"ޕީއެސްޖީ އަކީ ފުޓުބޯޅަ ކުލަބެއް ނޫން، މެސީއާ ދިމާކޮށްލުމަކީ ފުޓުބޯޅަ އަށް ކުރެވޭ މަލާމާތެއް!"

ފްރާންސް ލީގުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީއާ ދިމާކޮށްލުމަކީ ފުޓުބޯޅަ އަށް ކުރެވޭ "މަލާމާތެއް" ކަމަށް ފްރާންސްގެ ކުރީގެ ޑިފެންސިވް މިޑްފީލްޑަރު އެމަނުއެލް ޕެޓިޓް ބުނެފި އެވެ.

ޕެޓިޓް މިހެން ބުނީ ފްރާންސް ލީގުގައި ޕީއެސްޖީން އެންމެ ފަހުން ލިއޯން އަތުން ބަލިވި މެޗުގައި އެ ޓީމުގެ ސަޕޯޓަރުން މެސީއާ ދިމާކޮށްލުމާއެކު އެވެ. ލިއޯން އަތުން ޕީއެސްޖީ ބަލިވި މެޗުގައި ފްރާންސްގެ ސަޕޯޓަރުން މެސީއާ ދިމާކޮށްލާފައި ވަނީ އޭނާ އެ ޓީމާއެކު ހަދާފައިވާ އެއްބަސްވުން އައު ނުކުރާނެ ކަމުގެ އަޑުތަކެއް ފެތުރިފައި ވަނިކޮށެވެ. އަނެއްކޮޅުން މެސީ ހޯދުމުގެ މަސައްކަތް އޭނާގެ ކުރީގެ ކުލަބު، ސްޕެއިންގެ ބާސެލޯނާ އިން ކުރަމުން އަންނައިރު މެސީ އެކުލަބަށް ބަދަލުވާން އުޅޭކަމުގެ އަޑުތަކެއް ވެސް ފެތުރެމުން އަންނަ ވަގުތެއްގަ އެވެ. ލިއޯންއާ ދެކޮޅަށް ޕީއެސްޖީން ކުޅުނު މެޗުގެ ފުރަތަމަ ކުޅެން ނުކުންނަ 11 ކުޅުންތެރިން ނަން ގޮވި ވަގުތު، މެސީގެ ނަން ގޮވުމާއެކު ވެސް ސަޕޯޓަރުން ވަނީ އޭނާއާ ދިމާކޮށްލައިފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ޕެޓިޓް ބުނީ، ޕީއެސްޖީގެ ޕާކް ޑެސް ޕްރިންސެސްގައި ކުޅުނު އެ މެޗު ބަލަން އޭނާ ވެސް ދަނޑުގައި އިން ކަމަށެވެ. އަދި މެޗުގެ ކުރިންނާއި މެޗު ކުޅެމުން ދިޔަ ވަގުތުގައި ވެސް ޕީއެސްޖީގެ ސަޕޯޓަރުން މެސީއާ ދިމާކޮށްލި އަޑު އޭނާ އަށް ވެސް އިވުނު ކަމަށެވެ. އޭނާ ބުނީ ޕީއެސްޖީގެ ސަޕޯޓަރުން މެސީއާ ދިމާކޮށްލާއިރު، މެސީ ހުރީ އެންމެ ރަނގަޅަށް ކުޅެވޭ ޙާލަތެއްގައިތޯ ބެލުމަކީ ޕީއެސްޖީގެ އެހެން ކުޅުންތެރިންގެ ޒިންމާއެއް ކަމަށެވެ. މީގެ އިތުރުން އޭނާ ދެކޭ ގޮތުގައި މެސީއާ ދިމާކޮށްލުމަކީ ފުޓުބޯޅަައަށް ކުރެވޭ މަލާމާތެއް ކަމަށެވެ.

މީގެ އިތުރުން ޕެޓިޓް ބުނީ، އޭނާ މެސީ އަށް ދޭން ބޭނުންވާ ނަސޭހަތަކީ ޕީއެސްޖީ ދޫކޮށްލުމަށެވެ. އެގޮތުން މެސީ އަކީ ކޮން ފެންވަރެއްގެ ކުޅުންތެރިޔެއްކަން ޕީއެސްޖީގެ ސަޕޯޓަރުންނަށް ވެސް، އަދި ކުޅުންތެރިޔަކަށް ވެސް އޮޅިގެން ނުވާނެ ކަމަށެވެ. އަދި ޕީއެސްޖީ އަކީ ފުޓުބޯޅަ ކުލަބެއް ނޫން ކަމަށާއި، އެއީ ކުޅުމުން ރިޓަޔާވާން ބޭނުންވާ ކުޅުންތެރިން އަންނަ ކުލަބެއް ކަމަށް ފާހަގަ ކުރަމުން އޭނާ ބުނީ، ޕީއެސްޖީގައި ހުންނަ އުމުރުން 20 އަހަރުގެ ކުޅުންތެރިޔާ އަށް ވެސް އެކަން އޮންނާނީ އެގޮތުގައި ކަމަށެވެ. އަދި ޕީއެސްޖީގައި އެއްވެސް ކުޅުންތެރިޔަކަށް ކުރިއެރުމެއް ލިބިފައި ނުވާނެ ކަމަށާއި، އެ ޓީމުގެ މައްސަލަ އަކީ މެސީ ނޫން ކަމަށް އަދި މެސީ އަކީ ފުޓުބޯޅައިގައި "ޖާދޫ" ހަދަމުން އަންނަ ކުޅުންތެރިޔެއް ކަމަށާއި، މެސީ ވަށައިގެން ތިބޭ ކުޅުންތެރިން ވެސް ކޮންމެ ވެސް ވަރަކަށް މަސައްކަތް ކުރަން ޖެހޭނެ ކަމަށް ޕެޓިޓް ބުންޏެވެ.

ޕެޓިޓް ބުނީ މެސީ ވަށައިގެން ކުޅެން ރަނގަޅު ސްކޮޑެއް ބޭނުންވާކަން ޕީއެސްޖީގެ ސަޕޯޓަރުންނަށް ނޭނގޭ ކަމަށެވެ. އަދި އެއީ ޕީއެސްޖީގައި ނެތް އެއްޗެއް ކަމަށާއި، އަދި އޭނާ އަށް ފެންނަ ތަނުގައި އެއީ ނުވެސް ހޯދޭނެ އެއްޗެއް ކަމަށެވެ. ސަބަބެއްގެ ގޮތުގައި ޕެޓިޓް ބުނީ ޕީއެސްޖީގެ ވެރިންނަށް ޓްރާންސްފާތަކުގައި ރަނގަޅު ގޮތް ނޭންގުން ކަމަށެވެ. ޕެޓިޓް މިހެން ބުނެފައިވާއިރު، މެސީއާ ދިމާކޮށްލުމާއެކު ޕީއެސްޖީގެ ކޯޗު ކްރިސްޓޮފާ ގަލްޓިއޭ ވެސް ވަނީ ކަންބޮޑުވުން ފާޅުކޮށްފަ އެވެ.

ސްޕެއިންގެ ބާސެލޯނާ ދޫކޮށް މެސީ ޕީއެސްޖީ އަށް ބަދަލުވީ 2021 ވަނަ އަހަރު އެވެ. އެ ކުލަބާއެކު އޭނާ ހަދާފައިވާ ދެ އަހަރު ދުވަހުގެ އެއްބަސްވުން މިއަހަރު ހަމަވާނެ އެވެ. އެހެންކަމުން ޕީއެސްޖީން އަންނަނީ މެސީގެ އެއްބަސްވުން އައު ކުރުމަށް ގަދަ އަޅާ މަސައްކަތް ކުރަމުންނެވެ.