ދިގުރަށުން 2000 އަކަފޫޓުގެ ގޯތި ދޫކުރަން ނިންމައި، ފޯމް ހުށަހެޅުމުގެ ފުރުސަތު ހުޅުވާލައިފި
9 އެޕްރީލު 2023 | އާދީއްތަ 14:3577 ގޯތި ދޫކުރުމަށް ނިންމާފައިވޭ
އދ. ދިގުރަށް
އދ. ދިގުރަށުން 2000 އަކަފޫޓުގެ ގޯތި ދޫކުރުމަށް ނިންމައި، ގޯއްޗަށް ފޯމް ހުށަހެޅުމުގެ ފުރުސަތު ހުޅުވާލައިފިއެވެ.
ކައުންސިލުން ބުނީ ގޯއްޗަށް އެދޭ ފަރާތްތަކަށް, 06 އޭޕްރީލް 2023ން ފެށިގެން ބަންޑާރަ ގޯއްޗަށް އެދި ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި 2000 އަކަފޫޓުގެ 77 ގޯތި ދޫކުރުމަށް ނިންމާފައިވާކަމަށެވެ.
ކައުންސިލުން ބުނީ ގޯއްޗަށް އެދުމުގެ ޝަރުތު ހަމަވާ ފަރާތްތަކުން "ދިރިއުޅުމަށްޓަކައި އދ. ދިގުރަށުން ބަންޑާރަ ގޯއްޗަށް އެދޭ ފޯމް" ފުރިހަމަ ކުރުމަށްފަހު 09 އޭޕްރީލް 2023 ވާ އާދީއްތަ ދުވަހުން ފެށިގެން (ބަންދު ދުވަސްތައް ހިމެނޭހެން) 30 ދުވަސް ލިބޭގޮތަށް 09 މެއި 2023ވާ އާދިއްތަ ދުވަހުގެ މެންދުރު 13:00ގެ ނިޔަލަށް ކައުންސިލް އިދާރާއަށް ފޯމް ހުށަހަޅަންޖެހޭނެކަމަށެވެ.
މީގެ އިތުރުން ރަސްމީ ބަންދު ނޫން ކޮންމެ ދުވަހަކު ގޯއްޗަށް އެދޭ ފޯމް (ރަމަޟާން މަހުގެ ދުވަސްތަކާއި ޝައްވާލު މަހުގެ ފުރަތަމަ 07 ދުވަހާއި ހަމައަށް) ދޫކުރުން އޮންނާނީ ހެނދުނު 09:30ން 10:30އާ ދެމެދު އަދި ފޯމު ބަލައިގަތުން އޮންނާނީ ހެނދުނު 10:45ން މެންދުރު 12:30ށް ކަމަށް ކައުންސިލުން ބުނެއެވެ. އަދި ރަމަޟާން މަހާއި ޝައްވާލު މަހުގެ 7 ވަނަ ދުވަހުގެ ފަހުން ގޯއްޗަށް އެދޭ ފޯމު ދޫކުރުން އޮންނާނީ ހެނދުނު 08:30ން 10:00އާ ދެމެދު ކަމަށާއި، އަދި ފޯމު ބަލައިގަތުން އޮންނާނީ ހެނދުނު 10:15ން މެންދުރު 13:00ށް ކަމަށް ކައުންސިލުން ބުނެއެވެ.
ކައުންސިލުން ބުނީ، ގޯއްޗަށް އެދޭ ފޯމް ކައުންސިލްގެ ވެބްސައިޓުންނާއި ސަރުކާރުގެ ގެޒެޓުން ލިބޭނެއެވެ. އަދި ޕްރިންޓްކޮށްފައިވާ ގޯއްޗަށް އެދޭ ފޯމު -/10 ރުފިޔާގެ ރޭޓުން އެ އިދާރާގެ ކައުންޓަރުން ލިބެން ހުންނާނެ ކަމަށެވެ.
ދިގުރަށުން އެންމެ ފަހުން ގޯތި ދޫކޮށްފައިވަނީ މީގެ 10 ވަރަކަށް އަހަރު ކުރިންނެވެ. އެހެންކަމުން މިހާރު އެރަށަށް ކުރިމަތިވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަމުގެ މައްސަލައެވެ.
