ރ މަޑުއްވަރީގައި އެކްސިޑެންޓެއް ހިނގައި އެރަށު ކައުންސިލުގެ އެސްޖީ ނިޔާވެއްޖެ
މި ޙާދިސާގައި ނިޔާވެފައިވަނީ އެރަށު ކައުންސިލުގެ ސެކެޓަރީ ޖެނެރަލް އަހުމަދު އަސްލަމް
ރ މަޑުއްވަރި
ރ މަޑުއްވަރީގައި އެކްސިޑެންޓެއް ހިނގައި މީހަކު މަރުވެއްޖެއެވެ.
މި ޙާދިސާ ހިނގާފައިވަނީ އާދިއްތަ ދުވަހުއެވެ.
އެކަމާ ގުޅިގެން ފުލުހުން ބުނީ، އެކްސިޑެންޓު ހިނގާފައިވަނީ ޕިކަޕެއް ފަހަތަށް ޖައްސާލި ވަގުތު އެ ޕިކަޕު ފަހަތުގައި ހުރި މީހެއްގެ ގައިގައި ޖެހިގެން ކަމަށެވެ. އެކަން ފުލުހުންނަށް ރިޕޯޓު ކޮށްފައިވަނީ އާދިއްތަ ދުވަހުގެ މެންދުރުގެ ވަގުތެއްގައެވެ.
މި ޙާދިސާގައި އަނިޔާވެފައިވަނީ އުމުރުން 40 އަހަރުގެ ދިވެހި ފިރިހެނަކަށެވެ. އޭނާ އުނގޫފާރު ރީޖަނަލް ހޮސްޕިޓަލަށް ގެންގޮސް ފަރުވާދެމުން ދަނިކޮށް ނިޔާވެފައިވާކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވެއެވެ.
އެކަމާ ގުޅިގެން ރާއްޖެއެމްވީއާ ވާހަކަ ދައްކަވަމުން އެރަށު ކައުންސިލުން ބުނީ، ޙާދިސާ ހިނގީ ޕިކަޕު ގަރާޖަށް ވައްދަނިކޮށް ކަމަށާއި، މި ޙާދިސާގައި ނިޔާވެފައިވަނީ އެރަށު ކައުންސިލުގެ ސެކެޓަރީ ޖެނެރަލް އަހުމަދު އަސްލަމް ކަމަށެވެ.
މިކަމާ ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުންނެވެ.
