މަޖިލީހަށް އާއްމުންގެ ފަރާތުން ޓްރާންސްޕޯޓާއި ބެހޭ މައްސަލަ ފުންޏެއް، މިނިސްޓަރު ކޮމިޓީއަށް
މަޖިލީހަށް ޓްރާންސްޕޯޓް މިނިސްޓްރީ އާއި ގުޅުން ހުރި ގިނަ މައްސަލަތަކެއް ހުށަހަޅާފައިވޭ
މަޖިލީހަށް ޓްރާންސްޕޯޓް މިނިސްޓަރު ހާޒިރުކުރުން
މަޖިލީހަށް އާއްމުންގެ ފަރާތުން ޓްރާންސްޕޯޓާއި ބެހޭ ގިނަ މައްސަލަތަކެއް ހުށަހަޅާފައިވާތީ ރައްޔިތުންގެ މަޖިލީހުގެ ޤައުމީ ތަރައްޤީ އާއި ތަރިކައިގެ ކޮމިޓީ އަށް ޓްރާންސްޕޯޓް މިނިސްޓަރު އައިޝަތު ނަހުލާ ހާޒިރުކޮށްފިއެވެ.
ހޯމަ ދުވަހު ބޭއްވި އެ ކޮމިޓީ އަށް މިނިސްޓަރުގެ އިތުރުން މިނިސްޓްރީގެ އިސް އެހެން ބައެއް ބޭފުޅުން ވެސް ހާޒިރުވެވަޑައިގެންނެވިއެވެ. މަޖިލީހަށް ހުށަހަޅާފައިވާ މައްސަލަތަކުގެ ތެރޭގައި ގޭގެ ވެރިފަރާތަށް ނޭނގި އެ ގޭގެ ގަރާޖުގައި ވެހިކަލް ބޭއްވުމަށް ހުއްދަ ދިން މައްސަލަ އެއް ހިމެނެއެވެ. އެ މައްސަލައިގައި ބުނެފައި ވަނީ ގޭގެ ވެރިފަރާތަށް ނޭނގި އެ ގޭގެ ގަރާޖުގައި ވެހިކަލް ބާއްވަން ހުއްދަ ދީފައިވާ މައްސަލަ 15 ސެޕްޓެމްބަރު 2022ގައި މިނިސްޓަރަކަށް ހުށަހަޅާފައިވާ ކަމަށެވެ.
އެހެންނަމަވެސް އެ މައްސަލަ މިނިސްޓްރީގެ ސަމާލުކަމަށް އައުމާއި ގުޅިގެން އެ ގަރާޖަށް ރެޖިސްޓްރީކޮށްފައިވާ އެއް އުޅަނދުގެ ރެޖިސްޓްރީ ބާތިލްކޮށްފައިވާ ކަމަށް އަންގާފައިވާ ކަމަށް މަޖިލީހަށް ހުށަހެޅި މައްސަލައިގައި ވަނީ ބުނެފައެވެ. މީގެ އިތުރުން މަޖިލީހަށް ހުށަހަޅާފައިވާ މައްސަލަތަކުގެ ތެރޭގައި ދޯންޏެއްގެ ރަޖިސްޓަރީ ބާތިލު ނުކޮށް އަދި ސަބަބު އެންގުމަކާއި ނުލާ ދޯންޏަށް އެހެން ރަޖިސްޓްރީ ނަމްބަރެއް ދިން މައްސަލަ އެއް ހިމެނެއެވެ. އަދި ޓްރާންސްޕޯޓްގެ އެހީތެރިކަމާއެކު އެ ދޯނީގެ ރެޖިސްޓްރީ އެހެން ފަރާތެއްގެ ނަމަށް ބަދަލުކުރަން މަސައްކަތްކުރާ ކަމަށް މަޖިލީހަށް ހުށަހަޅާފައިވާ މައްސަލައިގައި ބުނެފައިވެއެވެ. ސައްހަ ނޫން ވެހިކަލް ރެޖިސްޓްރީ ކުރިކަން ހާމަވީ ފޯޖް ކޮށްފައިވާ ލިޔުންތަކެއް ހުށަހަޅާ އޮޅުވާލައިގެން ރަޖިސްޓްރީކުރި ވެހިކަލްތައް ދެނެގަތުމަށް ޓަކައި ކުރި އޮޑިޓަކުން ކަމަށް މިނިސްޓްރީއިން އެ ފަރާތަށް އަންގާފައިވާ ކަމަށް ވެސް މަޖިލީހަށް ހުށަހެޅި މައްސަލައިގައި ވަނީ ބުނެފައެވެ.
މީގެ އިތުރުން ގަރާޖު ރެޖިސްޓްރީކުރަން މިނިސްޓްރީ އަށް ހުށަހެޅިތާ 4 މަސް ވީ އިރުވެސް ޚިދުމަތް ފޯރުކޮށްދެވިފައި ނުވާ މައްސަލަ އެއްވެސް ވަނީ ހުށަހަޅާފައެވެ. އެ މައްސަލައިގައި މިނިސްޓްރީން މައްސަލަ ހުށަހެޅި ފަރާތަށް މީގެ ކުރިން ދިން ޖަވާބުގައި ބުނެފައި ވަނީ ޚިދުމަތަށް އެދި ހުށަހެޅި ޤަރާރު ހުރީ ޤަވާއިދާއި އެއްގޮތަށް ނޫން ކަމަށާއި އެކަންކަން އިސްލާހުކުރަން ދިން ފުރުސަތުގައި އެކަން ކޮށްފައި ނުވާ ކަަމަށެވެ. އަދި މިނިސްޓްރީން ގަނެފައިވާ ޑޮމެއިން ނަމްބަރު ބޭނުން ކުރުމުގެ ހުއްދަ ލިބިފައި ނުވާތީ ހުށަހަޅާފައިވާ މައްސަލައެއް ވެސް އޭގެ ތެރޭގައި ހިމެނެއެވެ. އެ މައްސަލަ އާއި ގުޅިގެން ޑޮމެއިންތަކާއި ގުޅިގެން ޚިދުމަތް ފޯރުކޮށްދިނުމަށް ދަތިތައް ހުރި ކަމަށާއި އޮޅުވާލުންތަކެއް އެކަމުގައި ހުރި ކަމަށް ފާހަގަކުރެވިފައިވާ ކަމަށް މިނިސްޓްރީން ވަނީ ބުނެފައެވެ.
މަޖިލީހަށް ހުށަހަޅާފައިވާ އިތުރު މައްސަލަތަކުގެ ތެރޭގައި ޓެކްސީގެ އަގު ކަނޑައެޅީ ޓެކްސީ ސެންޓަރުތަކާއި މަޝްވަރާ ނުކޮށް ކަމަށް ބުނާ މައްސަލައަކާއި، 20 އަހަރުވެފައިވާ އުޅަނދުތަކަށް ޓެކްސީ ކުރުމުގެ ހުއްދަ ބާތިލްވާ ގޮތަށް ޓެކްސީ ޤަވާއިދު މަނާކޮށް ފިޔަވަޅު އެޅުމާއި، ޓެކްސީ ޤަވާއިދާއި އެއްގޮތަށް އުޅަނދުތަކުގެ ބިއްލޫރި ބަދަލުކުރުމާއި ގުޅުން ހުރި މައްސަލަތައް ވަނީ ހުށަހަޅާފައެވެ.
