ބަޖެޓް 2022: އަންނަ އަހަރު ޕްލާސްޓިކް ކޮތަޅުން ޓެކްސް ނަގަން ފަށަނީ
އާމްދަނީ އިތުރުކުރުމަށް ހުށަހަޅާ އައު ކަންތައްތަކުން 727 މިލިއަން ރުފިޔާ ލިބޭނެކަމަށް އަންދާޒާކޮށްފައިވޭ
ކަނޑުތެރޭގައި ޕްލާސްޓިކް ކޮތަޅެއް، އެންވަޔަރަމެންޓް މިނިސްޓްރީން އެކުލަވާލި ސިންގަލް ޔޫސް ޕްލާސްޓިކް ފޭސްއައުޓް ޕްލޭނާ އެއްގޮތްވާ ގޮތުގެ މަތިން ޕްލާސްޓިކް ކޮތަޅުން ޓެކްސް ނެގުމަށް ވަނީ ނިންމާފައި
ޕްލާސްޓިކް ކޮތަޅުން ޓެކްސް ނެގުމަށް އަންނަ އަހަރުގެ ބަޖެޓްގައި ހިމަނައިފިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރ އިބްރާހީމް އަމީރު ވަނީ އަންނަ އަހަރު ދައުލަތުގެ އާމްދަނީ އިތުރުކުރުމަށް ހުށަހަޅާ ކަންތައްތަކަކީ ދައުލަތުގެ މައިގަނޑު ސިޔާސަތުތަކަށް ބާރުދޭ، ސަރުކާރުގެ ވައުދުތަކާ އެއްގޮތަށް އެކުލަވާލެވިފައިވާ ކަންކަން ކަމަށް ވިދާޅުވެފައެވެ. އެގޮތުން އާމްދަނީ އިތުރުކުރުމަށް ހުށަހަޅާ އައު ކަންތައްތަކުގެ ތެރޭގައި ޕްލާސްޓިކް ކޮތަޅުން ޓެކްސް ނެގުން ހިމެނޭކަމަށް މިނިސްޓަރ ވިދާޅުވިއެވެ.
ޕްލާސްޓިކް ކޮތަޅުން ޓެކްސް ނެގުމަށް މި ނިންމީ މިދިޔަ އަހަރު އެންވަޔަރަމެންޓް މިނިސްޓްރީން އެކުލަވާލި ސިންގަލް ޔޫސް ޕްލާސްޓިކް ފޭސްއައުޓް ޕްލޭނާ އެއްގޮތްވާ ގޮތުގެ މަތިންނެވެ. އެ ޕްލޭންގައި މާކެޓް ބޭސްޑް އިންސްޓްރޫމަންޓެއްގެ ގޮތުން ޕްލާސްޓިކް ކޮތަޅު ހިމެނޭ ގޮތަށް ބައެއް ބާވަތްތަކުން ޓެކުހެއް ނެގުމަށް ވަނީ ރާވާފައެވެ. މި ޓެކްސް ނެގުމަށް އެ ޕްލޭންގައި ކަނޑައަޅާފައިވަނީ ކޮންމެ ސައިޒެއްގެ ކޮތަޅަކަށް ވެސް ދެ ރުފިޔާއެވެ. މި ޓެކްސް ނަގަން ރާވާފައިވަނީ އަންނަ އަހަރުގެ ޖޫން މަހުން ފެށިގެންނެވެ.
ބަޖެޓްގައިވާ ގޮތުން އަންނަ އަހަރު ޕްލާސްޓިކް ކޮތަޅު ޓެކުހުން ލިބޭނެކަމަށް އަންދާޒާކޮށްފައިވާ 47.7 މިލިއަން ރުފިޔާއެވެ.
އަންނަ އަހަރު އާމްދަނީ ހޯދުމަށް ދެން ހުށަހަޅާފައިވާ ކަންކަމަކީ ރިޒޯޓްތައް ހެދުމަށް އައު ރަށްތައް ދޫކުރުމާއި، ރިއަލް އެސްޓޭޓް ޓޫރިޒަމް އިތުރަށް ފުޅާކުރުމާއި، ދިވެހިރާއްޖޭގެ ރަށްތަކުގައި ހިއްކޭ ބިމުގެ ވަކި އިންސައްތައެއް އާންމުންނަށް ވިއްކުމުގެ ސިޔާސަތު ތަންފީޒުކުރުމެވެ. މީގެ ތެރެއިން ގިނަ ސިޔާސަތުތަކަކީ މިހިނގާ 2021 ވަނަ އަހަރުގެ ބަޖެޓުގައި ހިމެނުނު ނަމަވެސް އެކިއެކި ގޮންޖެހުންތަކާހުރެ، ތަންފީޒުކުރުން މިއަންނަ އަހަރަށް ފަސްކުރެވިފައިވާ ކަންކަން ކަމަށް ބަޖެޓް ހުށަހަޅުއްވަމުން މިނިސްޓަރ ވިދާޅުވިއެވެ.
އަންނަ އަހަރު ބަޖެޓުގައި އާމްދަނީ އިތުރުކުރުމަށް ހުށަހަޅާ އައު ކަންތައްތަކުން 727 މިލިއަން ރުފިޔާ ލިބޭނެކަމަށް އަންދާޒާކޮށްފައިވެއެވެ.
އައު ކަންތައްތަކުން ލިބޭނެކަމަށް އަންދާޒާކުރާ އާމްދަނީ:
ރިއަލް އެސްޓޭޓް ޓޫރިޒަމްއަށް ބިން ދޫކުރުމަކީ 2021 ވަނަ އަހަރުގެ ބަޖެޓުގައި ވެސް އާމްދަނީ އިތުރުކުރުމަށް ހުށަހަޅާފައިވާ ކަމެކެވެ. ރިއަލް އެސްޓޭޓް ޓޫރިޒަމަށް ރަށްތައް ދޫކުރުމަށް ރާވައިފައިވަނީ މޯލްޑިވްސް ފަންޑްސް މެނޭޖްމަންޓް ކޯޕަރޭޝަން (އެމްއެފްއެމްސީ) މެދުވެރިކޮށެވެ.
މިގޮތުން 2022 ވަނަ އަހަރު، މި ކުންފުނި މެދުވެރިކޮށް 4 ރަށެއް ހިއްކައި އެ ރަށްތައް ރިއަލް އެސްޓޭޓް ޓޫރިޒަމަށް ދޫކުރެވިގެންދާނެކަމަށް އަންދާޒާކޮށްފައިވެއެވެ. ރިއަލް އެސްޓޭޓް ޓޫރިޒަމް ތަރައްގީކުރުމަށް ރާވައިފައިވާ ގޮތުން މި ރަށްތައް ރިއަލް އެސްޓޭޓް ޓޫރިޒަމްގެ ބޭނުމަށް ދޫކުރުމުން ދައުލަތުގެ އާމްދަނީ އިތުރުވެގެންދާނީ މި ވިޔަފާރިން އެމްއެފްއެމްސީއަށްވާ ފައިދާއިން ދައުލަތަށް ދޭ ޑިވިޑެންޑުގެ މިންވަރަކުންނެވެ.
ރިއަލް އެސްޓޭޓް ޓޫރިޒަމް ތަރައްގީކުރުމަށް އެ ކުންފުނިން ކުރަންޖެހޭ ޚަރަދުތައް ދައުލަތުގެ ބަޖެޓަށް ބުރަނުވާނޭހެން ހިފެހެއްޓުމަށާއި މި މަސައްކަތުން ދައުލަތަށް އާމްދަނީ އިތުރުކުރެވޭނެ އިންތިޒާމު ހަމަޖެއްސުމަށް، މި ވިޔަފާރި ހިނގުމުން 2022 ވަނަ އަހަރު އެ ކުންފުނިން އިންޓެރިމް ޑިވިޑެންޑް ޑިކްލެއަރކުރުމަށް ވަނީ ރޭވިފައެވެ. އެގޮތުން 2022 ވަނަ އަހަރު އިންޓެރިމް ޑިވިޑެންޑްގެ ގޮތުގައި 231.3 މިލިއަން ރުފިޔާ ލިބޭނެކަމަށް އަންދާޒާކޮށްފައިވެއެވެ.
ޓޫރިސްޓް ރިސޯޓު ތަރައްގީކުރުމަށް 12 ރަށެއް ހުޅުވައިލައި އޭގެ ކޮންމެ ރަށަކުން އެކުއިޒިޝަން ފީގެ ގޮތުގައި، 700,000 އެމެރިކާ ޑޮލަރާއި 1 މިލިއަން އެމެރިކާ ޑޮލަރާ ދެމެދުގެ އަދަދެއް 2022 ވަނަ އަހަރު ދައުލަތަށް ލިބޭނެކަމަށް އަންދާޒާކޮށްފައިވެއެވެ.
މީގެ ގިނަ ރަށްތަކަކީ ކުދި އަދި އިންވެސްޓްކުރުމަށް ޑިމާންޑް ދަށްކަމަށް ފެންނަ ރަށްތަކަކަށްވާތީ އެކުއިޒިޝަން ފީގެ ރޭޓު، ކުރީގެ ރޭޓުތަކާ އަޅައިބަލާއިރު ދަށްކަމަށް ބަޖެޓްގައި ފާހަގަކޮށްފައިވެއެވެ. މި ރަށްތައް ވިއްކުމަށް ޓޫރިޒަމް މިނިސްޓްރީން ގިނަ މަސައްކަތްތަކެއް ކުރަމުންދާއިރު 2022 ވަނަ އަހަރު ރިސޯޓުތައް ތަރައްގީކުރުމަށް އައު ރަށްތައް ދޫކޮށްގެން 148.0 މިލިއަން ރުފިޔާ ލިބޭނެކަމަށް އަންދާޒާކޮށްފައިވެއެވެ.
ދައުލަތުން ހިއްކާފައިވާ ބިމަށް ކޮށްފައިވާ ޚަރަދުގެ ބައެއް ދައުލަތަށް އަނބުރާ ހޯދުމުގެ ގޮތުން، ދައުލަތުން ހިއްކާފައިވާ ބިމުގައި ދިރިއުޅުމަށް ދޫކުރާ 30 އިންސައްތަ އަމިއްލަ ފަރާތްތަކަށް ވިއްކުމަށް، 2021 ވަނަ އަހަރުގެ ބަޖެޓުގައި އާމްދަނީ އިތުރުކުރުމަށް ކުރެވިދާނެ އައު ކަމެއްގެ ގޮތުގައި ވަނީ ހިމަނާފައެވެ. އެހެން ނަމަވެސް ތަފާތު އެކި ގޮންޖެހުންތަކުގެ ސަބަބުން މި އަހަރުގެ ތެރޭގައި މި ސިޔާސަތުވަނީ ތަންފީޒުނުކުރެވިއެވެ.
މީގެ ތެރޭގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން މި ބިންތަކުގެ އިހްތިސާސް ކަނޑައެޅުމަށް ދަތިވުން ވެސް ހިމެނެއެވެ. އެހެންކަމުން މި ގޮންޖެހުންތައް ހައްލުކޮށް 2022 ވަނަ އަހަރު މި ފަދަ ބިން ވިއްކައިގެން 300 މިލިއަން ރުފިޔާ ލިބޭނެކަމަށް ވަނީ އަންދާޒާކޮށްފައެވެ.
އަންނަ އަހަރަށް ހުށަހަޅާފައިވަނީ 36.9 ބިލިއަން ރުފިޔާގެ ބަޖެޓެކެވެ. ޚަރަދުގެ ގޮތުގައި ހިނގާނެކަމަށް ބެލެވެނީ 34.0 ބިލިއަން ރުފިޔާއެވެ. 2022 ވަނަ އަހަރު ޖުމުލަ އާމްދަނީ އާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް އަންދާޒާކުރެވެނީ 24.3 ބިލިއަން ރުފިޔާއެވެ.
