ކައުންސިލްތަކަށް އައްޔަންކުރަން 38 އެސްޖީން ހޯދަނީ
އެންމެ ފުރަތަމަ ހުޅުވާލާފައި ވަނީ 200 ކައުންސިލަކަށް ސެކްރެޓަރީ ޖެނެރަލުން ހޯދުމަށް
ވެލާނާގެ
ރާއްޖޭގައި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން އުފައްދާފައިވާ ލޯކަލް ކައުންސިލްތަކުގެ ސެކްރެޓަރީ ޖެނެރަލްގެ މަގާމަށް އައްޔަންކުރުމަށް 38 ބޭފުޅަކު ހޯދަން އިޢުލާންކޮށްފިއެވެ.
އެސްޖީން އައްޔަން ކުރަނީ ފަސް އަހަރަށް ކަމަށް ވާއިރު އެސްޖީންގެ ޝަރުތުތަކުގެ ތެރޭގައި ދަށްވެގެން ޑިޕްލޮމާ ފެންވަރަށް ކިޔަވާފައިވުން ހިމެނެއެވެ. 2021 ވަނަ އަހަރު ސެކްރެޓަރީ ޖެނަރަލުން އައްޔަންކުރަން ނިންމީ ޤާނޫނަކުން ބާރު ލިބިގެންނެވެ. އެ ޤާނޫނުގައި ވާގޮތުން އެ މަގާމަށް މީހުން އައްޔަނު ކުރާނީ ކައުންސިލްގެ ލަފާގެ މަތިން ސިވިލް ސާވިސް ކޮމިޝަނުންނެވެ.
2021 ވަނަ އަހަރުގެ ޖޫން މަހުން ފެށިގެން ސިވިލް ސާވިސް ކޮމިޝަން (ސީއެސްސީ)ން ކައުންސިލްތަކަށް ބޭނުންވާ ސެކްރެޓަރީ ޖެނަރަލުން ހޯދުމުގެ މަސައްކަތް ކުރަމުން ދާއިރު، އެންމެ ފުރަތަމަ ހުޅުވާލާފައި ވަނީ 200 ކައުންސިލަކަށް ސެކްރެޓަރީ ޖެނެރަލުން ހޯދުމަށެވެ. ކައުންސިލްތަކަށް އެސްޖީން ހޯދަން އެ ކޮމިޝަނުން އިއުލާންކުރަނީ ބައެއް ކައުންސިލްތަކުން އެސްޖީންގެ މަގާމުގައި ތިއްބަވާ ބޭފުޅުން އިސްތިއުފާ ދެއްވުމާއި، ބައެއް ރަށްރަށުގައި އެ މަޤާމަށް ޝަރުތު ހަމަވާ މީހުން ނުލިބުމާއި ގުޅިގެންނެވެ.
މިހާރު ފުރުސަތު ހުޅުވާލީ އެ މަޤާމަށް ޝަރުތު ހަމަވާ ނަމަ މިމަހުގެ 13 ވަނަ ދުވަހުގެ މެންދުރުފަހު 1:00ގެ ކުރިން ކުރިމަތިލާން ޖެހޭ ގޮތަށެވެ. އެސްޖީންގެ ދެ ރޭންކެއް ހިމެނޭ އިރު އޭގެ ތެރެއިން ފުރަތަމަ ރޭންކްގެ މުސާރަ އަކީ 16،100 ރުފިޔާ އެވެ. އަދި ދެވަނަ ރޭންކްގެ މުސާރައަކީ 12،285 ރުފިޔާއެވެ. އަތޮޅު ކައުންސިލްތަކުގެ އެސްޖީންގެ މުސާރަ އަކީ 21،000 ރުފިޔާއެވެ. ސިޓީ ކައުންސިލްގެ ސެކްރެޓަރީ ޖެނެރަލުންގެ މުސާރަ އަކީ 35،500 ރުފިޔާއެވެ.
