248 ޕްރޮޖެކްޓް ބަޖެޓް ކުރެވިފައިވޭ
އެޑިޔުކޭޝަން މިނިސްޓަރު ޑރ. އައިޝަތު އަލީ
ރާއްޖޭގެ ސްކޫލްތަކުގައި އެއްދަންފަޅިއަށް ކިޔަވައި ދިނުމާއި، ވަށާޖެހޭ ތައުލީމް ދަރިވަރުންނަށް ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން 48 މަޝްރޫއެއްގެ މަސައްކަތް ނިންމާ އިމާރާތްތައް ބޭނުންކުރަމުންދާ ކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގެ މެންބަރުން ކުރެއްވި ސުވާލުތަކަށް ޖަވާބުދެއްވަމުން އެޑިޔުކޭޝަން މިނިސްޓަރު ވިދާޅުވީ ސަރުކާރުގެ ފުރަތަމަ 100 ދުވަހުގެ ތެރޭގައި ރާއްޖޭގެ ހުރިހާ ސްކޫލެއް އެއްދަންފަޅިއަށް ބަދަލުކުރުމަށް ކުރަންޖެހޭ މަސައްކަތްތައް ދެނެގަނެފައިވާ ކަމަށެވެ. އެއީ ޚާއްސަ އިސްކަމެއްދީގެން ކުރި މަސައްކަތެއް ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެއްދަންފަޅިއަށް ބަދަލުކުރުމަށް 248 ޕްރޮޖެކްޓް ބަޖެޓް ކުރެވިފައިވާ ކަމަށެވެ. މިހާތަނަށް 48 ޕްރޮޖެކްޓެއް ނިމިފައިވާއިރު، 114 ޕްރޮޖެކްޓުގެ މަސައްކަތް ކުރިއަށްދާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ އޭގެ ތެރޭގައި 1780 ކްލާސްރޫމް ހިމެނޭ ކަމަށާއި، 95 މަލްޓިޕަރޕަސް ހޯލް އަދި 596 އެހެނިހެން އިމާރާތުގެ ޕްރޮޖެކްޓް ހިމެނޭކަމަށް މިނިސްޓަރު ވިދާޅުވިއެވެ.
ވަށާޖެހޭ ތައުލީމީ ނިޒާމެއްގެ ދަށުން ސުކޫލުތައް އެއް ދަންފަޅިއަށް ބަދަލު ކުރުމުގެ މަސައްކަތް މިނިސްޓްރީން ކުރަމުންދާއިރު، ރާއްޖޭގެ ހުރިހާ ސުކޫލެއް އެއްދަންފަޅިއަށް ބަދަލު ކުރުމަކީ ރައީސް ސާލިހުގެ ރިޔާސީ ވައުދުފުޅެކެވެ.
