ރޯދަ މަހު އެންމެ ގިނައިން އެތެރެކުރީ ފިޔަލާއި ބިސް
ރޯދަ މަހު ކާބޯތަކެތީގެ ބާވަތްތައް އެތެރެކުރާ މިންވަރު އިތުރުވޭ
ކުޅުދުއްފުށި ރީޖަނަލް ޕޯޓް ތަރައްގީ ކުރުމުގެ އެއްބަސްވުމުގައި ސޮއި ކުރުން
މި ރަމަޟާން މަހު ރާއްޖެއަށް އެންމެ ގިނައިން އެތެރެކުރީ ފިޔަލާއި ބިސް ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ތަފާސްހިސާބުތަކުން ދައްކައިފިއެވެ.
ކޮންމެ އަހަރަކު ވެސް ރާއްޖެއަށް ކާބޯތަކެތި އެތެރެކުރާ މިންވަރު ރަމަޟާން މަހު އިތުރުވެއެވެ. މި އަހަރު ވެސް ބައެއް ބާވަތްތައް ވަނީ އެހެން މަސްތަކާ ބަލާއިރު ރަމަޟާން މަހު ބޮޑުތަނުން އިތުރުވެފައެވެ. އެމްޕީއެލްގެ ތަފާސްހިސާބުތަކުން ދައްކާ ގޮތުގައި ނިމިދިޔަ މާރިޗު މަހު ވަނީ 93،011 ޓަނުގެ ބިސް ކްލިއާ ކޮށްފައެވެ. ފެބްރުވަރީ މަހު އެ ކުންފުނިން ކްލިއާ ކޮށްފައިވަނީ 59،297 ޓަނުގެ ބިހެވެ. އެހެންކަމުން، ފެބްރުވަރީ މަހަށްވުރެ، މާރިޗު މަހު މި ވަނީ ބިސް އެތެރެކުރި މިންވަރު 57 އިންސައްތަ އިތުރުވެފައެވެ.
މާރިޗު މަހު އެމްޕީއެލްއިން އެތެރެކުރީ 63،949 ޓަނުގެ ފިޔަލެވެ. އެއީ ފެބްރުވަރީ މަހާ އަޅާބަލާއިރު 33 އިންސައްތަ އިތުރު އަދަދެކެވެ. ފެބްރުވަރީ މަހު އެ ކުންފުނިން ކްލިއާ ކޮށްފައިވަނީ 48170 ޓަނުގެ ފިޔަލެވެ.
ފިޔަލާއި ބިހުގެ އިތުރުން ވެސް ބައެއް އެހެން ބާވަތްތައް ވެސް އެތެރެކުރާ މިންވަރު ވަނީ ރޯދަ މަހަށް އިތުރުވެފައެވެ. އެ ގޮތުން ފެބްރުވަރީ މަހާ އަޅާބަލާއިރު އަލުވި އެތެރެކުރި މިންވަރު ވެސް މާރިޗު މަހު ވަނީ 27 އިންސައްތަ އިތުރުވެފައެވެ. އަދި ކަރާ އެތެރެކުރި މިންވަރު 21 އިންސައްތަ އިތުރުވެފައިވާއިރު، ދޮންކެޔޮ އެތެރެކުރި މިންވަރު ވެސް ވަނީ 27 އިންސައްތަ އިތުރުވެފައވެވެ.
ސަރުކާރު ކުންފުނި އެސްޓީއޯއިން ރޯދަ މަހަށް ހާއްސަކޮށްގެން ހެޔޮ އަގުގައި މި ބާވަތްތައް އަންނަނީ ފޯރުކޮށްދެމުންނެވެ. ފިޔާ ކިލޯއެއް އެ ކުންފުނިން 9 ރުފިޔާއަށް ވިއްކާއިރު، ބިހެއް ވިއްކަނީ 1.75 ލާރި އަށެވެ.
