ބާޒާރުކުރަން ބޭނުންކުރާ 50 މައިކްރޯންއަށްވުރެ ތުނި ޕްލާސްޓިކު ކޮތަޅު މިން ކުރާނެ އާލާތް މިނސްޓްރީ އޮފް އެންވަޔަރަމެންޓްގެ ފަރާތުން މޯލްޑިވްސް ކަސްޓަމްސް ސަރވިސް އާ ހަވާލު ކޮށްފިއެވެ.

އެތަކެތި ހަވާލުކޮށްފައި ވަނީ ސިންގަލްޔޫސް ޕްލާސްޓިކުގެ ބާވަތްތައް ރާއްޖެއަށް އެތެރެކުރުން މަނާކުރުމަށް ރައީސުލްޖުމްހޫރިއްޔާ ކަނޑައަޅާފައިވާ ޤަރާރުގެ ދަށުން ފަހި ކުރަން ޖެހޭ ކަންކަން ފަހިކުރުމުގެ ގޮތުންނެވެ.

މި ތަކެތި ހަވާލު ކޮށްފައިވަނީ މިނިސްޓްރީ އޮފް އެންވަޔަރަމަންޓް އާއި މޯލްޑިވްސް ކަސްޓަމްސް އާ ދެމެދު މިއަދު ސޮއި ކުރެވުނު އެމްއޯޔޫ އެއްގެ ދަށުންނެވެ. މި ފަހުމުނާމާގެ ދަށުން ޕްލާސްޓިކު ކޮތަޅުގެ ބޯމިން ބެލުމަށް ހަވާލު ކުރެވޭ އާލަތް (އިންސްޓްރޫމަންޓްސް) ތަކަކީ ދިވެހިރާއްޖެއަށް އެތެރެކުރުން މަނާ ކޮށްފައިވާ 50 މައިކްރޯން އަށްވުރެ ތުނި ޕްލާސްޓިކު ކޮތަޅުގެ ބޯމިން ދެނެގަތުމަށް މޯލްޑިވްސް ކަސްޓަމްސްގެ ފަރާތުން ޗެކް ކުރުމަށް ބޭނުން ކުރެވޭނެ އާލަތްތަކެކެވެ.

މި އެމްއޯޔޫގެ ދަށުން ހަވާލު ކުރެވޭ އާލަތްތައް ބޭނުންކޮށްގެން ދިވެހިރާއްޖެއަށް އެތެރެކުރެވޭ ޕްލާސްޓިކު ކޮތަޅުތަކުގެ ބޯމިން ޗެކް ކުރުމުގެ އިތުރުން ޕްލާސްޓިކު ކޮތަޅުގެ ބޯމިނުގެ އެކި ސައިޒުތަކުގެ ރިކޯޑް ކޮށް ބެލެހެއްޓުމަށް ވެސް ފަސޭހަ ވެގެންދާނެއެވެ. އަދި, މި ޑޭޓާ ރިކޯޑު ކޮށް ބެލެހެއްޓުމުގެ ސަބަބުން  ދިވެހިރާއްޖެއަށް އެތެރެވަމުންދާ ޕްލާސްޓިކު ކޮތަޅުގެ ސައިޒު ދެނެގަނެވޭނެއެވެ.

މި ރަސްމިޔާތުގައި މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖެ އެނޑް ޓެކްނޮލޮޖީ ގެ ފަރާތުން ސޮއި ކުރައްވާފައިވަނީ ޑެޕިއުޓީ މިނިސްޓަރ، އަލްފާޟިލް މުޙައްމަދު އަންސަރު އަދި މޯލްޑިވްސް ކަސްޓަމްސް ސަރވިސް ގެ ފަރާތުން ޑެޕިއުޓީ ކޮމިޝަނަރ، އަލްފާޟިލް މުޙައްމަދު މާނިޢުއެވެ.