ވެމްކޯއިން ޑަސްބިން ކޮތަޅު ވިއްކަނީ!

ކަސްޓަމަރުންގެ އެދުމުގެ މަތިން ޑަސްބިން ކޮތަޅު ވިއްކަން ފަށާފައިވާ ކަމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ބުނެފިއެވެ.

ކޮވިޑް-19 ފެތުރެމުންދާތީ މާލެސިޓީ ވަނީ ލޮކްޑައުން ކޮށްފައެވެ. އާންމު ހާލަތުގައި ވިޔަފާރި ކުރާ އުސޫލުން ވިޔަފާރި ކުރުމުގެ ފުރުސަތު ބަންދު ވެފައިވާއިރު، ޑޮލިވަރީ ކޮށްގެން ގެންގެން ގެންނަ ތަކެތި ރަނގަޅަށް ދޮވެ، ކޮތަޅު އެއްލާލުމަށް ކަމާ ބެހޭ ފަރާތްތަކުން އެދިފައިވެއެވެ.

ވެމްކޯއިން ބުނީ މިހާލަތުގައި ކަސްޓަމަރުންގެ ފަރާތުން ލިބޭ އެންމެ ބޮޑު ޝަކުވާއަކީ ޑަސްބިން ކޮތަޅު ލިބުމުގެ ޝަކުވާ ކަމަށެވެ. އަދި ގިނަ ކަސްޓަމަރަން ކޮތަޅު ފޯރުކޮށް ދިނުމަށް އެދެމުންދާ ކަމަށެވެ.

އެގޮތުން ކޮތަޅު ފޯރުކޮށްދިނުމުގެ އިންތިޒާމްތައް ހަމަޖައްސާފައިވާ ކަަމަށް ވެމްކޯއިން ބުނެއެވެ.

ވެމްކޯއިން ބުނީ ކޮންމެ ދުވަހެއް ދުވަހެއް ހެނދުނު 10:00ން ހަވީރު 16:00ށް އޯޑަރު ދެވޭނެ ކަމަށެވެ. އޯޑަރު ދިނުމަށް ކަސްޓަމަރުގެ ނަމާއި ކޮންޓެކްޓް ނަންބަރު، ގޭގެ އެޑްރެސް އަދި ކޮތަޅު ބޭނުންވާ އަދަދު ލިޔުމަށްފަހު 7621666 އަށް ވައިބާ ކުރުމަށް ވެމްކޯއިން އެދިފައިވެއެވެ.

އޯޑަރު ބަލައިގަންނާނީ ވައިބަރ މެސެޖް މެދުވެރިކޮށް އެކަނިކަން ފާހަގަކޮށް ވެމްކޯއިން ބުނީ ކޮންމެ ގޭބީސީ އަކަށް އޯޑަރު ކުރެވޭނީ ދުވާލަކު 3 ބޮނޑި ރަތް ކޮތަޅު (ބޮނޑި އަކު 60 ކޮތަޅު) ކަމަށެވެ. އަދި ދުރާލާ ފައިސާ ނުފޮވާ އޯޑަރު ނަންބަރު ޔަގީން ކުރުމަށް އެދިފައިވެއެވެ،

ވެމްކޯ އިން ބުނީ 60 ކޮތަޅުގެ ބޮނޑިއެއްގެ އަގަކީ 150 ރުފިޔާ ކަމަށާއި އޯޑަރު ދިނުމަށްފަހު އެކުންފުނީގެ އެކައުންޓު ނަންބަރު 7730000058275 (ބީއެމްއެލް އެކައުންޓް) އަށް ލާރި ޓްރާންސްފާކޮށް، ސްލިޕްކޮޅު ވައިބާ ކުރުމުން ކޮތަޅު ޑެލިވާ ކޮށްދޭނެ ކަމަށެވެ.

ވެމްކޯއިން މާލެ، ހުޅުމާލެ އަދި ވިލިމާލެގެ ކަސްޓަމަރުންނަށް ކޮތަޅު ފޯރުކޮށް ދިނުމަށް ނިންމާފައި ވާއިރު، ކޮތަޅު ޑެލިވަރ ކުރުމަށް ތިން ދުވަސް ނަގާނެ ކަމަށެވެ.

ކަސްޓަމަރުންގެ އެދުމުގެ މަތިން ޑަސްބިން ކޮތަޅު ވިއްކަން ފަށާފައިވާއިރު، ކުނި އުފައްދާ މިންވަރު ވީހާވެސް މަދު ކުރުމަށާއި، މާލެ ސަރަހައްދުގެ ގޭބީސީތަކުގައި އުފެދޭ ކުނި މެންދުރު 12 އާއި 2 އާ ދެމެދު ގޭގެ ތިރިއަށް ބޭލުމަށް ވެމްކޯއިން އެދިފައިވެއެވެ.