ރާއްޖޭގެ ދަރަނި އިތުރުވާނެކަމަސް ކުރިންވެސް އަންދާޒާކުރެވިފައިވާކަމަށް ސަރުކާރުން ބުނެފިއެވެ.

ވޯލްޑް ބޭންކުން މިމަހުގެ 4 ވަނަ ދުވަހު ނެރުނު ސައުތު އޭޝިއާ އިކޮނޮމިކް ފޯކަސް، "އެކްސްޕެންޑިން އޮޕޮޗުނިޓީސް: ޓުވާޑްސް އިންކްލޫސިވް ގްރޯތު"ރިޕޯޓުގައި ވާގޮތުން ބޭރުގެ ދަރަނި ބޮޑުވެ، ދުނިޔޭގެ މާލީ ބާޒާރުތައް ތާށިވުމުގެ ސަބަބުން ރާއްޖޭގެ މާލީ ހާލަތަށް ނުރައްކާތަކެއް ވަނީ ކުރިމަތިވެފައެވެ.

ބުރާސްފަތު ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި މިކަމާ ގުޅިގެން "ރާއްޖެޓީވީ"ން ކުރި ސުވާލަކަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ދަރަނި އިތުރުވާނެކަމަށް ކުރިންވެސް އަންދާޒާކޮށްފައިވާކަމަށެވެ. ދަރަނި ނަގަނީ ޕްލޭންކޮށްގެން ކަމަށާއި، ސަރުކާރުން އަޅާ ކޮންމެ ފިޔަވަޅަކީ ދެން ވާނެ ގޮތް އެނގި ތިބެގެން ސަރުކާރުން އަޅަމުންދާ ފިޔަވަޅުތަކެއް ކަމަށް މިއުވާން ވިދާޅުވިއެވެ.

މި އަހަރު އިންފްލޭޝަން 5.7 އިންސައްތައަށް އުފުލޭނެ ކަމަށް ވޯލްޑް ބޭންކުން ވަނީ ލަފާކޮށްފައެވެ. މައިގަނޑު ސަބަބަކީ މުދަލާއި ހިދުމަތުގެ އަގުން ނަގާ ޓެކްސް (ޖީއެސްޓީ)ގެ ރޭޓްތައް ބޮޑުވުން ކަމަށް ވޯލްޑް ބޭންކުން ފާހަގަކުރެއެވެ. މިކަމާ ގުޅޭގޮތުން މިއުވާން ވިދާޅުވީ ޖީއެސްޓީ ބޮޑުކުރުމުން 2.5 އިންސައްތައަށް އަގުތައް މަތިވާނެ ކަމަށް އަންދާޒާކުރެވޭ ކަމަށެވެ. އެހެން ގައުމުތަކާ އަޅާ ބަލާއިރު ރާއްޖޭގައި ތަކެތީގެ އަގުތައް ކުޑަ ކަމަށާއި، އަދި މިގޮތުގައި ހިފެހެއްޓޭނެކަމުގެ ޔަގީންކަން އެބައޮތް ކަމަށް މިއުވާން ވިދާޅުވިއެވެ.

މީގެ އިތުރުން މިއުވާން ވިދާޅުވީ މިއަހަރުގެ ބަޖެޓުގައި ސަރުކާރުގެ އުފެއްދުންތެރިކަން އަންދާޒާކޮށްފައި އެވަނީ 7.6 އިންސައްތައިގައި ކަމަށެވެ. މިއަހަރުވެސް އަންދާޒާކުރި އަދަދުގައި އުފެއްދުންތެރިކަން ހިފެހެއްޓޭނެކަމަށް ލަފާކުރެވޭ ކަމަށެވެ.

މީގެ އިތުރުން ފަތުރުވެރިކަން ކުރިއަރަމުން އަންނަ އަދަދުތަކަށް ބަލައި އިގްތިސާދު ހިފަހައްޓާލެވޭނެކަމަށް މިއުވާން ވިދާޅުވިއެވެ. މިއަހަރު ބަޖެޓު އެކުލަވާލިއިރު ޗައިނާ ފަތުރުވެރިން އަންނަން ފެށުމުން އިތުރުވާނެ ބައި ހިމަނާފައި ނުވާނެ ކަމަށް މިއުވާން ވިދާޅުވިއެވެ. މިހާތަނަށް 8 ވަނައަށް އެންމެ ގިނަ ޓޫރިސްޓުން އައިސްފައިވަނީ ޗައިނާއިން ކަމަށާއި، މި އަދަދުތަކާ އެއްކޮށް އިގްތިސާދު ހިފެހެއްޓޭނެ ކަމަށް މިއުވާން ވިދާޅުވިއެވެ.

މި ކަންކަމާ ގުޅިގެން ކުރިއަށްއޮތްތަނުގައި ވިސްނަންޖެހޭ ކަންކަންވެސް ވޯލްޑް ބޭންކުން ފާހަގަކޮށްފައިވާކަމަށާއި، އެކަންކަމާ ގުޅޭގޮތުން ސަރުކާރުގެ އިދާރާތަކުގެ މެދުގައި މަޝްވަރާކޮށް އަޅަންޖެހޭ ފިޔަވަޅުތައް އަޅަމުންދާނެ ކަމަށް މިއުވާން ވަނީ ވިދާޅުވެފައެވެ.

ވޯލްޑް ބޭންކް ރިޕޯޓުގައި ވަނީ މުޅި މާލިއްޔަތަށް ކުރިމަތިވާ ބުރަ ކުޑަކުރުމަށް ސަބްސިޑީތައް ކުޑަކޮށް އަދި ދޭ ގޮތް ބަދަލުކުރަން ޖެހޭކަން ފާހަގަކޮށްފައެވެ. އިގްތިސާދުގެ ރައްކާތެރިކަން ކަށަވަރު ކުރުމަށް މިހާރަށް ވުރެ ހަރުދަނާ ގޮތެއްގައި ދައުލަތުގެ މާލިއްޔަތުން ހަރަދުކުރެވޭނެ ނިޒާމެއް ބޭނުންވާކަމަވެސް ވޯލްޑް ބޭންކުން ފާހަގަކޮށްފައިވެއެވެ. ފަތުރުވެރިކަމަށް ބަރޯސާވުން ކުޑަކޮށް، އިގްތިސާދު ސިންދަފާތު ކުރުމަށް ޚާއްސަކަމެއް ދިނުމަށްވެސް ބޯލްޑް ބޭންކުން ވަނީ ލަފާދީފައެވެ.