ބޯންލެސް ޗިކަން ޕެކެޓްތަކެއް ގަތުމަށްފަހު ދެއްކީ ފޭކް ސްލިޕެއް، ދެ އަހަރަށް ޖަލަށް!
9 އެޕްރީލު 2023 | އާދީއްތަ 11:39ދައުވާ އުފުލީ ހއ. ދިއްދޫއަށް ނިސްބަތްވާ ފިރިހެނެއްގެ މައްޗަށް
ކްރިމިނަލް ކޯޓް
6 ޕެކެޓް ބޯންލެސް ޗިކަން ގަތުމަށްފަހު ފޭކް ޓްރާންސްފަރ ސްލިޕެއް ދެއްކި މީހަކު ދެ އަހަރާއި 4 މަހާއި 18 ދުވަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
މި ދައުވާ އުފުލީ ހއ. ދިއްދޫއަށް ނިސްބަތްވާ ފިރިހެނެއްގެ މައްޗަށެވެ. އޭނާގެ މައްޗަށް ދައުވާ ކުރީ އެނގިހުރެ ސައްހަ ނޫން ލިޔުމެއް އުފެއްދުމުގެ ކުށުގެ ދައުވާއެވެ.
އެމީހާގެ މައްޗަށް ހުކުމްކުރި ސަބަބަކީ 6 ޕެކެޓް ބޯންލެސް ޗިކަން ގަތުމަށްފަހު 530 ރުފިޔާގެ ފޭކް ސްލިޕެއް ދެއްކި މައްސަލާގައެވެ.
މި ފިރިހެންމީހާގެ އެކައުންޓުން ފައިސާ ކެނޑިފައިވޭތޯ ބެލުމަށް އޭނާގެ ގާތު އެކައުންޓް ހިސްޓްރީ ދެއްކުމަށް އެދުމުން ދެކޮޅު ހެދިކަން ހެކިންގެ ހެކިބަހުން ސާބިތުވާކަމަށް ކްރިމިނަލް ކޯޓުން އިއްވި ހުކުމްގައި ވަނީ ބަޔާންކޮށްފައެވެ.
ކްރިމިނަލް ކޯޓުން މި އަމުރު ނެރުއްވީ ގާޒީ ހުސެއިން ފާއިޒް ރަޝާދުއެވެ.
މި މީހާގެ މައްޗަށް ކްރިމިނަލް ކޯޓުން ހުކުމްކޮށްފައިވާއިރު މާލޭގެ ފިހާރަތަކުން މުދާ ގަތުމަށްފަހު ސައްހަނޫން ޓްރާންސްފަރ ސްލިޕް ހަދައި ވައިބަރކޮށް އޮޅުވާލައި މަކަރާއި ހީލަތުން މުދާ ހޯދަމުންދާ މައްސަލަތައް ފެންމަތިވަމުން އަންނަކަމަށް ފުލުހުން ވަނީ ބުނެފައެވެ.
ފުލުހުން ބުނީ، މިފަދަ ފަރާތްތަކުން އެޑިޓްކޮށް، އެ ސްލިޕްގެ ތާރިހާއި ވަގުތާ އަދި ގަންނަން ބޭނުންވާ އެއްޗަކަށް އަރާ އަގު ބަދަލުކޮށް އެޑިޓް ކޮށްގެން ބޭނުން ކުރަމުން އަންނަކަމަށެވެ. އެފަދަ ކަންކަމަށް ސަމާލުވުމަށް ފުލުހުން އިލްތިމާސް ކުރެއެވެ.
