މަސްވެރިކަމުގެ ސިނާއަތަށް ހެޔޮ ބަދަލެއް ގަނައުމަށް މިފްކޯއިން ކުރަމުންދާ މަސައްކަތުގެ ތެރެއިން ރާއްޖެއަށް ގެނެސްފައިވާ ''ޖަޒީރާ 103 ބޯޓު'' ވަރަށް އަވަހަށް އޮޕަރޭޝަނަށް ނެރޭނެ ކަަމަށް އެކުންފުނިން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މިފްކޯގެ ސީއީއޯ އިސްމާއީލް ފައުޒީ ވިދާޅުވީ އާއްމު ގޮތެއްގައި ރަނގަޅު މަސްވެރިކަމެއްގައި ކޮންމެ ދުވަހަކު ވެސް 600 އާއި 700 ޓަނުގެ މަސް ގެންނަ ކަމަށާއި، މިބޯޓާއެކު ވެސް ފަސޭހަކަމާއެކު މަސް ކިރުވާލެވޭނެ ކަމަށެވެ.

އިސްމާއީލް ވިދާޅުވީ މި ބޯޓްގެ ދެ ފަރާތުން އެއްފަހަރާ މަސްކިރޭގޮތަށް 2 ކްރޭން ހަރުކޮށް ހަދާފައިވާ ބޯޓެއްކަމަށެވެ. އަދި މި ބޯޓަކީ ދުވާލަކު 120 މެޓްރިކް ޓަނު މަސްގަނެ ފިނިކުރުމުގެ ގާބިލުކަން ލިބިފައިވާ، ޖުމްލަ 420 މެޓްރިކް ޓަނުގެ މަސް ރައްކާކުރެވޭ ގޮތަށް ފަރުމާ ކޮށްފައިވާ ބޯޓެއް ކަމަށެވެ. އަދި ވިދާޅުވީ ދެތިން ދުވަހުގެ ސްޓޯރޭޖް ބޯޓުގައި މެނޭޖްކުރެވޭނެ ކަމަށާއި، މިހާރުގެ ކެޕޭސިޓީއަށްވުރެ ދުވާލަކަށް ފްރީޒް ކުރެވޭ ކެޕޭސިޓީ 120 ޓަނަށް އިތުރުކުރެވޭނެ ކަމަށެވެ.

ބޯޓު އޮޕަރޭޝަނަށް ނެރުމުގެ މަސައްކަތަށް އިޝާރާތް ކުރައްވައި އިސްމާއީލް ވިދާޅުވީ އެމަސައްކަތް ކުރަމުންދާ ކަމަށާއި، ވަރަށް އަވަހަށް އެބޯޓު އޮޕަރޭޝަނަށް ނެރޭނެ ކަމަށެވެ.

އަދި ވިދާޅުވީ މިމަހުގެ ފަހުގެ ހަފްތާއަށް ދާއިރު ބޯޓުގެ މަސައްކަތްތައް ނިންމާ، ބޯޓުގެ އޮޕަރޭޝަން ފަށައިގަނެވޭނެ ކަމަށެވެ.

ޖަޒީރާ 103 ބޯޓު ރާއްޖެއަށް ގެނެސްފައިވަނީ އޭޕްރީލް މަހުގެ 6 ވަނަ ދުވަހުއެވެ. ޖަޒީރާ 103 އަކީ ފަސޭހަ ކަމާއެކު މަސްކިރުމުގެ ވަސީލަތްތައް ގާއިމް ކޮށްފައިވާ ބޯޓަކަށް ވުމުން، މަސްވެރިކަމުގެ މޫސުމުގައި އެންމެ ރަގަޅަށް މަސްބާނާ ސަރަހައްދަކަށް ދަތުރުކޮށް މަސްވެރިން ބާނާ މަސް ކިރުމަށް އިތުރު ލުއިފަސޭހަ ތަކެއް ލިބޭނެއެވެ.

މިހާރު ރާއްޖޭގައި މަސްވެރިކަންކުރާ އުޅަނދުފަހަރުގެ ސައިޒު ބޮޑުވެ، މަސްވެރިން ބާނާ މަހުގެ އަދަދު ވަނީ ވަރަށް ބޮޑަށް އިތުރުވެފައެވެ. މިކަމާއި ގުޅިގެން މިފްކޯގެ މަސްކިރުމުގެ ގާބިލްކަން އިތުރުކުރުމަށް މިފްކޯއިން ދަނީ ގިނަ މަސައްކަތްތައް ކުރަމުންނެވެ. އެގޮތުން މަސް ކިރާ ސެންޓަރުތަކުގެ ފްރީޒިންގ އަދި ސްޓޯރޭޖު ކެޕޭސިޓީ އިތުރުކޮށް، މަސްކިރާ އިތުރު ބޯޓުފަހަރު ހޯދުމުގެ އިތުރުން ރާއްޖޭގެ އެކި ހިސާބުތަކުގައި މަސް ގަންނަ އިތުރު ސެންޓަރުތަކެއް ގާއިމްކުރުމުގެ މަސައްކަތް ދަނީ ކުރަމުންނެވެ.