ދަނޑުވެރިންނަށް އަލުން ސަބްސިޑީ ދޭން ހުށަހެޅީ އެމްޑީޕީ އާއި ފިކުރު ތަފާތުވުމުން - އަނދުން ހުސެއިން

ދަނޑުވެރިންނަށް އަލުން ސަބްސިޑީ ދޭން ހުށަހެޅީ އެމްޑީޕީގެ ފިކުރާއި އެ ގަރާރު ހުށަހެޅުއްވި މެމްބަރުގެ ޚިޔާލާއި ތަފާތުވުމުން ކަމަށް ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ ތޮއްޑޫ ދާއިރާގެ މެންބަރު ޙަސަން ޝިޔާން ހުށަހަޅުއްވާފައިވާ، އެމް.ޑީ.ޕީގެ ފުރަތަމަ ވެރިކަމުގައި ރާއްޖޭގެ ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޢާދަކޮށް ދަނޑުވެރި މީހާއަށް ދިނުމަށް ގޮވާލައި ހުށަހަޅާފައިވާ ގަރާރަށް ބަހުސްކުރައްވަމުންނެވެ.  ގަރާރަކީ 2008 ވަނަ އަހަރު އުފެދުނު އެމް.ޑީޕގެ ފުރަތަމަ ސަރުކާރުން ދަނޑުވެރިންނަށް ދޫކުރުންފެށި ދަނޑުވެރިންގެ ސަބްސިޑީ އަލުން އަނބުރާ އިއާދަ ކުރުމަށް 2018 ވަނަ އަހަރު ރިޔާސީ ކެމްޕެއިންގައި އެމް.ޑީ.ޕީގެ ރިޔާސީ ކެންޑިޑޭޓް މިއަދުގެ ޒައީސުލްޖުމްހޫރިއްޔާ އިބްރާހީމްމުޙއްމަދު ސާލިޙް ވެވަޑައިގެންނެވި ވައުދުފުޅު ފުއްދަވައިދެއްވުމަށް ގޮވާލާ އެކަން ސަރުކާރުގެ ސަމާލުކަމަށް ގެނައުމަށް ހުށަހަޅާފައިވާ ގަރާރެކެވެ.

އެ ގަރާރަށް މެމްބަރު ޝަހީމް ވަނީ ވަރަށް ބޮޑަށް ފާޑު ވިދާޅުވެފައެވެ. ދަނޑުވެރިކަމަށް ބޭނުންވާ ލޯނުތައް ދިނުމާއި އެހީ ފޯރުކޮށްދިނުމުގައި ސަރުކާރުން ކޮށްދޭން ޖެހޭ ކަންކަން ކޮށްދެމުންދާ ކަަމަށް އޭނާ ވަނީ ވިދާޅުވެފައެވެ. އަދި ދަނޑުވެރިކަމުން ހައްދާތަކެތި ވިއްކޭނެ އިންތިޒާމްތައް ވެސް ސަރުކާރުން ފޯރުކޮށްދެމުންދާ ކަމަށް އޭނާ ވިދާޅުވިއެވެ. އަދި ޝިޔާން އެ ދާއިރާ އަކަށް ނިސްބަތްވާ ތިނަދޫގައި ދަނޑުވެރިކަމަށް ވުރެ ބޮޑަށް މިހާރު ޝައުގުވެރިކަން ހުރީ ފަތުރުވެރިކަމަށް އޭނާ ވިދާޅުވިއެވެ.

ރާއްޖޭގެ ސިނާއަތުތައް ކުރިއަރުވަނީ ރައްޔިތުން އެދޭ ސިނާއަތުތަކަށް އިސްކަން ދީގެން ކަމަށް އޭނާ ވިދާޅުވިއެވެ. 2008 ވަނަ އަހަރު އުފެދުނު އެމްޑީޕީގެ ފުރަތަމަ ސަރުކާރުން ދަނޑުވެރިންނަށް ދޫކުރި ދަނޑުވެރިކަމުގައި ބޭނުންކުރާ އާލާތްތައް ގަތުމަށް ސީދާ ދަނޑުވެރި މީހާގެ އަތަށް ލިބުނު ސަބްސިޑީގެ ސަބަބުން އެކި ހިސާބުތަކުގެ ގޭބިސީތަކުގެ އާއްމު ހާލަތު ރަނގަޅުވި ކަމަށް ޝިޔާންގެ ގަރާރުގައި ބުނި ނަމަވެސް ދަނޑުވެރިންނާއި ގުޅުން ހުރި ކަންކަން ރަނގަޅަށް އިންތިޒާމް ކުރަން ފެށީ މި ސަރުކާރުން ކަމަށް އޭނާ ވިދާޅުވިއެވެ. އެގޮތުން އެގްރޯނެޓް މެދުވެރިކޮަށް ކުރަމުން ދަނީ ވަރަށް ރަނގަޅަށް އިންތިޒާމް ކޮށްގެން ކުރިއަށްދާ މަސައްކަތްތަކެއް ކަމަށް އޭނާ ވިދާޅުވިއެވެ.