ދަނޑުވެރިންގެ ސަބްސިޑީ އިއާދަކުރުމަށް ގޮވާލާ މަޖިލީހަށް ގަރާރެއް
ދަނޑުވެރިންނަށް މި ސަރުކާރުގައި ފައިދާ ނުވާ ކަމަށް ޝިޔާން ވިދާޅުވި
ތޮއްޑޫ ދާއިރާގެ މެންބަރު ޙަސަން ޝިޔާން
ދަނޑުވެރިންގެ ސަބްސިޑީ އިއާދަކުރުމަށް ގޮވާލާ މަޖިލީހަށް ގަރާރެއް ހުށަހަޅައިފިއެވެ.
ތޮއްޑޫ ދާއިރާގެ މެންބަރު ޙަސަން ޝިޔާން ހުށަހަޅުއްވާފައިވާ އެމް.ޑީ.ޕީގެ ފުރަތަމަ ވެރިކަމުގައި ރާއްޖޭގެ ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޔާދަކޮށް ދަނޑުވެރި މީހާއަށް ދިނުމަށް ގޮވާލައި ހުށަހަޅާ ޤަރާރުގެ އިބްތިދާއީ ބަހުސް ފަށާފައި ވަނީ ބުދަ ދުވަހުއެވެ. އެ ގަރާރަކީ 2008 ވަނަ އަހަރު އުފެދުނު އެމް.ޑީޕގެ ފުރަތަމަ ސަރުކާރުން ދަނޑުވެރިންނަށް ދޫކުރުންފެށި ދަނޑުވެރިންގެ ސަބްސިޑީ އަލުން އަނބުރާ އިއާދަ ކުރުމަށް 2018 ވަނަ އަހަރު ރިޔާސީ ކެމްޕެއިންގައި އެމް.ޑީ.ޕީގެ ރިޔާސީ ކެންޑިޑޭޓް މިއަދުގެ ޒައީސުލްޖުމްހޫރިއްޔާ އިބްރާހީމްމުޙއްމަދު ސާލިޙް ވެވަޑައިގެންނެވި ވައުދުފުޅު ފުއްދަވައިދެއްވުމަށް ގޮވާލާ އެކަން ސަރުކާރުގެ ސަމާލުކަމަށް ގެނައުމަށް ހުށަހަޅާފައިވާ ގަރާރެކެވެ.
އެ ގަރާރުގައި ބުނެފައި ވަނީ 2008 ވަނަ އަހަރު އުފެދުނު އެމްޑީޕީގެ ފުރަތަމަ ސަރުކާރުން ދަނޑުވެރިންނަށް ދޫކުރި ދަނޑުވެރިކަމުގައި ބޭނުންކުރާ އާލާތްތައް ގަތުމަށް ސީދާ ދަނޑުވެރި މީހާގެ އަތަށް ލިބުނު ސަބްސިޑީގެ ސަބަބުން އެކި ހިސާބުތަކުގެ ގޭބިސީތަކުގެ އާއްމު ހާލަތު ރަނގަޅުވި ކަމަށެވެ. އަދި ދަނޑުވެރިކަމުގެ އުފެއްދުންތައް އިތުރުވެ ރާއްޖޭގެ އެކިއެކި ރަށްރަށުން ދަނޑުވެރިކަމަށް މީހުން ނުކުތް ކަމަށް ބުނެފައިވެއެވެ. އެ ގަރާރުގައި އިތުރަށް ބުނެފައި ވަނީ ދަނޑުވެރިކަމަށް އޭރު ގިނަ އަންހެނުން ވެސް ނުކުތް ކަމަށެވެ. ނަމަވެސް އޭރުގެ ވެރިކަން ބަދަލުވުމުން ސަބްސިޑީ ދިނުން ހުއްޓާލާފައިވާ ކަމަށް ވަނީ ބުނެފައެވެ.
2018 ވަނަ އަހަރު ތޮއްޑޫގައި ރައީސް ދެއްކެވި ވާހަކަފުޅުގެ ތެރޭގައި އެ ސަބްސިޑީ އަލުން ދޭނެ ކަމަށް ވިދާޅުވެފައިވާ ކަަމަށް ވެސް ޝިޔާންގެ ގަރާރުގައިވެއެވެ. އޭނާ ވިދާޅުވީ ދަނޑުވެރިންނަށް މި ސަރުކާރުގައި ފައިދާ ނުވާ ކަމަށާއި ދުވަހެއް ދުވަހަކަށް ދަނޑުވެރިކަން ދަނީ ދަށަށް ކަމަށެވެ. އަދި ސަރުކާރުން ދަނޑުވެރިކަމާއި މެދު ގެންގުޅޭ ސިޔާސަތުތަކަށް އެ ގަރާރުގައި ވަނީ ފާޑުކިޔާފައެވެ.
