ދިއްދޫ ކައުންސިލް މެންބަރު އިންތިހާބު ކުރާ ބައި-އިލެކްޝަން އޮބްޒާވް ކުރުމަށް ފޯމް ހުށަހަޅަން ހުޅުވާލައިފި

އދ. ދިއްދޫ ކައުންސިލްގެ މެންބަރު އިންތިޚާބު ކުރުމަށް ބާއްވާ ބައި-އިލެކްޝަންގައި އޮބްޒާވްކުރުމަށް އެދި ފޯމު ހުށަހެޅުމުގެ ފުރުޞަތު ހުޅުވާލައިފިއެވެ.

އިލެކްޝަންސް ކޮމިޝަނުން ބުނީ މޭ 6 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ އދ. ދިއްދޫ ކައުންސިލް މެންބަރު އިންތިޚާބު ކުރުމަށް ބާއްވާ ބައި-އިލެކްޝަންގެ ވޯޓު ނެގުމާއި، ގުނުމުގެ ކަންތައްތައް އޮބްޒާވުކުރުމަށް ޝައުޤުވެރިވާ ފަރާތްތަކަށް އެޕްރީލް 8ން ފެށިގެން 13 އާއި ހަމަޔަށް އެ ފުރުޞަތު ހުޅުވާލާފައިވާ ކަމަށެވެ.

އިންތިޚާބު އޮބްޒާވްކުރުމަށް ހުއްދަ ދެވޭނެ ޝަރުޠުތަކެއް ކަނޑައަޅާފައިވާއިރު ހުއްދަ ދެވޭނީ މި ޝަރުތުތައް ފުރިހަމަވާ ފަރާތްތަކަށެވެ. އެގޮތުން ކަނޑައަޅާފައިވާ ޝަރުތު ތަކަކީ، އުމުރުން އަށާރަ (18) އަހަރު ފުރިފައިވާ ދިވެއްސެއް ކަމުގައިވުމާއި، ޖިނާއީ ކުށެއްގެ ޙުކުމް ތަންފީޒު ކުރެވެމުންދާ މީހެއްކަމުގައި ނުވުމާއި، ސިޔާސީ ޕާޓީތައް ފިޔަވައި މަދަނީ ޖަމާޢަތަކުން ނުވަތަ އަމިއްލަގޮތުން އޮބްޒާވަރަކަށް ވުމަށް ހުށަހަޅާ ފަރާތެއްނަމަ، ސިޔާސީ ޕާޓީއެއްގެ ރަޖިސްޓަރީއެއްގައި އެ މީހެއްގެ ނަން ހިމެނިފައިވާ މީހަކު ކަމުގައި ނުވުން ހިމެނެއެވެ. މީގެ އިތުރުން އިންތިޚާބާބެހޭ މަސައްކަތެއް ކުރުމަށް އިލެކްޝަންސް ކޮމިޝަނުގެ ފަރާތުން ހަވާލުވެގެން ހުރި މީހެއްކަމުގައި ނުވުން ވެސް ޝަރުތުތަކުގެ ތެރޭގައި ހިމެނެއެވެ.

އޮބްޒާވަރުންގެ ގޮތުގައި ކުރިމަތިލުމަށް އެދޭ ފަރާތްތަކުގެ ފޯމު ބަލައިގަތުމަށް ހަމަޖެހިފައިވަނީ އެޕްރީލް 8ން ފެށިގެން 13 ވަނަ ދުވަހުގެ މެންދުރު 1:00 އާ ހަމައަށް އީމެއިލް މެދުވެރިކޮށެވެ. އޮބްޒާވަރުންގެ ގޮތުގައި ކުރިމަތިލުމަށް އެދޭ ފޯމު މެއިލްކުރާނީ އިލެކްޝަންސް ކޮމިޝަނުގެ އީމެއިލްއަށް ކަމަށް ކޮމިޝަނުން ވަނީ ބުނެފައެވެ.

ލޯކަލް ކައުންސިލްތަކުގެ އިންތިޚާބުގައި އޮބްޒާވަރުންގެ ގޮތުގައި ކުރިމަތިލުމަށް އެދޭ ފަރާތްތަކުން ހުށަހަޅަންޖެހޭ އެޕްލިކޭޝަން ފޯމު ކޮމިޝަންގެ ވެބްސައިޓް www.elections.gov.mv އިން ލިބޭނެ ކަމަށް ކޮމިޝަނުން ވަނީ ބުނެފައެވެ.

ދިއްދޫ ކައުންސިލް މެންބަރުކަމަށް ކުރިމަތިލީ 2 ކެންޑިޑޭޓެކެވެ. އެއީ އަމިއްލަގޮތުން ކުރިމަތިލި ރަޝީދާ އާދަމް އަދި މޯލްޑިވްސް ނެޝަނަލް ޕާޓީގެ ފަރާތުން ކުރިމަތިލި އަނީސް މުހައްމަދުއެވެ. އިލެކްޝަންސް ކޮމިޝަނުން ވަނީ ކެންޑިޑޭޓުންގެ ނަންވެސް ތަރުތީބުކޮށްފައެވެ. ކެންޑިޑޭޓް ނަންބަރު 1 ލިބުނީ އަމިއްލަ ގޮތުން ވާދަކުރާ ކެންޑިޑޭޓަަށެވެ. އަދި 2 ލިބުނީ އެމްއެންޕީގެ ކެންޑިޑޭޓަށެވެ.