމުން އަންނަ ކަމަށް ބުނާ ވަގުތެއްގައި އެކަމާ ގުޅޭ ގޮތުން އޭނާއާ ސުވާލު ކުރުމުންނެވެ. ލެވަންޑޯސްކީ ބުނީ އަބަދު ވެސް އޭނާ ޤަބޫލު ކުރާ ގޮތުގައި މެސީ އަކީ ބާސެލޯނާގެ ބައެއް ކަމަށެވެ. އަދި މެސީ އަލުން އަނބުރާ ބާސެލޯނާ އަށް އައިސްފި ނަމަ، އެކަން ވާނީ ވަރަށް އުފާވެރި ކަމެއް ކަމަށެވެ. ލެވަންޑޯސްކީ ޤަބޫލު ކުރާ ގޮތުގައި އަދި ވެސް މެސީގެ ކުރިމަގު ގުޅިފައި ވަނީ ބާސެލޯނާއާ އެވެ. އޭނާ ބުނީ ކުރިއަށް އޮތް ތަނުގައި ވާނެ ގޮތެއް ބުނަން ނޭންގޭ ކަމަށާއި، އެކަމުގެ ވާހަކަ ދައްކާނީ ވެސް އޭނާ ނޫން ކަމަށެވެ. ނަމަވެސް އަންނަ ސީޒަނުގައި މެސީއާއެކު ބާސެލޯނާގައި ކުޅުމަށް އުންމީދު ކުރާ ކަމަށާއި، ޔަޤީނުން ވެސް މެސީ ކަހަލަ ކުޅުންތެރިޔަކު ބާސެލޯނާ އަށް ބޭނުންވާ ކަމަށް ވެސް ލެވަންޑޯސްކީ ވަނީ ބުނެފަ އެވެ.

މީގެ އިތުރުން ލެވަންޑޯސްކީ ވަނީ އޭނާ ބާސެލޯނާ އަށް ބަދަލުވުމާ ގުޅޭ ގޮތުން ވެސް ވާހަކަ ދައްކައިފަ އެވެ. އުމުރުން 34 އަހަރުގެ ކުޅުންތެރިޔާ ބުނީ، އެންމެ ފުރަތަމަ ދުވަހުން ހުރިހާ ކަމެއް ބަދަލުނުވާނެ ކަމަށެވެ. އަދި ފުރަތަމަ ސީޒަންގައި ބާސެލޯނާ އަށް އެންމެ އެކަށީގެންވާ ކުޅުމެއް ކޮންމެ މެޗެއްގައި ނުދެއްކިދާނެ ކަމަށެވެ. ބާސެލޯނާގައި ވަރަށް ގިނަ އައު ކުޅުންތެރިން ތިބި ކަމަށާއި، އަނިޔާގެ މައްސަލަތަކެއް އުޅުނު ނަމަވެސް ނަސީބު ވެސް އެހީވާ މެޗުތައް ދިމާވި ކަމަށް ލެވަންޑޯސްކީ ވަނީ ފާހަގަކޮށްފަ އެވެ. އޭނާ ބުނީ ޔުއެފާ ޗެމްޕިއަންސް ލީގުގައި ވެސް އަދި ކޮޕަ ޑެލް ރޭގެ ދެ ވަނަ ލެގުގައި ރެއާލާ ދެކޮޅަށް ކުޅުނު މެޗުގައި ވެސް ދިމާވީ އެކަހަލަ މައްސަލައެއް ކަމަށެވެ. ކުރިމަގާ ގުޅޭ ގޮތުން ލެވަންޑޯސްކީ ބުނީ ކޮންމެ ކަމެއްގައި ވެސް ކެތްތެރިވާން ޖެހޭނެ ކަމަށާއި، ކުރިއަށް އޮތް ހަފްތާތަކާއި، ސީޒަނުގައި ވެސް ބާސެލޯނާ އިތުރަށް ރަނގަޅުވާނެ ކަމުގެ ޔަޤީންކަން އޮތް ކަމަށެވެ.

ލެވަންޑޯސްކީ މެސީގެ ވާހަކަ ދެއްކިއިރު، މީގެ ކުރިން ވެސް އޭނާ ވަނީ މެސީއާ އެއް ޓީމަކަށް ކުޅެން ބޭނުންވާ ކަމަށް ބުނެފަ އެވެ. މެސީގެ މިހާރުގެ ކުލަބު، ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އާއެކު އޭނާ ހަދާފައިވާ އެއްބަސްވުން މިއަހަރަށް ހަމަވާނެ އެވެ. ޕީއެސްޖީން މެސީގެ އެއްބަސްވުން އައު ކުރުމަށް މަސައްކަތް ކުރަމުން އަންނައިރު، މެސީ ހޯދުމަށް ބާސެލޯނާ އިން ވެސް މަސައްކަތް ކުރެ އެވެ. ނަމަވެސް މިހާތަނަށް މެސީ އޭނާގެ މުސްތަޤުބަލާމެދު ވަކި ގޮތެއް ނިންމައިފައެއް ނުވެ އެވެ.