ދެ ދަރިންނާއެކު ގެއިން ނެރެލި އަންހެން މީހާ އަށް އެހީތެރިކަން ފޯރުކޮށްދީފިން: ޖެންޑަރ މިނިސްޓްރީ
އެ އަންހެން މީހާ ދިިރިއުޅޭ ތަނަށް ގޮސް ހާލަތު ބަލާފައިވޭ
އަންހެން މީހާ އޭނާގެ ދެ ދަރިންނާއެކު މަގުމަތީގައި
ދެ ދަރިންނާއެކު ގެއިން ނެރެލި އަންހެން މީހާއަށް އެހީތެރިކަން ފޯރުކޮށްދީފައިވާކަމަށް ޖެންޑަރ މިނިސްޓްރީން ބުނެފިއެވެ.
ޖެންޑަރ މިނިސްޓްރީން ބުނީ އަންހެނަކު އޭނާގެ ދެ ކުދިންނާއެކު އެމީހުން ދިރިއުޅެމުންދިޔަ ގެއިން ނެރުނު މައްސަލައެއް މިނިސްޓްރީއަށް ހުށަހެޅުމާއި ގުޅިގެން އެ ފަރާތް މިހާރު ދިރިއުޅެމުންދާ ތަނަށް ގޮސް ހާލަތު ބަލައި، ބޭނުންވާ އެހީތެރިކަން ފޯރުކޮށްދީފައިވާ ކަމަށެވެ.
ގެވެށި އަނިޔާ ހުއްޓުވުމުގެ ގާނޫނުގެ ދަށުން، ގެވެށި އަނިޔާގެ ޝިކާރައަކަށް ވާ ފަރާތަށް ލިބިދޭ ގާނޫނީ ހިމާޔަތާއި ރައްކާތެރިކަން ހޯދަން މިނިސްޓްރީން މަގުފަހިކޮށްދީފައިވާކަމަށާއި އެގޮތުން އެކި ފަހަރުމަތިން ގާނޫނީ ހައްގު ހޯދައިދިނުމަށް މަސައްކަތްކޮށްފައި ވާކަމަށް ވެސް ޖެންޑަރއިން ބުނެއެވެ.
ދެ ދަރިންނާއެކު ގެއިން ނެރެލުމުން ހާލުގައި ޖެހިފައިވާ އަންހެނަކަށް އެހީ ހޯދުމުގެ މަސައްކަތް، މަންމައިންގެ ހައްގުގައި މަސައްކަތްކުރާ "މަމްސް އެއިޑް" އިން ފެށިއެވެ. އެ ޖަމިއްޔާއިން ބުނީ، 9 އެޕްރީލް 2023 ވަނަ ދުވަހު 2 ކުދިން ގޮވައިގެން ވަރަށް ދަތި ހާލުގައި ދިރިއުޅޭ އެކަނިވެރި މަޔަކަށް ކުއްލި އެހީތެރިކަން ފޯރުކޮށްދިނުމަށް ހުޅުވާލި ފަންޑް ރެއިޒިންގއަށް، 3 ގަޑިއިރު ތެރޭގައި، އާއިލާއަށް ބޭނުންވާ ވަރަށް ފައިސާއާއި ތަކެތީގެ އެހީތެރިކަން ލިބިފައިވާތީ ފަންޑް ކަލެކްޓްކުރުން ހުއްޓާލާފައިވާކަމަށެވެ.
