ފުއްގިރި ހިޔާނާތް: ކްރިކް ރިޒާގެ ފަރާތުން އިސްތިއުނާފުކުރި މައްސަލަވެސް ކާމިޔާބެއް ނުވި
ކްރިކް ރިޒާގެ މައްޗަށް 2 ދައުވާއެއް އުފުލާފައިވޭ
މއ. ކުރިކީލަހިޔާ އަހުމަދު ކްރިކް ރިޒާގެ ފަރާތުން އިސްތިއުނާފުކުރި މައްސަލަ
ރ. ފުއްގިރި ހިޔާނާތުގެ މައްސަލައިގެ ޝަރީއަތުގެ ކުރީގެ ހުށަހެޅުންތަކާ ގުޅޭގޮތުން، އަހުމަދު ކްރިކު ރިޒާގެ ފަރާތުން ހައިކޯޓުގައި އިސްތިއުނާފުކޮށްފައިވާ މައްސަލަ އޭނާއަށް ނާކާމިޔާބުވެއްޖެއެވެ.
މި މައްސަލައިގައި ކްރިކް ރިޒާގެ މައްޗަށް 2 ދައުވާއެއް އުފުލާފައިވެއެވެ. އެއީ މަނީލޯންޑަރިންގގެ ކުށުގެ ދައުވާއަކާއި ރިޝްވަތު ހިފުމުގައި މެދުވެރިއަކަށްވުމުގެ ކުށުގެ ދައުވާއެކެވެ.
ހައިކޯޓުގައި މި މައްސަލައިގެ ރިޔާސަތު ބަލަހައްޓަވަނީ ފަނޑިޔާރު ހުސައިން ޝަހީދެވެ. ދެން ހިމެނިވަޑައިގަންނަވަނީ ފަނޑިޔާރު ދީބާނާޒް ފަހުމީ އަދި ފަނޑިޔާރު ފާތިމަތު ފަރުހީޒާއެވެ.
އޭނާގެ ފަރާތުން އިސްތިއުނާފުކުރި ނުކުތާތަކުގެ ތެރޭގައި ދައުވާ އުފުލުމުގައި އުނިކަމެއްވާކަމަށް ބަޔާންކޮށް ހުށައެޅި ހުށައެޅުން ބޭރުކޮށްލާފައިވާތީ ހުށައަޅާ އިސްތިއުނާފީ ނުކުތާއެއް ހިމެނެއެވެ. އެ ނުކުތާ އޭނާއަށް ހައިކޯޓުގައި ކާމިޔާބެއް ނުކުރެވުނެވެ.
އޭގެ އިތުރުން، ދައުލަތުން ހުށަހަޅާފައިވާ ހެކިތަކުގެ ތެރޭގައި ހިމެނޭ އަދީބާއި ޒިޔަތުގެ ހެކިބަސް ބަލައި ނުގަނެވޭނެކަމަށް ފާހަގަކުރުމަށް ދިފާއަށް ފުރުސަތު ނުދީ، އެ ދެމީހުންގެ ހެކިބަސް ބަލައިގެންފައިވާކަމަށް ބުނެ ނުކުތާއެއް ހުށަހަޅާފައިވެއެވެ. އެ ނުކުތާވެސް އޭނާއަށް ހައިކޯޓުގައި ކާމިޔާބެއް ނުކުރެވުނެވެ.
އޭގެ އިތުރުން، އަހުމަދު އަދީބާއި އަބްދުﷲ ޒިޔަތު ތަހުގީގަށް ދީފައިވާ ބަޔާނުގައި ހިމެނޭ އިންޓަރވިއު އޯޑިއޯ ވީޑިއޯ ރެކޯޑިންގެ ދިފާއަށް ދޫކުރާނެ ތަނެއް ނެތްކަމަށް ދަށު ކޯޓުން ނިންމާފައިވާތީ އިސްތިއުނާފުކުރި ނުކުތާއެއްވެސް ހިމެނެއެވެ. ޖުމުލަ 5 އިސްތިއުނާފީ ނުކުތާއެއް އޭނާގެ ފަރާތުން ވަނީ ހުށަހަޅާފައެވެ.
އެހެންނަމަވެސް އެ ނުކުތާތަށް އޭނާއަށް ހައިކޯޓުގައި ކާމިޔާބު ކުރެވިފައެއް ނުވެއެވެ. ހައިކޯޓުގައި މި މައްސަލަ ނިންމަވާފައިވަނީ 3 ފަނޑިޔާރުންގެ އިއްތިފާޤުންނެވެ.
ރ ފުއްގިރި ހިޔާނާތުގެ މައްސަލައިގެ ޝަރީއަތުގެ ކުރީގެ ހުށަހެޅުންތަކާ ގުޅޭގޮތުން، ސަން ކޮންސްޓްރަކްޝަން އެންޑް އިންޖިިނިޔަރިންގ ޕްރައިވެޓް ލިމިޓެޑާއި ސަން އިންވެސްޓްމަންޓުގެ ފަރާތުން ހައިކޯޓުގައި އިސްތިއުނާފުކޮށްފައިވާ މައްސަލަ އެ ކުންފުނިތަކަށް ވަނީ ނާކާމިޔާބުވެފައެވެ.
