މިއަހަރުގެ ތެރޭގައި ޝަރީއާ ކޮންޕްލައިންޓް ފައިނޭންސް ތައާރަފް ކުރާނެ: އެސްޑީއެފްސީ
ކޮންޑީޝަނަލް ލައިސެންސެއް މިހާރު ވަނީ ލިބިފައި
އެސްއެމްއީ ޑިވެލޮޕްމަންޓް އެންޑް ފައިނޭންސް ކޯޕަރޭޝަން
މިއަހަރުގެ ތެރޭގައި ޝަރީއާ ކޮންޕްލައިންޓް ފައިނޭންސް ތައާރަފް ކުރާނެ ކަމަށް އެސްއެމްއީ ޑިވެލޮޕްމަންޓް އެންޑް ފައިނޭންސް ކޯޕަރޭޝަން (އެސްޑީއެފްސީ)އިން ބުނެފިއެވެ.
ރާއްޖެޓީވީގައި ވާހަކަދައްކަވަމުން އެސްޑީއެފްސީގެ މެނޭޖިން ޑިރެކްޓަރު ޒީނާދު އަހުމަދު ވިދާޅުވީ އިސްލާމިކް ފައިނޭންސް މެދުވެރިކޮށް ވިޔަފާރި ތަރައްގީ ކުރަން ބޭނުންވާ ވަރަށް ގިނަ ފަރާތްތައް އެބަތިބި ކަމަށެވެ. އެގޮތަށް އެކަން ކޮށްދިނުމަށް ވަރަށް ގިނަ މަސައްކަތްތައް ކުރަމުންދާ ކަމަށާއި، މިއަހަރުގެ ތެރޭގައި ޝަރީއާ ކޮންޕްލައިންޓް ފައިނޭންސް ތައާރަފް ކުރާނެ ކަަމަށެވެ.
ޒީނާދު ވިދާޅުވީ އެ ޚިދުމަތް ތައާރަފް ކުރުމަށް އެމްއެމްއޭއަށް ލައިސެންސްއަށް ހުށަހެޅުމުން މިހާރު ކޮންޑީޝަނަލް ލައިސެންސެއް ލިބިފައިވާ ކަމަށެވެ. އަދި އޭގައި ފުރިހަމަ ކުރަންޖެހޭ ކަންކަން ފުރިހަމަ ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
އެސްޑީއެފްސީން ދަނީ ޕޯޓަލް ތަރައްގީ ކުރުމުގެ މަސައްކަތް ވެސް ކުރަމުންނެވެ. ޕޯޓަލްއަކީ ކޮންމެ ކަސްޓަމަރަކަށް އުފައްދައިދެވޭ ވާޗުއަލް ސްޕޭސްއެއް ކަމަށާއި، ވީހާ ވެސް ގާތުން ޚިދުމަތް ދެވޭނެ ކަމަށް އެސްޑީއެފްސީން ބުނެއެވެ. އަދި ލޯނަށް އެދި ހުށަހެޅުމާއި، އެހެނިހެން ވެސް މަސައްކަތް ކުރުމަށް ދިމާވާ ދަތިތަކާއި، އުފުލަން ޖެހޭ ބުރައަށް ހައްލު ލިބޭނެ ކަަމަށް އެސްޑީއެފްސީން ބުނެއެވެ.
ޕޯޓަލްގެ ޚިދުމަތްތައް އިތުރަށް ތަރައްގީވެ ފުރިހަމަވާނެއެވެ.
