ކާބަން ނިއުޓްރަލްކުރާ ވާހަކަ ދެއްކީމަ އޭރު އެންމެން ހީކުރީ އަޅުގަނޑު މޮޔަވީއޭ: ނަޝީދު

މޫސުމީ ބަދަލުތަކުން ރާއްޖެ ސަލާމަތްކުރުމަށްޓަކައި ރާއްޖެއަކީ ކާރބަން ނިއުޓްރަލް ގައުމަކަށް ހެދުމަށް 2009ވަނަ އަހަރު އެވާހަކަ ދެއްކެވުމުން އޭރު އެންމެން ވެސް ހީކުރީ އެމަނިކުފާނު "މޮޔަފުޅުވީ"އޭ ކަމަށާއި، ނަމަވެސް މިހާރު އެންމެންނަށް ވެސް އޭގެ މުހިންމުކަން އިހުސާސްވެފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

ކޮމަންވެލްތުގެ ވިޔަފާރިއާއި އިޤްތިޞާދާބެހޭ ކައުންސިލް ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ ރާއްޖެ އަކީ ޖަޒީރާ ގައުމެއް ކަމަށެވެ. އަދި ރާއްޖޭގެ ވަށައިގެންވާ މޫދާއި ކަނޑާއި، އަދި ރާއްޖޭގެ ގުދުރަތީ ރީތި ކަމަކީ ރާއްޖެއަށް ލިބޭ އެންމެ ބޮޑު އެއް ފައިދާ ކަމަށެވެ. މީގެ އިތުރަށް ރާއްޖެ އަކީ ވިޔަފާރިއާއި ކެއިން ބުއިމުގައި ވެސް މޫދާއި ކަނޑަށް ވަރަށް ބޮޑަށް ބަރޯސާވާ ގައުމެއްކަން ފާހަގަކުރެއްވިއެވެ.

އެމަނިކުފާނު ވިދާޅުވީ މުޅި ދުނިޔޭގެ ވެސް ކަނޑުގެ ސަރަހައްދު "ނުރައްކަލުގެ ތެރެއަށް ވެއްޓިފައިވާ"ކަމަށެވެ. މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑަށް ހޫނުވެ އޭގެ ސަބަބުން މުރަކައިގެ ބަގީޗާތައް ހަލާކުވަމުން އަންނަ ކަމަށެވެ. އަދި އޯވަރ ފިޝިންގއާއި، މޫދަށް އަޅާ ޕްލާސްޓިކް ކުނީގެ ސަބަބުން ތިމާވެށީގެ އެތައް މައްސަލަތަކެއް ކުރިމަތިވަމުން އަންނަ ކަމަށެވެ.

ރައީސް ނަޝީދު ވިދާޅުވީ އެކަންކަމަށް އޮތީ އެންމެ ހައްލެއް ކަމަށެވެ. އެއީ ގްރީން ހައުސް ގޭސް ބޭރުކުރުން ހުއްޓާލުން ކަމަށާއި، އެއީ ވަރަށް ވެސް ފަސޭހަ ކަމެއް ކަމަށެވެ. މި ވާހަކައަކީ އެމަނިކުފާނު ވަރަށް ކުރިން ފަށައިގެން ވެސް ދައްކަވާ ވާހަކައެއް ކަމަށާއި، އަދި 2009ވަނަ އަހަރުން ފެށިގެން ރާއްޖެ އަކީ ކާރބަން ނިއުޓްރަލް ގައުމަކަށް ހެދުމުގެ މަސައްކަތްކުރައްވާފައިވާ ކަމަށެވެ.

އެމަނިކުފާނު ވިދާޅުވީ ކާރބަން ނިއުޓްރަލް ކުރުމުގެ ވާހަކައަކީ ހުޅަނގުގެ ވިސްނުމުގެ އެންވަޔަރަމެންޓަލިސްޓުންނަށް ތަންކޮޅެއް އުނދަގޫ ވާހަކައަކަށް ވެދާނެ ކަމަށެވެ. މިކަމުގައި ދެގޮތެއް އޮންނަ ކަމަށެވެ. އެއްގޮތަކީ އެންމެން އެކީ ގަސްތަކާއި ޖަންގަލި ތެރޭގައި ދިރިއުޅެއް ފެށުން ކަމަށާއި، އަނެއް ގޮތަކީ ޓެކްނޮލޮޖީގެ ތެރެއިން މިކަން ތަރައްގީކުރުން ކަމަށެވެ. އެގޮތުން ގްރީން އިންފްރާ ސްޓަރްކްޗަރއެއް ހެދުން ކަމަށާއި ކާރބަން ނިއުޓްރަލް ކުރުމުގެ މޮޅު، އަދި ޒަމާނާ ގުޅޭ ގޮތަކީ އެއީ ކަމަށެވެ.

ރައީސް ނަޝީދު ވިދާޅުވީ މިޒަމާނުގައި ކާރބަން ނިއުޓްރަލްއަށް ބޭނުންކުރާ ޒަމާނީ ނަމަކީ "ނެޓް ޒީރޯ" ކަމަށާއި، ދުނިޔޭގެ ގިނަ ގައުމުތަކުން މި އަމާޒަށް މަސައްކަތްކުރާތަން ފެނުމަކީ ވަރަށް ހިންހަމަޖެހިވަޑައިގަންނަވާ ކަމެއް ކަމަށެވެ.