އިޓާލިއަން ލީގުގައި އެމްޕޮލީއާ ދެކޮޅަށް ކުޅުނު މެޗުން މޮޅުވެ، ދެ ވަނައިގައި އޮތް ލާޒިއޯއާ ދެމެދު އޮތް ފަރަގު ކުޑަ ކުރުމަށް ލިބުނު ފުރުސަތު އޭސީ މިލާނުން ނަގާލައިފި އެވެ.

ހުކުރު ދުވަހުގެ ރޭ މިލާންގެ އަމިއްލަ ދަނޑުގައި ކުޅުނު މެޗުން މޮޅުވެ، ދެ ވަނައިގައި އޮތް ލާޒިއޯއާ ދެމެދު އޮތް ފަރަގު ޕޮއިންޓަކަށް ކުޑަކުރުމުގެ ފުރުސަތު މިލާނަށް އޮތެވެ. ނަމަވެސް ދެ ޓީމުގެ ކުރިމަތިލުން ނިމުނީ އެއްވަރިވެގެންނެވެ. މެޗުގައި ލަނޑު ޖެހުމަށް އޭސީ މިލާނުން ވަނީ މަސައްކަތް ކޮށްފަ އެވެ. އެމްޕޮލީގެ ގޯލަށް އަމާޒުކޮށް މިލާނުން ވަނީ ހަތަރު ހަމަލާއެއް ފޮނުވާލައިފަ އެވެ. މި ސީޒަންގައި މޮޅު ކުޅުމެއް ދައްކަމުން އަންނަ ސަންޑްރޯ ޓޮނާލީ ވެސް ވަނީ ލަނޑު ޖެހުމަށް މަސައްކަތް ކޮށްފަ އެވެ. ނަމަވެސް އެމްޕޮލީގެ ގޯލް ކީޕަރު ޕެރިސަން ވަނީ ހުށިޔާރު ކަމާއެކު ހަމަލާތައް ހުއްޓުވައިފަ އެވެ. މެޗުގެ 89 ވަނަ މިނެޓުގައި އޭސީ މިލާންގެ އަލެސާންޑްރޯ ފްލޮރެންޒީ ހުރަސްކުރި ބޯޅަ އެއް ގޯލަށް ފޮނުވާލައިގެން އޮލީވިއޭ ޖިރޫޑް ވަނީ މިލާނަށް ކުރި ހޯދައިދީފަ އެވެ. ނަމަވެސް ވީއޭއާރު ބެލުމަށް ފަހު ރެފްރީ ވަނީ ލަނޑު ޖެހި ވަގުތު ޖިރޫޑުގެ އަތުގައި ބޯޅަ ޖެހުނު ކަމަށް ނިންމައިފަ އެވެ.

މެޗު އެއްވަރުވެ ލިބުނު އެއް ޕޮއިންޓާއެކު މިލާން އޮތީ ތިން ވަނައިގަ އެވެ. އެއީ ކުޅުނު 29 މެޗުން 52 ޕޮއިންޓާއެކު އެވެ. މިލާނަށް ވުރެ އެއް މެޗު މަދުން ކުޅެގެން ދެ ވަނައިގައި ލާޒިއޯ އޮތީ 55 ޕޮއިންޓާއެކު އެވެ. އެމްޕޮލީ އޮތީ 29 މެޗުން 32 ޕޮއިންޓާއެކު 14 ވަނައިގަ އެވެ.